ಫ್ಲೋರಿಡಾ: ಸುದ್ದಿ ಜಗತ್ತೀಗ ಕರೊನಾ ಬೆನ್ನತ್ತಿದೆ. ಎಲ್ಲ ಸುದ್ದಿಗಳೀಗ ಕರೊನಾ ಹಾಗೂ ಅದರಿಂದಾಗುತ್ತಿರುವ ಪರಿಣಾಮಗಳನ್ನೇ ಕೇಂದ್ರೀಕರಿಸಿವೆ. ಅಂತೆಯೇ ಫ್ಲೋರಿಡಾದ ಎಬಿಸಿ ಸುದ್ದಿವಾಹಿನಿಯ ವರದಿಗಾರ ವಿಲ್ ರೀವ್ ಇಂಥದ್ದೇ ಸುದ್ದಿ ಬೆನ್ನತ್ತಿದ್ದಾಗ ಅಲ್ಲಿನ ವೃದ್ಧರಿರುವ ಊರಿನಲ್ಲಿ (ರಿಟೈರ್ಮೆಂಟ್ ವಿಲೇಜ್) ಔಷಧ ಕಂಪನಿಯೊಂದು ಡ್ರೋನ್ಗಳನ್ನು ಬಳಸಿ ಔಷಧ ಪೂರೈಸುತ್ತಿರುವ ವಿಷಯ ಗೊತ್ತಾಗಿದೆ.
ಇದರ ಬಗ್ಗೆ ವರದಿ ತಯಾರು ಮಾಡಿ ವಾಹಿನಿಗೆ ಕಳುಹಿಸಿದ್ದ. ಸರಿ ಬೆಳಗಿನ ‘ಗುಡ್ ಮಾರ್ನಿಂಗ್ ಅಮೆರಿಕ’ ಬುಲೆಟಿನ್ನಲ್ಲಿ ಆ ಸುದ್ದಿ ಪ್ರಸಾರವಾಗಬೇಕಿತ್ತು. ಇದಕ್ಕಾಗಿ ಆತನನ್ನೇ ಲೈವ್ ಬರುವಂತೆ ಸಂಸ್ಥೆ ತಿಳಿಸಿತ್ತು.
ಕರೊನಾದಿಂದಾಗಿ ಹೆಚ್ಚಿನವರು ಮನೆಯಿಂದ ಕೆಲಸ ಮಾಡುವಂತೆ ಆತ ಕೂಡ ವರ್ಕ್ ಫ್ರಾಮ್ ಹೋಮ್ ನಡೆಸಿದ್ದ. ಲೈವ್ಗಾಗಿ ಕ್ಯಾಮರಾ ಸಜ್ಜುಗೊಳಿಸಿ, ಚಂದನೆಯ ಶರ್ಟ್, ಅದರ ಮೇಲೊಂದು ಗಾಢ ಬಣ್ಣದ ಸೂಟ್ ಧರಿಸಿ ಕುಳಿತಿದ್ದ. ಲೈವ್ನಲ್ಲಿ ಸುದ್ದಿಯನ್ನು ನಿರೂಪಿಸಿದ. ಇನ್ನೇನು ಸುದ್ದಿ ಮುಗಿಯಿತು ಎನ್ನುವಾಗ ಆತ ಸಜ್ಜಾಗಿದ್ದರ ಅಸಲಿ ರಹಸ್ಯ ಬಯಲಾಗಿದೆ. ಸುದ್ದಿ ಮುಗಿಯುವ ಹಂತದಲ್ಲಿ ತೆರೆಯ ಮೇಲೆದ್ದ ಗ್ರಾಫಿಕ್ಸ್ ಮರೆಯಾದಾಗ ಆತ ಪ್ಯಾಂಟ್ ಧರಿಸದಿರುವುದು ಗೊತ್ತಾಗಿದೆ. ಇದು ಆನ್ಸ್ಕ್ರೀನ್ನಲ್ಲೂ ಕಾಣಿಸಿದೆ.
ಇದರ ಸ್ಕ್ರೀನ್ಶಾಟ್ ಬಳಸಿಕೊಂಡ ವೀಕ್ಷಕರು ವಿಲ್ ರೀವ್ನನ್ನು ಟ್ರೋಲ್ ಮಾಡುತ್ತಿದ್ದಾರೆ. ಜತೆಗೆ, ವಿಡಿಯೋ ಕೂಡ ಸಾಕಷ್ಟು ವೈರಲ್ ಆಗಿದೆ.
ಸುದ್ದಿ ಬಿತ್ತರಿಸುವಾಗ ಹಲವು ಬಾರಿ ಮುಜುಗರಕ್ಕೀಡಾಗುವ ಸನ್ನಿವೇಶಗಳು ನಡೆದಿರುತ್ತವೆ. ಅವುಗಳನ್ನೇ ಸಂಕಲಿಸಿ ಕಾರ್ಯಕ್ರಮವಾಗಿಯೂ ಪ್ರಸಾರ ಮಾಡಲಾಗುತ್ತದೆ.
ಸಾಮಾನ್ಯವಾಗಿ ಸುದ್ದಿ ಓದುವಾಗ ತೆರೆ ಮೇಲೆ ನಿರೂಪಕರ ಮೇಲ್ಭಾಗವನ್ನಷ್ಟೇ ತೋರಿಸಲಾಗುವ ಕಾರಣ, ‘ಅವರು ಪ್ಯಾಂಟ್ ಧರಿಸಿರುವುದಿಲ್ಲ’ ಎಂಬ ಮಾತನ್ನು ಎಂದು ತಮಾಷೆಯಾಗಿ ಹೇಳಲಾಗುತ್ತದೆ. ಅದನ್ನು ನಿಜವಾಗಿಸುವ ಯತ್ನವನ್ನು ರೀವ್ ಮಾಡಬಾರದಿತ್ತು ಅಲ್ಲವೇ?
https://www.vijayavani.net/all-govt-employees-should-download-aarogya-setu-app-immediately-orders-centre/