ವಾಷಿಂಗ್ಟನ್: ಲಾಸ್ ಏಂಜಲೀಸ್ನ ಗುಡ್ಡಗಾಡು ಪ್ರದೇಶದಲ್ಲಿ ಭಾನುವಾರ ಹೆಲಿಕಾಪ್ಟರ್ ಪತನಗೊಂಡು ಅಮೆರಿಕದ ಬಾಸ್ಕೆಟ್ ಬಾಲ್ ದಿಗ್ಗಜ ಕೋಬ್ ಬ್ರಿಯಾಂಟ್ ಹಾಗೂ ಅವರ ಪುತ್ರಿ ಜಿಯಾ ದುರಂತ ಸಾವಿಗೀಡಾಗಿದ್ದಾರೆ.
ಕೋಬ್ ಸಾವಿಗೆ ಇಡೀ ಕ್ರೀಡಾ ಜಗತ್ತು ಕಣ್ಣೀರು ಹಾಕಿದೆ. ಕ್ರೀಡಾ ಪ್ರೇಮಿಗಳು ಮರುಗಿದ್ದಾರೆ. ಆದರೆ ಇಲ್ಲೊಬ್ಬಳು ಪತ್ರಕರ್ತೆ ಕೋಬ್ ಅವರ ಬಗ್ಗೆ ಆಕ್ಷೇಪಾರ್ಹವಾಗಿ ಟ್ವೀಟ್ ಮಾಡಿ ಕೆಲಸವನ್ನೇ ಕಳೆದುಕೊಂಡಿದ್ದಾಳೆ.
ಅಮೆರಿಕದ ಪ್ರಸಿದ್ಧ ದಿನಪತ್ರಿಕೆ ವಾಷಿಂಗ್ಟನ್ ಪೋಸ್ಟ್ನಲ್ಲಿ ಕೆಲಸ ಮಾಡುತ್ತಿದ್ದ ಪತ್ರಕರ್ತೆ ಫೆಲಿಷಿಯಾ ಸೊನ್ಮೆಜ್ ಎಂಬುವರು ಕೋಬ್ ಮೃತಪಟ್ಟ ಬೆನ್ನಲ್ಲೇ ಅನಗತ್ಯವಾಗಿ ಕೋಬ್ ಅವರ ಹಳೇ ಅತ್ಯಾಚಾರ ಪ್ರಕರಣವೊಂದರ ಸ್ಟೋರಿಯ ಲಿಂಕ್ ಶೇರ್ ಮಾಡಿದ್ದರು.
2003ರಲ್ಲಿ ಹೋಟೆಲ್ನಲ್ಲಿ ಕೆಲಸ ಮಾಡುತ್ತಿದ್ದವಳೊಬ್ಬಳು ಕೋಬ್ ತನ್ನ ಮೇಲೆ ಅತ್ಯಾಚಾರ ಎಸಗಿದ್ದಾಗಿ ಆರೋಪ ಮಾಡಿದ್ದಳು. ಅಲ್ಲದೆ ತನ್ನ ಮೇಲೆ ಹಲ್ಲೆ ಕೂಡ ನಡೆಸಿದ್ದಾರೆ ಎಂದು ಹೇಳಿದ್ದಳು. ಪ್ರಕರಣಕ್ಕೆ ಸಂಬಂಧಪಟ್ಟಂತೆ ವಿಚಾರಣೆ ನಡೆಸಲು ಕೋಬ್ ಬ್ರಿಯಾಂಟ್ ಅವರನ್ನು ಪೊಲೀಸರು ಬಂಧಿಸಿದ್ದರು. ವಿಚಾರಣೆ ವೇಳೆ ಕೋಬ್ ತಾವು ಆರೋಪ ಮಾಡಿದ ಯುವತಿಯೊಂದಿಗೆ ಲೈಂಗಿಕ ಸಂಪರ್ಕ ಮಾಡಿದ್ದು ನಿಜ. ಆದರೆ ಬಲವಂತ ಮಾಡಿಲ್ಲ, ಹಲ್ಲೆಯನ್ನು ಮಾಡಿಲ್ಲ ಎಂದೂ ಹೇಳಿದ್ದರು. ಕೋಬ್ರನ್ನು ಬಂಧಿಸಿದ ಎರಡೇ ದಿನದಲ್ಲಿ ಅವರಿಗೆ ಜಾಮೀನು ಸಿಕ್ಕಿತ್ತು. 25,000 ಡಾಲರ್ ಶ್ಯೂರಿಟಿ ಬಾಂಡ್ ಆಧಾರದಲ್ಲಿ ಅವರನ್ನು ಬಿಡುಗಡೆ ಮಾಡಲಾಗಿತ್ತು.
2016ರಲ್ಲಿ ಡೇಲಿ ಬೀಸ್ಟ್ ಎಂಬ ಅಮೆರಿಕದ ಸುದ್ದಿ ಮತ್ತು ಅಭಿಪ್ರಾಯ ಸಂಗ್ರಹಣಾ ವೆಬ್ಸೈಟ್ ಕೋಬ್ ಅತ್ಯಾಚಾರ ಪ್ರಕರಣದ ಬಗ್ಗೆ ಒಂದು ಸ್ಟೋರಿ ಪ್ರಕಟಿಸಿದೆ. ಕೋಬ್ ಬ್ರಿಯಾಂಟ್ಸ್ ಡಿಸ್ಟರ್ಬಿಂಗ್ ರೇಪ್ಕೇಸ್: ದಿ ಡಿಎನ್ಎ ಎವಿಡೆನ್ಸ್, ದಿ ಎಕ್ಯೂಸರ್ಸ್ ಸ್ಟೋರಿ ಮತ್ತು ಹಾಫ್ ಕನ್ಫೆಷನ್ (ಕೋಬ್ ಬ್ರಿಯಾಂಟ್ ಅವರ ಗೊಂದಲದ ಅತ್ಯಾಚಾರ ಪ್ರಕರಣ; ಡಿಎನ್ಎ ಪುರಾವೆ, ಆರೋಪಿಯ ಕತೆ ಮತ್ತು ಅರ್ಧ ತಪ್ಪೊಪ್ಪಿಗೆ) ಎಂದು ಅದಕ್ಕೆ ಹೆಡ್ಲೈನ್ ಕೊಟ್ಟಿತ್ತು.
ಈಗ ಅವರು ಮೃತಪಟ್ಟ ಮೇಲೆ ವಾಷಿಂಗ್ಟನ್ ಪೋಸ್ಟ್ನ ಪತ್ರಕರ್ತೆ ಫೆಲಿಷಿಯಾ ಸೊನ್ಮೆಜ್ ಅದೇ ಸುದ್ದಿಯ ಲಿಂಕ್ನ್ನು ಟ್ವಿಟರ್ನಲ್ಲಿ ಪೋಸ್ಟ್ ಮಾಡಿದ್ದರು.
ಈ ಟ್ವೀಟ್ ಸಿಕ್ಕಾಪಟೆ ವೈರಲ್ ಆಗಿತ್ತು. ಸಾವಿರಗಳಷ್ಟು ಲೈಕ್ಸ್ ಬಂದಿದ್ದವು. ಹಾಗೇ ಹಲವು ಕಾಮೆಂಟ್ಗಳನ್ನೂ ನೆಟ್ಟಿಗರು ಮಾಡಿದ್ದರು. ಆದರೆ ಟ್ವೀಟ್ನ್ನು ವಿರೋಧಿಸಿ ಕಾಮೆಂಟ್ ಮಾಡಿದ್ದವರೇ ಹೆಚ್ಚಾಗಿದ್ದರು. ಆ ಬಗ್ಗೆ ಸೊನ್ಮೆಜ್ ಅವರೇ ಮತ್ತೆ ಟ್ವೀಟ್ ಮೂಲಕ ಹೇಳಿಕೊಂಡಿದ್ದರು.
ನಾನು ಕೋಬ್ ಬಗ್ಗೆ ಮಾಡಿದ ಟ್ವೀಟ್ ನನ್ನ ಕಣ್ಣು ತೆರೆಸಿತು. ಹೆಚ್ಚುಕಡಿಮೆ 10,000 ಜನರು ಕಾಮೆಂಟ್, ಇಮೇಲ್ ಮೂಲಕ ನನ್ನನ್ನು ನಿಂದಿಸಿದ್ದಾರೆ. ಕೆಲವರಂತೂ ಜೀವ ಬೆದರಿಕೆಯನ್ನೂ ಒಡ್ಡಿದ್ದಾರೆ. ಆದರೆ ನಾನು ಶೇರ್ ಮಾಡಿದ ಸ್ಟೋರಿ ಮೂರು ವರ್ಷಗಳ ಹಿಂದೆಯೇ ಪಬ್ಲಿಶ್ ಆಗಿದ್ದು. ಅದು ನಾನು ಬರೆದಿದ್ದೂ ಅಲ್ಲ ಎಂದಿದ್ದಾರೆ.
ಆದರೆ ಈ ಟ್ವೀಟ್ ವಿರುದ್ಧ ಕೋಬ್ ಅಭಿಮಾನಿಗಳು, ನೆಟ್ಟಿಗರು ಹೇಗೆ ತಿರುಗಿಬಿದ್ದಿದ್ದರು ಎಂದರೆ ಫೈರ್ ಫೆಲಿಷಿಯಾ ಸೊನ್ಮೆಜ್ (#FireFeliciaSonmez )ಎಂದು ಹ್ಯಾಷ್ಟ್ಯಾಗ್ ಸೃಷ್ಟಿಯಾಗಿತ್ತು. ಬಳಿಕ ಫೆಲಿಷಿಯಾ ಆ ಟ್ವೀಟ್ನ್ನು ಡಿಲೀಟ್ ಮಾಡಿದ್ದಾರೆ.
ವಾಷಿಂಗ್ಟನ್ ಪೋಸ್ಟ್ ಪತ್ರಿಕೆಯ ಮ್ಯಾನೇಜಿಂಗ್ ಎಡಿಟರ್ ಟ್ರೇಸಿ ಗ್ರಾಂಟ್ ಅವರು ಫೆಲಿಷಿಯಾ ಅವರನ್ನು ಕೆಲಸದಿಂದ ಅಮಾನತು ಮಾಡಿದ್ದಾಗಿ ತಿಳಿಸಿದ್ದಾರೆ. ಕೋಬ್ ಮರಣದ ನಂತರ ಫೆಲಿಷಿಯಾ ಅವರು ಮಾಡಿರುವ ಟ್ವೀಟ್ ನಮ್ಮ ಪತ್ರಿಕೆಯ ಸಾಮಾಜಿಕ ಜಾಲತಾಣದ ನೀತಿಯನ್ನು ಉಲ್ಲಂಘಿಸಿದೆ. ಹಾಗಾಗಿ ಅವರನ್ನು ಕೆಲಸದಿಂದ ಸಸ್ಪೆಂಡ್ ಮಾಡಲಾಗಿದೆ ಎಂದಿದ್ದಾರೆ. ಫೆಲಿಷಿಯಾ ವಾಷಿಂಗ್ಟನ್ ಪೋಸ್ಟ್ನಲ್ಲಿ ಪೊಲಿಟಿಕಲ್ ವರದಿಗಾರ್ತಿಯಾಗಿದ್ದಳು ಎನ್ನಲಾಗಿದೆ.(ಏಜೆನ್ಸೀಸ್)
