ಪಟ್ನಾ : ಬಿಹಾರದಲ್ಲಿ ಕದ್ದ ವಾಹನಗಳಿಗೆ ನಕಲಿ ದಾಖಲೆಪತ್ರಗಳನ್ನು ಮಾಡಿಕೊಡುವ ಹಗರಣ ನಡೆಸುವ ಆರೋಪ ಹೊತ್ತಿರುವ ಜಿಲ್ಲಾ ಸಾರಿಗೆ ಅಧಿಕಾರಿ (ಡಿಟಿಒ) ಒಬ್ಬರ ಮನೆಗೆ ವಿಜಿಲೆನ್ಸ್ ಅಧಿಕಾರಿಗಳು ದಾಳಿ ನಡೆಸಿದ್ದಾರೆ. ತಮ್ಮ ಆದಾಯಕ್ಕಿಂತ 1.24 ಕೋಟಿ ರೂ.ಗಳಿಗೂ ಹೆಚ್ಚಿನ ಆಸ್ತಿಗಳನ್ನು ಹೊಂದಿದ್ದಾರೆನ್ನಲಾದ ಬಿಎಎಸ್ ಅಧಿಕಾರಿ ರಜನೀಶ್ ಲಾಲ್ರ ಮೂರು ಫ್ಲ್ಯಾಟ್ಗಳ ದಾಖಲೆಪತ್ರಗಳನ್ನೂ ಪರಿಶೀಲಿಸಲಾಗುತ್ತಿದೆ.
2020ರ ಫೆಬ್ರವರಿ 3 ಕ್ಕೆ ಮುಜಫ್ಫಪುರದ ಡಿಟಿಒ ಆಗಿ ಅಧಿಕಾರ ವಹಿಸಿಕೊಂಡ ರಜನೀಶ್ಲಾಲ್ಗೆ 2021 ರ ಮಾರ್ಚ್ನಲ್ಲಿ ಛಾಪ್ರದ ಡಿಟಿಒ ಆಗಿ ಹೆಚ್ಚುವರಿ ಚಾರ್ಜ್ ನೀಡಲಾಗಿದೆ. ಈ ಪ್ರದೇಶಗಳಲ್ಲಿ ನಕಲಿ ದಾಖಲೆಪತ್ರಗಳ ಸೃಷ್ಟಿಯ ಜಾಲವಿದ್ದು, ಅದರಲ್ಲಿ ರಜನೀಶ್ ಲಾಲ್ ಕೈವಾಡವಿದೆ ಎಂದು ಜನವರಿಯಲ್ಲಿ ಆರೋಪ ಕೇಳಿಬಂದಿದೆ.
ಈ ಬಗ್ಗೆ ತನಿಖೆ ನಡೆಯುತ್ತಿರುವ ಜೊತೆಯಲ್ಲೇ , ವಿಜಿಲೆನ್ಸ್ ಅಧಿಕಾರಿಗಳು ಇಂದು ಪಟ್ನಾದ ಕಂಕರ್ಬಾಗ್ ಪ್ರದೇಶದಲ್ಲಿರುವ ಲಾಲ್ರ ಮನೆಗಳಿಗೆ ದಾಳಿಯಿಟ್ಟರು. ಮನೆಗಳು ಮತ್ತು ಇತರ ಆಸ್ತಿಗಳ ದಾಖಲಾತಿಗಳನ್ನು ಪರಿಶೀಲಿಸಿದರು. 50 ಲಕ್ಷಕ್ಕೂ ಹೆಚ್ಚು ನಗದು ಮತ್ತು ಚಿನ್ನ-ಬೆಳ್ಳಿ ಆಭರಣಗಳನ್ನು ಜಪ್ತಿಪಡಿಸಿಕೊಂಡರು. ತನಿಖೆ ಮುಂದುವರಿದಿದೆ. (ಏಜೆನ್ಸೀಸ್)
ಕರೊನಾ ಮಧ್ಯೆ ಪರೀಕ್ಷೆ ಏಕೆ? ಫಲಿತಾಂಶ ಯಾವಾಗ? ಆಂಧ್ರ ಸರ್ಕಾರಕ್ಕೆ ಸುಪ್ರೀಂ ತರಾಟೆ