ಗುಳೇದಗುಡ್ಡ: ಪಟ್ಟಣ ಸೇರಿ ತಾಲೂಕಿನ ಸುತ್ತಮುತ್ತಲಿನ ಗ್ರಾಮಗಳಲ್ಲಿ ವಾರದಿಂದ ನಿರಂತರ ಸುರಿಯುತ್ತಿರುವ ಮಳೆಯಿಂದಾಗಿ ಗುಳೇದಗುಡ್ಡ-ಕೋಟೆಕಲ್ಲ-ಹಿರೇದಿಡುಗು ಜಲಪಾತಕ್ಕೀಗ ಜೀವಕಳೆ ಬಂದಿದ್ದು, ಪ್ರವಾಸಿಗರನ್ನು ಕೈ ಬೀಸಿ ಕರೆಯುತ್ತಿದೆ.
ಎರಡು ದಿನಗಳಿಂದ ಈ ಹಿರೆದಿಡುಗು ಜಲಪಾತ ಮೈದುಂಬಿ ಹರಿಯುತ್ತಿದೆ. ಹಲವಾರು ಜನರು, ಯುವಕರು ಇಲ್ಲಿಗೆ ಭೇಟಿ ನೀಡಿ, ಧುಮ್ಮಿಕ್ಕಿ ಹರಿಯುವ ನೀರಿಗೆ ಮೈಯೊಡ್ಡಿ ಸಂಭ್ರಮಿಸುತ್ತಿದ್ದಾರೆ.
ಅಲ್ಲದೆ, ಜಲಪಾತ ಕೆಳಗೆ ಸ್ನಾನ ಮಾಡುತ್ತಿರುವುದು ಸಾಮಾನ್ಯವಾಗಿದೆ. ಮಳೆಗಾಲಯದಲ್ಲಿ ತನ್ನ ಸೌಂದರ್ಯ ಪ್ರದರ್ಶಿಸುವ ಈ ಜಲಪಾತ ಈ ಭಾಗದ ಪ್ರವಾಸ ಪ್ರಿಯರಿಗೆ ಬಲು ಅಚ್ಚುಮೆಚ್ಚಿನ ತಾಣವೆನಿಸಿದೆ.
ಪಟ್ಟಣದಿಂದ ಅಂದಾಜು 3 ಕಿ.ಮೀ. ದೂರವಿರುವ ಈ ಜಲಪಾತ ಕೋಟೆಕಲ್ಲ ಗ್ರಾಮಕ್ಕೆ ಹೊಂದಿಕೊಂಡಿರುವ ವಿಶಾಲವಾದ ಗುಡ್ಡದ ಮೇಲೇರಿದರೆ ಕಾಣಿಸಿಗುತ್ತದೆ.
ಗುಡ್ಡದ ಕೊಳ್ಳದಲ್ಲಿ ಅಂದಾಜು 25 ಅಡಿ ಎತ್ತರದಿಂದ ಹಾಲಿನಂತೆ ಜಲ ಧುಮುಕುತ್ತಿದೆ. ಅಲ್ಲದೆ, ಇಲ್ಲಿನ ಪರಿಸರ ಮಲೆನಾಡನ್ನು ನೆನಪಿಸುತ್ತಿದ್ದು, ‘ಬಯಲುನಾಡಿನ ಜೋಗ’ ಎಂದೇ ಪ್ರಸಿದ್ಧಿಯಾಗಿದೆ.
ಇದನ್ನೂ ಓದಿ: ಪ್ರವಾಹ ನಿರ್ವಹಣೆಗೆ ಸನ್ನದ್ದರಾಗಿ
ಜಿಲ್ಲೆ ಸೇರಿ ವಿವಿಧ ಗ್ರಾಮಗಳಿಂದ ಯುವಕರು, ಯುವತಿಯರಷ್ಟೇ ಅಲ್ಲದೆ ಕುಟುಂಬ ಸಮೇತರಾಗಿ ಗುಳೇದಗುಡ್ಡ-ಕೋಟೆಕಲ್ಲ ಫಾಲ್ಸ್‌ಗೆ ಭೇಟಿ ನೀಡುತ್ತಿರುವುದು ಸಾಮಾನ್ಯವಾಗಿದೆ.
ತಾಲೂಕಿನ ಕೆಲವಡಿ, ಕೋಟೆಕಲ್ಲ, ಲಾಯದಗುಂದಿ, ಆಸಂಗಿ, ಪರ್ವತಿ, ತೋಗುಣಶಿ, ತೆಗ್ಗಿ, ಹಂಸನೂರ, ಪಾದನಕಟ್ಟಿ, ಅಲ್ಲೂರ ಎಸ್.ಪಿ. ಸೇರಿ ವಿವಿಧೆಡೆ ಉತ್ತಮ ಮಳೆಯಾಗಿದೆ.