ಟೀಮ್​ ಇಂಡಿಯಾ ಪ್ರಮುಖ ಬ್ಯಾಟ್ಸ್​ಮನ್​ಗಳ ವೈಫಲ್ಯ: ಕಿವೀಸ್​ ಎದುರು 2ನೇ ಟೆಸ್ಟ್​ನಲ್ಲೂ ಮುಗ್ಗರಿಸಿ ಸರಣಿ ಕೈಚೆಲ್ಲಿದ ಭಾರತ

ಕ್ರೈಸ್ಟ್​ಚರ್ಚ್​: ಭಾರತೀಯ ಬ್ಯಾಟ್ಸ್​ಮನ್​ಗಳ ಸತತ ಬ್ಯಾಟಿಂಗ್ ವೈಫಲ್ಯದಿಂದ ಆತಿಥೇಯ ನ್ಯೂಜಿಲೆಂಡ್​ ವಿರುದ್ಧದ ಎರಡನೇ ಹಾಗೂ ಅಂತಿಮ ಟೆಸ್ಟ್​ ಪಂದ್ಯದಲ್ಲೂ ಹೀನಾಯವಾಗಿ ಸೋಲುವ ಮೂಲಕ ಟೀಮ್​ ಇಂಡಿಯಾ ಕಿವೀಸ್​ ಎದುರು ಟೆಸ್ಟ್​ ಸರಣಿಯನ್ನು ಕೈಚೆಲ್ಲಿ ಭಾರಿ ಮುಖಭಂಗ ಅನುಭವಿಸಿದೆ. ​

ಶನಿವಾರ ಕ್ರೈಸ್ಟ್​ಚರ್ಚ್​ನ ಹ್ಯಾಗ್ಲೆ ಓವಲ್ ಮೈದಾನದಲ್ಲಿ ಆರಂಭವಾದ ಎರಡನೇ ಟೆಸ್ಟ್​ ಪಂದ್ಯ ಕೇವಲ ಮೂರನೇ ದಿನದಲ್ಲಿ ಅಂತ್ಯಗೊಂಡಿತು. ಟಾಸ್​ ಸೋತು ಮೊದಲನೇ ಇನ್ನಿಂಗ್ಸ್​ ಆರಂಭಿಸಿದ ಭಾರತ 63 ಓವರ್​ಗಳಲ್ಲಿ ತನ್ನೆಲ್ಲಾ ವಿಕೆಟ್​ ಕಳೆದುಕೊಂಡು 242 ರನ್​ ಕಲೆಹಾಕಿತು. ಬಳಿಕ ಮೊದಲ ಇನ್ನಿಂಗ್ಸ್​ ಆರಂಭಿಸಿದ ಕಿವೀಸ್​ ಪಡೆ ಭಾರತೀಯ ಬೌಲರ್​ಗಳ ದಾಳಿಗೆ ತುತ್ತಾಗಿ 73.1 ಓವರ್​ಗಳಲ್ಲಿ 235 ರನ್​ಗೆ ಆಲೌಟ್​ ಆಯಿತು.

ಇದನ್ನೂ ಓದಿ: ಸಾಧಾರಣ ಮೊತ್ತಕ್ಕೆ ಕುಸಿದ ಭಾರತ: ಪೃಥ್ವಿ, ಚೇತೇಶ್ವರ ಪೂಜಾರ, ಹನುಮ ವಿಹಾರಿ ಅರ್ಧಶತಕ

ಏಳು ರನ್​ಗಳ ಅಲ್ಪ ಮುನ್ನೆಡೆಯೊಂದಿಗೆ ಎರಡನೇ ಇನ್ನಿಂಗ್ಸ್​ ಆರಂಭಿಸಿದ ಟೀಮ್​ ಇಂಡಿಯಾ ಮತ್ತೆ ತನ್ನ ಬ್ಯಾಟಿಂಗ್​ ವೈಫಲ್ಯವನ್ನು ಮುಂದುವರಿಸಿತು. ಇದರ ಪರಿಣಾಮವಾಗಿ 46 ಓವರ್​ಗಳಲ್ಲಿ ಎಲ್ಲ ವಿಕೆಟ್​ ಕಳೆದುಕೊಂಡು ಕೇವಲ 124 ರನ್​ ಗಳಿಸಲಷ್ಟೇ ಶಕ್ತವಾಯಿತು.

ಟೀಮ್​ ಇಂಡಿಯಾ ನೀಡಿದ್ದ ಗುರಿ ಬೆನ್ನತ್ತಿದ ಕಿವೀಸ್​ ಪಡೆ ಎರಡನೇ ಇನ್ನಿಂಗ್ಸ್​ನಲ್ಲಿ 36 ಓವರ್​ಗಳಲ್ಲಿ ಕೇವಲ ಮೂರು ವಿಕೆಟ್​ ನಷ್ಟಕ್ಕೆ( ಟಾಮ್​ ಲಾಥಮ್​ 52, ಟಾಮ್​ ಬ್ಲಂಡೆಲ್​ 55 ಮತ್ತು ಕೇನ್​ ವಿಲಿಯಮ್ಶನ್​ 5) 132 ರನ್​ ಗಳಿಸುವ ಮೂಲಕ 7 ವಿಕೆಟ್​ಗಳ ಭರ್ಜರಿ ಗೆಲುವು ದಾಖಲಿಸಿತು. ಕೊನೆಯಲ್ಲಿ ರಾಸ್​ ಟೇಲರ್​(5*) ಹಾಗೂ ಹೆನ್ಸಿ ನಿಕೋಲಸ್​(4*) ಅಜೇಯರಾಗಿ ಉಳಿದರು.

ಇದನ್ನೂ ಓದಿ: ಬೌಲರ್ಸ್ ಶ್ರಮ ವ್ಯರ್ಥಗೊಳಿಸಿದ ಬ್ಯಾಟ್ಸ್​ಮನ್ಸ್; ಕಿವೀಸ್ ಎದುರು ಮುನ್ನಡೆ ಕಂಡರೂ ಲಾಭವಿಲ್ಲ

ಪ್ರಮುಖ ಬ್ಯಾಟ್ಸ್​ಮನ್​ಗಳ ವೈಫಲ್ಯವೇ ಸೋಲಿಗೆ ಕಾರಣ

ನಾಯಕ ವಿರಾಟ್​ ಕೊಹ್ಲಿ ಮೊದಲು ಮತ್ತು ಎರಡನೇ ಇನ್ನಿಂಗ್ಸ್​ನಲ್ಲಿ ಕ್ರಮವಾಗಿ 3 ಮತ್ತು 14 ರನ್​ ಕಲೆ ಹಾಕುವ ಮೂಲಕ ಜವಬ್ದಾರಿಯುತ ಆಟವಾಡಲಿಲ್ಲ. ಸ್ಟಾರ್​ ಆಟಗಾರ ಅಂಜಿಂಕ್ಯ ರಹಾನೆ ಕೂಡ ಎರಡೂ ಇನ್ನಿಂಗ್ಸ್​ನಲ್ಲಿ ಕೇವಲ ಒಂದಕಿಗೆ ತೃಪ್ತಿಪಟ್ಟರು. ಆರಂಭಿಕ ಆಟಗಾರ ಮಯಾಂಕ್​ ಅಗರ್ವಾಲ್​ ಕೂಡ ಸಿಕ್ಕ ಅವಕಾಶ ಉಪಯೋಗಿಸಿಕೊಳ್ಳದೇ ಎರಡೂ ಇನ್ನಿಂಗ್ಸ್​ನಲ್ಲೂ ಕ್ರಮವಾಗಿ 7 ಮತ್ತು 3 ರನ್​ಗೆ ತೃಪ್ತಿಪಟ್ಟುಕೊಂಡರು. ಪೃಥ್ವಿ ಷಾ, ಚೇತೇಶ್ವರ ಪೂಜಾರ ಅವರು ಮೊದಲ ಇನ್ನಿಂಗ್ಸ್​ನಲ್ಲಿ ಅರ್ಧಶತಕ ದಾಖಲಿಸಿದಾದರೂ ಎರಡನೇ ಇನ್ನಿಂಗ್ಸ್​ನಲ್ಲಿ ಮತ್ತೆ ಮುಗ್ಗರಿಸಿದರು. ಟೀಮ್​ ಇಂಡಿಯಾದ ಬೌಲರ್​ಗಳ ಮಾತ್ರ ಉತ್ತಮ ಶ್ರಮ ಹಾಕಿದರು. ಆದರೆ, ಬ್ಯಾಟ್ಸ್​ಮನ್​ಗಳ ವೈಫಲ್ಯವೇ ಹೀನಾಯ ಸೋಲಿಗೆ ಕಾರಣವಾಗಿದೆ. (ಏಜೆನ್ಸೀಸ್​)