ವಿಜಯವಾಣಿ ಸುದ್ದಿಜಾಲ ಬೆಂಗಳೂರು
ಸುಧೀರ್ ಅತ್ತಾವರ್ ನಿರ್ದೇಶನದ ಕೊರಗಜ್ಜ ದೈವದ ಕುರಿತ ಸಿನಿಮಾ “ಕೊರಗಜ್ಜ’. ವಿಶೇಷ ಅಂದರೆ ಈ ಸಿನಿಮಾದ ಪ್ರತಿ ಹಂತದಲ್ಲೂ ದೈವಗಳ ಅನುಮತಿ ಪಡೆದೇ ಚಿತ್ರತಂಡ ಮುನ್ನಡೆಯುತ್ತಿದೆ. ಇದೀಗ “ಕೊರಗಜ್ಜ’ ಮೋಷನ್ ಪೋಸ್ಟರ್ ಮತ್ತು ಫಸ್ಟ್ ಲುಕ್ ಬಿಡುಗಡೆಗೆ ರೆಡಿಯಿದ್ದು, ಅದಕ್ಕೂ ದೈವಗಳ ಬಳಿ ಅನುಮತಿ ಪಡೆಯಲಾಗಿದೆ.
“ಕೊರಗಜ್ಜ ದೈವದ ಕಳೆ- ಕಾರ್ಣಿಕ ಮತ್ತು ಪಾವಿತ್ರ್ಯತೆಗೆ ಯಾವುದೇ ಧಕ್ಕೆ ಬಾರದಂತೆ ಫಸ್ಟ್ ಲುಕ್ ವಿನ್ಯಾಸ ಮಾಡಿದ್ದೇವೆ. ಮೊದಲಿಗೆ ಕೊರಗಜ್ಜ, ಗುಳಿಗ ಮತ್ತು ಕಲ್ಲುರ್ಟಿ ದೈವಗಳಿಗೆ ವಿಶೇಷ ಕೋಲಸೇವೆ ನೀಡಿ, ದೈವಗಳ ಸಮಕ್ಷಮದಲ್ಲಿ ಮೋಷನ್ ಪೋಸ್ಟರ್ ಮತ್ತು ಸ್ಟ್ ಲುಕ್ ಪ್ರದರ್ಶಿಸಿ, ಸಾರ್ವಜನಿಕ ಪ್ರದರ್ಶನಕ್ಕೆ ಅನುಮತಿ ಬೇಡಿಕೊಂಡೆವು. ಅದಕ್ಕೆ ದೈವಗಳು ಒಪ್ಪಿಗೆ ನೀಡಿದ್ದಾರೆ. ಜತೆಗೆ ಎಲ್ಲೆಂದರಲ್ಲಿ ಈ ಸ್ಟ್ ಲುಕ್ ಮತ್ತು ಮೋಷನ್ ಪೋಸ್ಟರ್ಗಳನ್ನು ದೈವಕ್ಕೆ ಅಪಚಾರ ಆಗುವ ರೀತಿಯಲ್ಲಿ ಸಾರ್ವಜನಿಕರು ದುರುಪಯೋಗ ಮಾಡಬಾರದು ಎಂದು ಎಚ್ಚರಿಕೆ ನೀಡಿವೆ. ವಿಶೇಷವಾಗಿ ವಿನ್ಯಾಸ ಮಾಡಿರುವ ಪೋಸ್ಟರ್ ಬಿಡುಗಡೆಗೆ ದೈವಗಳು ಒಪ್ಪಿಗೆ ನೀಡಿರದಿದ್ದರೆ, ನಾವು ರಿಲೀಸ್ ಮಾಡುತ್ತಿರಲಿಲ್ಲ’ ಎಂದು ಮಾಹಿತಿ ನೀಡುತ್ತಾರೆ ನಿರ್ದೇಶಕ ಸುಧೀರ್ ಅತ್ತಾವರ್.
ಕೋಲಸೇವೆಯಲ್ಲಿ ಮಾಜಿ ಸಚಿವೆ ಮೋಟಮ್ಮ, ನಟಿ ಭವ್ಯ ಮತ್ತು ಅವರ ಪುತ್ರಿ ಅದಿತಿ, ಸಂಕಲನಕಾರ ವಿದ್ಯಾಧರ್ ಶೆಟ್ಟಿ, ಗಾಯಕ ರಮೇಶ್ ಚಂದ್ರ, ನಾಯಕ ನಟ ಭರತ್ ಸೂರ್ಯ, ಶ್ಲಾಘ್ಯ ಕಮಲಿನಿ ಮತ್ತು ಚಿತ್ರತಂಡದ ಬಹುತೇಕ ಕಲಾವಿದರು ಮತ್ತು ತಂತ್ರಜ್ಞರು ಹಾಜರಿದ್ದರು.