ಅಂತರಾಷ್ಟ್ರೀಯ ಕ್ರಿಕೆಟ್‌ಗೆ ಉಸ್ಮಾನ್ ಖವಾಜಾ ಗುಡ್‌ಬೈ: ನಿವೃತ್ತಿ ವೇಳೆ ಸ್ಫೋಟಕ ಹೇಳಿಕೆ! Usman Khawaja

ನವದೆಹಲಿ: (Usman Khawaja ) ಆಸ್ಟ್ರೇಲಿಯಾ ಕ್ರಿಕೆಟ್ ಇತಿಹಾಸದಲ್ಲಿ ವಿಶೇಷ ಸ್ಥಾನ ಪಡೆದಿರುವ ಸ್ಟಾರ್ ಬ್ಯಾಟ್ಸ್‌ಮನ್ ಉಸ್ಮಾನ್ ಖವಾಜಾ ಅಂತರರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದಾರೆ.

ಜನವರಿ 4 ರಂದು ಸಿಡ್ನಿ ಕ್ರಿಕೆಟ್ ಮೈದಾನದಲ್ಲಿ (SCG) ಪ್ರಾರಂಭವಾಗುವ ಐದನೇ ಆಶಸ್ ಟೆಸ್ಟ್ ನಂತರ ನಿವೃತ್ತಿ ಹೊಂದುವುದಾಗಿ ಅನುಭವಿ ಆಟಗಾರ ದೃಢಪಡಿಸಿದ್ದಾರೆ. ತಮ್ಮ 15 ವರ್ಷಗಳ ವೃತ್ತಿಜೀವನದಲ್ಲಿ ಎದುರಿಸಿದ ತಾರತಮ್ಯ ಮತ್ತು ಜನಾಂಗೀಯತೆಯ ಬಗ್ಗೆ ವಿಷಾದ ವ್ಯಕ್ತಪಡಿಸಿದ್ದಾರೆ.

ಪಾಕಿಸ್ತಾನದಲ್ಲಿ ಜನಿಸಿ ಆಸ್ಟ್ರೇಲಿಯಾಕ್ಕೆ ವಲಸೆ ಬಂದ ಖವಾಜಾ, ಆ ದೇಶಕ್ಕಾಗಿ ಆಡಿದ ಮೊದಲ ಮುಸ್ಲಿಂ ಆಟಗಾರನಾಗುವ ಮೂಲಕ ದಾಖಲೆಯನ್ನು ಸೃಷ್ಟಿಸಿದರು.

ಉಸ್ಮಾನ್​​ ಖವಾಜ್​​ ಮಾತನಾಡಿ, "ನಾನು ಪಾಕಿಸ್ತಾನದಿಂದ ಬಂದ ಒಬ್ಬ ಮುಸ್ಲಿಂ ಹುಡುಗ. ಆಸ್ಟ್ರೇಲಿಯಾ ಪರ ಆಡಲು ಸಾಧ್ಯವಿಲ್ಲ ಎಂದು ಹಲವರು ಹೇಳಿದ್ದರು. ಆದರೆ ಇಂದು ನಾನು ಇಲ್ಲಿ ನಿಂತಿದ್ದೇನೆ. ಇದು ಕೇವಲ ನನ್ನ ಸಾಧನೆಯಲ್ಲ, ಕನಸು ಕಾಣುವ ಸಾವಿರಾರು ಮಕ್ಕಳಿಗೆ ಇದು ಸ್ಫೂರ್ತಿ. ನೀವು ನಿಮ್ಮ ಕನಸಿನ ಮೇಲೆ ನಂಬಿಕೆ ಇಟ್ಟರೆ, ನೀವು ಏನನ್ನಾದರೂ ಸಾಧಿಸಬಹುದ" ಎಂದು ಭಾವುಕರಾದರು.

ನನಗೆ ಬೆನ್ನುನೋವಾದಾಗ, ಅದು ನನ್ನ ನಿಯಂತ್ರಣದಲ್ಲಿ ಇರಲಿಲ್ಲ. ಆದರೆ ಮಾಧ್ಯಮಗಳು ಮತ್ತು ಮಾಜಿ ಆಟಗಾರರು ನನ್ನನ್ನು ಗುರಿಯಾಗಿಸಿಕೊಂಡು ಟೀಕಿಸಿದರು. ನಾನು ಸೋಮಾರಿ ಮತ್ತು ತಂಡಕ್ಕೆ ಬದ್ಧನಲ್ಲ ಎಂದು ಹೇಳಿದರು. ಪಾಕಿಸ್ತಾನಿಗಳು ಅಥವಾ ಇತರ ಬಣ್ಣದ ಆಟಗಾರರು ಸ್ವಾರ್ಥಿಗಳು ಮತ್ತು ತಂಡಕ್ಕಾಗಿ ಆಡುವುದಿಲ್ಲ ಎಂಬ ಹಳೆಯ ಶೈಲಿಯ ಕಲ್ಪನೆಗಳನ್ನು ಅವರು ನನ್ನ ಮೇಲೆ ಆರೋಪಿಸಿದರು. ಈ ಘಟನೆಯು ನಾವು ಇನ್ನೂ ಆ ಜನಾಂಗೀಯ ಮನಸ್ಥಿತಿಯಿಂದ ಹೊರಬಂದಿಲ್ಲ ಎಂದು ನನಗೆ ಅರಿವಾಯಿತು" ಎಂದು ತಿಳಿಸಿದ್ದಾರೆ.

ನಿವೃತ್ತಿ ಯಾವಾಗಲೂ ಘನತೆಯಿಂದ ಕೂಡಿರಬೇಕು. ನನ್ನ ತವರು ನೆಲವಾದ ಸಿಡ್ನಿಯಲ್ಲಿ ನಿವೃತ್ತಿ ಹೊಂದಲು ನನಗೆ ಹೆಮ್ಮೆಯಾಗುತ್ತದೆ" ಎಂದು ಖವಾಜಾ ಹೇಳಿದರು.

೨೦೧೧ರಲ್ಲಿ ಇಂಗ್ಲೆಂಡ್ ವಿರುದ್ಧ ಸಿಡ್ನಿಯಲ್ಲಿ ಪಾದಾರ್ಪಣೆ ಮಾಡಿದ ಖವಾಜಾ, ಅದೇ ತಂಡದ ವಿರುದ್ಧ ಅದೇ ಮೈದಾನದಲ್ಲಿ ತಮ್ಮ ವೃತ್ತಿಜೀವನವನ್ನು ಕೊನೆಗೊಳಿಸಲಿದ್ದಾರೆ.