ನಗೋಯಾ: ಹಾಲಿ ಚಾಂಪಿಯನ್ ಭಾರತದ ಪುರುಷರ ಮತ್ತು ಮಹಿಳಾ ತಂಡಗಳು ಏಷ್ಯಾಡ್ (ASIAN GAMES) ಕಬಡ್ಡಿ ಸ್ಪರ್ಧೆಯಲ್ಲಿ ಗುಂಪಿನ ಅಗ್ರಸ್ಥಾನದೊಂದಿಗೆ ಸೆಮಿಫೈನಲ್ಗೇರಿದ್ದು, ಪದಕ ಖಚಿತಪಡಿಸಿಕೊಂಡಿವೆ.
ಭಾರತದ ಪುರುಷರ ತಂಡ ಗುರುವಾರ ನಡೆದ ಎ ಗುಂಪಿನ ಕೊನೆಯ ಪಂದ್ಯದಲ್ಲಿ ಚೀನಾ ತೈಪೆ ವಿರುದ್ಧ 37&21 ಅಂಕಗಳಿಂದ ಗೆಲುವು ಸಾಧಿಸಿತು. ಭಾರತಕ್ಕೆ ಇದು ಸತತ 4ನೇ ಗೆಲುವಾಗಿದೆ. ಭಾರತದ ಪುರುಷರಿಗೆ ಸೆಮೀಸ್ನಲ್ಲಿ ಥಾಯ್ಲೆಂಡ್ ಸವಾಲು ಎದುರಾಗಲಿದೆ. 1990ರ ಏಷ್ಯಾಡ್ಗೆ ಕಬಡ್ಡಿ ಸೇರ್ಪಡೆಗೊಂಡ ಬಳಿಕ 8 ಬಾರಿ ಚಿನ್ನ ಗೆದ್ದಿರುವ ಭಾರತ ಈ ಬಾರಿಯೂ ಪ್ರಾಬಲ್ಯ ಮುಂದುವರಿಸುವ ಹಂಬಲದಲ್ಲಿದೆ. ಬಿ ಗುಂಪಿನಲ್ಲಿದ್ದ ಪಾಕಿಸ್ತಾನ ತಂಡ 3ನೇ ಸ್ಥಾನಿಯಾಗಿ ಲೀಗ್ ಹಂತದಲ್ಲೇ ಹೊರಬಿದ್ದಿತು.
ಭಾರತದ ಮಹಿಳಾ ತಂಡ ತನ್ನ 3ನೇ ಪಂದ್ಯದಲ್ಲಿ ಆತಿಥೇಯ ಜಪಾನ್ ವಿರುದ್ಧ 50&25ರಿಂದ ಗೆಲುವು ಸಾಧಿಸಿತು. ಹ್ಯಾಟ್ರಿಕ್ ಜಯದೊಂದಿಗೆ ಗುಂಪಿನ ಅಗ್ರಸ್ಥಾನ ಭದ್ರಪಡಿಸಿಕೊಂಡಿತು. ಶುಕ್ರವಾರ ನಡೆಯಲಿರುವ ಸೆಮಿಫೈನಲ್ನಲ್ಲಿ ನೇಪಾಳ ತಂಡದ ಸವಾಲು ಎದುರಾಗಲಿದೆ. ಕಬಡ್ಡಿಯಲ್ಲಿ ಸೆಮೀಸ್ನಲ್ಲಿ ಸೋತ ಎರಡೂ ತಂಡಗಳಿಗೆ ಕಂಚಿನ ಪದಕ ನೀಡಲಾಗುತ್ತದೆ.
