ಬೆಂಗಳೂರು: ಅತಿಯಾದರೆ ಅಮೃತವೂ ವಿಷ ಎಂಬ ಗಾದೆಮಾತಿದೆ. ಅದು ಸ್ಮಾರ್ಟ್ಫೋನ್ ವಿಷಯದಲ್ಲೂ ನಿಜವಾಗಿದೆ. ಇಲ್ಲೊಬ್ಬಳು ಮಹಿಳೆ ಅತಿಯಾಗಿ ಸ್ಮಾರ್ಟ್ಫೋನ್ ಬಳಕೆ ಮಾಡಿದ್ದರ ಪರಿಣಾಮವಾಗಿ ತನ್ನ ದೃಷ್ಟಿಯನ್ನು ಕಳೆದುಕೊಂಡಿದ್ದಾಳೆ. ಇದನ್ನು ಸ್ಮಾರ್ಟ್ಫೋನ್ ವಿಷನ್ ಸಿಂಡ್ರೋಮ್ ಎಂದು ವೈದ್ಯರು ವ್ಯಾಖ್ಯಾನಿಸಿದ್ದಾರೆ.
30 ವರ್ಷದ ಮಂಜು ಎಂಬ ಮಹಿಳೆ ಒಂದೂವರೆ ವರ್ಷದಿಂದ ದೃಷ್ಟಿದೋಷದಿಂದ ಬಳಲುತ್ತಿದ್ದು, ಆಕೆಯ ಈ ಸಮಸ್ಯೆಗೆ ಅತಿಯಾದ ಸ್ಮಾರ್ಟ್ಫೋನ್ ಬಳಕೆಯೇ ಕಾರಣ ಎಂದು ಹೈದರಾಬಾದ್ನ ವೈದ್ಯ ಡಾ.ಸುಧೀರ್ಕುಮಾರ್ ಎಂಬವರು ಟ್ವಿಟರ್ನಲ್ಲಿ ಹಂಚಿಕೊಂಡಿದ್ದಾರೆ.
ಮಂಜು ಕೆಲವು ಕ್ಷಣಗಳ ಮಟ್ಟಿಗೆ ಏನೂ ಕಾಣದಂಥ ಪರಿಸ್ಥಿತಿ ಅನುಭವಿಸುತ್ತಿದ್ದಳು. ರಾತ್ರಿ ಆಕೆ ವಾಷ್ರೂಮ್ಗೆ ಹೋಗಲು ಎದ್ದಾಗ ಸಾಮಾನ್ಯವಾಗಿ ಈ ಸಮಸ್ಯೆ ಉಂಟಾಗುತ್ತಿತ್ತು. ಹೀಗಾಗಿ ಆಕೆ ಕಣ್ಣಿನ ಡಾಕ್ಟರೊಬ್ಬರನ್ನು ನೋಡಿ ಪರೀಕ್ಷೆ ಮಾಡಿಸಿಕೊಂಡಾಗ ಎಲ್ಲ ನಾರ್ಮಲ್ ಎಂದು ಕಂಡುಬಂದಿತ್ತು. ಅದಾಗ್ಯೂ ಆಕೆಯ ಸಮಸ್ಯೆ ಪರಿಹಾರವಾಗಿರಲಿಲ್ಲ.
ನಂತರ ಆಕೆಯನ್ನು ನಾನು ಪರೀಕ್ಷಿಸಿದೆ. ಆಕೆ ದಿನಾ ರಾತ್ರಿ ಲೈಟ್ ಆಫ್ ಮಾಡಿಕೊಂಡು ಸುಮಾರು 2 ಗಂಟೆಗಳ ಕಾಲ ಸ್ಮಾರ್ಟ್ಫೋನ್ ನೋಡುತ್ತಿರುವುದು ತಿಳಿದುಬಂತು. ಆಗ ಆಕೆ ಸ್ಮಾರ್ಟ್ಫೋನ್ ವಿಷನ್ ಸಿಂಡ್ರೋಮ್ನಿಂದ ಬಳಲುತ್ತಿರುವುದು ಎಂಬುದು ನನಗೆ ಖಚಿತವಾಯಿತು ಎಂದು ವೈದ್ಯರು ಹೇಳಿಕೊಂಡಿದ್ದಾರೆ.
ಆಕೆ ಚಿಕಿತ್ಸೆಯನ್ನು ನಿರೀಕ್ಷಿಸಿದರೂ ನಾನು ಆಕೆಗೆ ಯಾವುದೇ ಔಷಧ ಬರೆದು ಕೊಡಲಿಲ್ಲ, ಚಿಕಿತ್ಸೆಯನ್ನೂ ನೀಡಲಿಲ್ಲ. ಈ ಸಮಸ್ಯೆಗೆ ಕಾರಣ ಏನು ಎಂಬುದನ್ನು ನಾನು ಆಕೆಗೆ ಮನದಟ್ಟು ಮಾಡಿದ್ದಲ್ಲದೆ, ಸ್ಮಾರ್ಟ್ಫೋನ್ ಬಳಕೆ ಕಡಿಮೆ ಮಾಡಲು ಸೂಚಿಸಿದೆ. ಕಡಿಮೆ ಅಲ್ಲ, ಫೋನ್ ನೋಡುವುದನ್ನೇ ನಿಲ್ಲಿಸುತ್ತೇನೆ, ಅತಿ ಅಗತ್ಯ ಅಂತ ಅನಿಸದ ಹೊರತು ಸ್ಮಾರ್ಟ್ಫೋನ್ ನೋಡಲ್ಲ ಎಂದು ಆಕೆ ತಿಳಿಸಿದಳು. ಹೀಗೆ ಒಂದು ತಿಂಗಳ ಅಭ್ಯಾಸದ ಬಳಿಕ ಈಗ ಆಕೆ ಸರಿಹೋಗಿದ್ದಾಳೆ, ಒಂದೂವರೆ ವರ್ಷದಿಂದ ಬಳಲುತ್ತಿದ್ದ ದೃಷ್ಟಿದೋಷವೂ ನಿವಾರಣೆಯಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.
ಅತಿಯಾದ ಸ್ಮಾರ್ಟ್ಫೋನ್ ಬಳಕೆಯಿಂದ ಕೆಲವರು ದೃಷ್ಟಿದೋಷದ ಸಮಸ್ಯೆಗೆ ಒಳಗಾಗುತ್ತಿರುವುದು ಅಧ್ಯಯನಗಳಿಂದ ಕಂಡುಬಂದಿದೆ. ಇದನ್ನು ಸ್ಮಾರ್ಟ್ಫೋನ್ ವಿಷನ್ ಸಿಂಡ್ರೋಮ್ ಎಂದು ಕರೆಯಲಾಗುತ್ತದೆ. ಅದರಲ್ಲೂ ರಾತ್ರಿ ಹೊತ್ತು ಲೈಟ್ ಆಫ್ ಮಾಡಿಕೊಂಡು ಸ್ಮಾರ್ಟ್ಫೋನ್ ನೋಡುವುದು ಅನಾರೋಗ್ಯಕಾರಿ. ತುಂಬಾ ಹೊತ್ತು ಡಿಜಿಟಲ್ ಡಿವೈಸ್ ನೋಡುವಂಥವರು ಪ್ರತಿ 20 ನಿಮಿಷಕ್ಕೊಮ್ಮೆ 20 ಸೆಕೆಂಡುಗಳ ವಿರಾಮ ಪಡೆದು, 20 ಅಡಿ ದೂರದ ವಸ್ತುವನ್ನು ನೋಡುವುದು ಉತ್ತಮ ಪರಿಹಾರ ಎಂದು ವೈದ್ಯರು ತಿಳಿಸಿದ್ದಾರೆ.
ಭೀಕರ ಅಪಘಾತ: ಕೆಟ್ಟು ನಿಂತಿದ್ದ ಕ್ಯಾಂಟರ್ಗೆ ಬುಲೆಟ್ ಡಿಕ್ಕಿ, ಯುವಕ-ಯುವತಿ ಸ್ಥಳದಲ್ಲೇ ಸಾವು
ತನ್ನ ನೆಚ್ಚಿನ ನಾಯಕ ಸಿಎಂ ಆಗಲೆಂದು 25 ವರ್ಷದಿಂದ ಗಡ್ಡ ಬಿಟ್ಟ ಅಭಿಮಾನಿ!