ನವದೆಹಲಿ: ಭಾರತ ಮಂಟಪದಲ್ಲಿ ಮಾ.8ರಂದು ಪ್ರಧಾನಿ ನರೇಂದ್ರ ಮೋದಿ ಅವರು ನ್ಯಾಷನಲ್ ಕ್ರಿಯೇಟರ್ಸ್‌ ಅವಾರ್ಡ್ ಪ್ರದಾನ ಮಾಡಿದರು. ಈ ವೇಳೆ ತಮಿಳುನಾಡಿನ ಯುವತಿಗೂ ಪ್ರಶಸ್ತಿ ನೀಡಿ ಗೌರವಿಸಲಾಯಿತು. ಕೀರ್ತಿ ಹಿಸ್ಟರಿ (Keerthi History) ಎಂದು ಕರೆಯಲ್ಪಡುವ ಈ ಯುವತಿಯ ಹೆಸರು ಕೀರ್ತಿಕಾ ಗೋವಿಂದಸಾಮಿ.
ಪ್ರಶಸ್ತಿ ಸ್ವೀಕರಿಸಿದ ನಂತರ ತನ್ನ ಕಥೆಯನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡಿರುವ ಕೀರ್ತಿ, ಪ್ರಶಸ್ತಿಯು ತನ್ನ ಜೀವನವನ್ನು ಹೇಗೆ ಬದಲಾಯಿಸಿದೆ ಎಂದು ಹೇಳಿಕೊಂಡಿದ್ದಾರೆ. ಕೀರ್ತಿ ತಮ್ಮ ಅಧಿಕೃತ ಇನ್‌ಸ್ಟಾಗ್ರಾಮ್ ಪ್ರೊಫೈಲ್‌ನಲ್ಲಿ ಪೋಸ್ಟ್ ಅನ್ನು ಹಂಚಿಕೊಂಡಿದ್ದು, ಈ ಪೋಸ್ಟ್‌ನಲ್ಲಿ ಮೋದಿಯವರ ಕೈಯಿಂದ ಪ್ರಶಸ್ತಿಯನ್ನು ತೆಗೆದುಕೊಳ್ಳುತ್ತಿದ್ದಾರೆ. ಪೋಸ್ಟ್ ಅನ್ನು ಹಂಚಿಕೊಳ್ಳುವಾಗ ಅವರು “ನಾನು ಕನಸಿನಲ್ಲಿಯೂ ಯೋಚಿಸಿರಲಿಲ್ಲ. ಆಗ ನನಗೆ 15 ವರ್ಷ. ಒಂದು ರಾತ್ರಿ ಹಳ್ಳಿಯ ಜನರು ನನ್ನ ಬಗ್ಗೆ ಕೆಟ್ಟದಾಗಿ ಮಾತನಾಡುತ್ತಿರುವಾಗ ನನ್ನ ತಂದೆ ಅಳುವುದು ನನಗೆ ಕೇಳಿಸಿತು. ನನ್ನ ಜೀವನದುದ್ದಕ್ಕೂ, ಅವರು ನನ್ನ ಬಗ್ಗೆ ನಾಚಿಕೆಪಡುತ್ತಿದ್ದರು.
ನನಗೆ ಬಾಯ್ ಫ್ರೆಂಡ್ ಇರಲಿಲ್ಲ. ನಾನು ಓದುವುದರಲ್ಲಿ ತುಂಬಾ ಮುಂದಿದ್ದೆ. ನಾನು ಸ್ವಂತಕ್ಕೆ ಕೆಲಸಗಳನ್ನು ಮಾಡಲು ಬಯಸುತ್ತೇನೆ. ನನ್ನ ಕುಟುಂಬದ ಪುರುಷರ ಮೇಲೆ ಅವಲಂಬಿತರಾಗಲು ನಾನು ಬಯಸಲಿಲ್ಲ. ಹುಡುಗಿಯಾದ ಕಾರಣ ನಮಗೆ ಹತ್ತಿರದ ಅಂಗಡಿಗೆ ಹೋಗಲೂ ಬಿಡುತ್ತಿರಲಿಲ್ಲ. ನನಗೇನಾದರೂ ಬೇಕಾದರೆ ನನ್ನ ಸಹೋದರರ ಬಳಿ ಬೇಡಬೇಕಾಗಿತ್ತು. ಒಮ್ಮೆ ನಾನು ನನ್ನ ಮನೆಯಿಂದ 100 ಮೀಟರ್ ದೂರದಲ್ಲಿರುವ ಅಂಗಡಿಗೆ ಹೋದೆ, ಅದಕ್ಕಾಗಿ ನನಗೆ ಕಪಾಳಮೋಕ್ಷವಾಯಿತು.
ನಾನು ಬೇಸಿಕ್ ವಿಷಯಗಳಿಗೂ ಕಷ್ಟಪಡಬೇಕಾಯಿತು. ಪುರಾತತ್ವಶಾಸ್ತ್ರಜ್ಞನಾಗುವುದು ನನ್ನ ಕನಸಾಗಿತ್ತು. ಅದಕ್ಕಾಗಿಯೇ ನಾನು ನನ್ನ ಪದವಿಯಲ್ಲಿ ಇತಿಹಾಸವನ್ನು ಒಂದು ವಿಷಯವಾಗಿ ಆರಿಸಿಕೊಂಡೆ. ಪದವಿ ಮುಗಿದ ನಂತರ ನನ್ನ ಕುಟುಂಬದ ಸದಸ್ಯರು ನನಗೆ ಮದುವೆ ಮಾಡಲು ಪ್ರಯತ್ನಿಸಿದರು. ಆ ದಿನ ನಾನು ಅಸಹಾಯಕಳಾಗಿ ಅತ್ತಿದ್ದು, ಇನ್ನೂ ನೆನಪಿದೆ.
View this post on Instagram
ಇದಾದ ನಂತರ ಯಾವ ಕೆಲಸ ಸಿಕ್ಕರೂ ಅದನ್ನೇ ಮಾಡುತ್ತಾ ಹೋದೆ. ನಾನು ಟ್ಯೂಷನ್ ಮಾಡಲು ಪ್ರಾರಂಭಿಸಿದೆ. ರಿಸೆಪ್ಷನಿಸ್ಟ್ ಆಗಿಯೂ ಕೆಲಸ ಮಾಡಿದೆ. ಅಷ್ಟೇ ಏಕೆ ನಾನು ಎಲೆಕ್ಟ್ರಿಷಿಯನ್ ಆಗಿಯೂ ಕೆಲಸ ಮಾಡಿದ್ದೇನೆ. ಸೆಕೆಂಡ್ ಹ್ಯಾಂಡ್ ಲ್ಯಾಪ್‌ಟಾಪ್ ಖರೀದಿಸಲು ನನಗೆ ಸುಮಾರು ಒಂದೂವರೆ ವರ್ಷ ಬೇಕಾಯಿತು. ಅಪ್ಪ ಮತ್ತು ನಾನು 6 ವರ್ಷ ಪೂರ್ತಿ ಮಾತನಾಡುತ್ತಿರಲಿಲ್ಲ. ಅವರು ನನ್ನ ಬಗ್ಗೆ ಬಹಳ ನಿರಾಶೆಗೊಂಡಿದ್ದರು. ನನ್ನ ತಂದೆ-ತಾಯಿಯನ್ನು ಅಪಾರ್ಥ ಮಾಡಿಕೊಳ್ಳಬೇಡಿ. ಅವರು ನನಗಾಗಿ ಬಹಳಷ್ಟು ಮಾಡಿದರು. ಹಳ್ಳಿಯಲ್ಲಿ ನಿಮ್ಮ ಹೆತ್ತವರು ಮಾತ್ರ ನಿಮಗಾಗಿ ನಿರ್ಧಾರಗಳನ್ನು ತೆಗೆದುಕೊಳ್ಳುವುದಿಲ್ಲ. ಇದರಲ್ಲಿ ಸಂಬಂಧಿಕರೂ ಪ್ರಮುಖ ಪಾತ್ರ ವಹಿಸುತ್ತಾರೆ. ಪೋಷಕರು ಕೆಲವು ವಿಷಯಗಳನ್ನು ಬ್ಯಾಲೆನ್ಸ್ ಮಾಡಲು ತಮ್ಮ ಕೈಲಾದಷ್ಟು ಪ್ರಯತ್ನಿಸಿದರು. ನಾನು ನನ್ನ ಕೈಲಾದಷ್ಟು ಪ್ರಯತ್ನಿಸಿದೆ. ನಾನು ನಿಜವಾಗಿಯೂ ಗಟ್ಟಿ ಹುಡುಗಿ.
ನಾನು ಅವರನ್ನು ಮೊದಲ ಬಾರಿಗೆ ವಿಮಾನದಲ್ಲಿ ಕರೆದುಕೊಂಡು ಹೋದೆ. ಮೋದಿಯವರಿಂದ ನನಗೆ ಪ್ರಶಸ್ತಿ ಬರುತ್ತಿರುವುದು ಅವರಿಗೆ ತಿಳಿಯಿತು. ನಾನು ಈ ಭಾವನೆಯನ್ನು ವಿವರಿಸಲು ಸಾಧ್ಯವಿಲ್ಲ. ಅವರು ನನ್ನನ್ನು ನಡೆಸಿಕೊಂಡ ರೀತಿ ನೋಡಿದರೆ ನಾನು ಜೀವನವನ್ನು ಗೆದ್ದಿದ್ದೇನೆ. ಮುಂದಿನ ಪೀಳಿಗೆಯ ಹೆಣ್ಣುಮಕ್ಕಳಿಗೆ ಹಾದಿಯು ಮುಳ್ಳುಗಳಿಂದ ತುಂಬಿಲ್ಲ. ನಿಮ್ಮ ಹೆಣ್ಣುಮಕ್ಕಳಿಗೆ ಶಿಕ್ಷಣ ನೀಡುವುದು ಎಂದರೆ ಅವಳು ಯಾರೊಂದಿಗಾದರೂ ಓಡಿಹೋಗುತ್ತಾಳೆ ಎಂದು ಭಾವಿಸುತ್ತಾರೆ. ಆದರೆ ನಾನು ಹೇಳುತ್ತೇನೆ, ಬದುಕಲು ಬಿಡಿ, ಓದಲು ಬಿಡಿ” ಎಂದು ಅವರು ಪೋಸ್ಟ್ ಮಾಡಿದ್ದಾರೆ.
ನಾಳೆಯೊಳಗೆ ಚುನಾವಣಾ ಬಾಂಡ್ ಕುರಿತ ಮಾಹಿತಿ ನೀಡಿ: ಎಸ್‌ಬಿಐಗೆ ಸುಪ್ರೀಂ ಆದೇಶ