ಇಷ್ಟಾದರೂ ಬುದ್ಧಿ ಬಂದಿಲ್ಲ... 14.2 ಕೋಟಿ ರೂ. ಕೊಟ್ಟು ಖರೀದಿಸಿದ್ದು ಯಾವ ಖುಷಿಗೆ? ಸಿಎಸ್​ಕೆ ಸೋಲಿಗೆ ಇದೂ ಒಂದು ಕಾರಣ

CSK vs RCB: ನಿನ್ನೆ (ಏ.05) ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಚೆನ್ನೈ ಸೂಪರ್​ ಕಿಂಗ್ಸ್​ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ನಡುವಿನ ಐಪಿಎಲ್​ 19ನೇ ಆವೃತ್ತಿಯ 11ನೇ ಪಂದ್ಯದಲ್ಲಿ ಆರ್​ಸಿಬಿ 43 ರನ್​ಗಳ ಭರ್ಜರಿ ಜಯ ಸಾಧಿಸಿತು. ಮತ್ತೊಂದೆಡೆ, ರುತುರಾಜ್​ ಪಡೆಗೆ ಇದು ಸತತ ಮೂರನೇ ಹೀನಾಯ ಸೋಲು.    

ಈ ಬಾರಿಯ ಐಪಿಎಲ್ 2026ರ ಟೂರ್ನಿಯಲ್ಲಿ ಚೆನ್ನೈ ಸೂಪರ್​ ಕಿಂಗ್ಸ್​ ಆಡಿರುವ ಮೂರು ಪಂದ್ಯಗಳಲ್ಲಿ ಬ್ಯಾಕ್​ ಟು ಬ್ಯಾಕ್​ ಸೋಲುಂಡಿದೆಯೇ ಹೊರತು ಒಂದೇ ಒಂದು ಗೆಲುವು ನೋಡುವಲ್ಲಿ ಯಶಸ್ವಿಯಾಗಿಲ್ಲ. ತನ್ನ ಮೂರನೇ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ವಿರುದ್ಧ 43 ರನ್‌ಗಳಿಂದ ಸೋತ ರುತುರಾಜ್​ ಗಾಯಕ್ವಾಡ್​ ಪಡೆ, ತಮ್ಮ ಅಪಾರ ಅಭಿಮಾನಿಗಳ ಬಳಗವನ್ನು ಸಂಪೂರ್ಣವಾಗಿ ನಿರಾಶೆಗೊಳಿಸಿದೆ.

ಬೌಲಿಂಗ್, ಬ್ಯಾಟಿಂಗ್ ಮತ್ತು ಫೀಲ್ಡಿಂಗ್ ಎಲ್ಲದರಲ್ಲೂ ತೀರ ಕಳಪೆ ಪ್ರದರ್ಶನ ನೀಡುತ್ತಿರುವ ಚೆನ್ನೈ ಸೂಪರ್ ಕಿಂಗ್ಸ್​​, ರುತುರಾಜ್​ ಗಾಯಕ್ವಾಡ್​ ಅವರಿಂದ ಉತ್ತಮ ಬ್ಯಾಟಿಂಗ್ ಪ್ರದರ್ಶನ ಮತ್ತು ನಾಯಕತ್ವವನ್ನು ನೋಡುತ್ತಿಲ್ಲ. ಇದು ತಂಡದ ಸೋಲಿಗೆ ಮೂಲ ಕಾರಣ. ಇದರೊಟ್ಟಿಗೆ ಭಾರೀ ಭರವಸೆಯನ್ನು ಮೂಡಿಸಿದ್ದ ಸಂಜು ಸ್ಯಾಮ್ಸನ್​ ಕೂಡ ಸತತವಾಗಿ ಫ್ಲಾಪ್​ ಶೋ ಮುಂದುವರಿಸಿರುವುದು ಸಿಎಸ್​ಕೆ ಅಭಿಮಾನಿಗಳನ್ನು ಮಂಕಾಗಿಸಿದೆ.

ಐಪಿಎಲ್ ಇತಿಹಾಸದಲ್ಲಿ ಐದು ಬಾರಿ ಚಾಂಪಿಯನ್ಸ್ ಪಟ್ಟ ಅಲಂಕರಿಸಿರುವ ಚೆನ್ನೈ ಸೂಪರ್ ಕಿಂಗ್ಸ್​, ಅತ್ಯಂತ ಬಲಿಷ್ಠ ಫ್ರಾಂಚೈಸಿ ಎಂದೇ ಕ್ರಿಕೆಟ್​ ಅಭಿಮಾನಿಗಳಲ್ಲಿ ಬೇರೂರಿದೆ. ಹೀಗಿರುವಾಗ, ಅಂತಹ ಒಂದು ತಂಡದಿಂದಲೇ ಈ ಮಟ್ಟಿಗಿನ ಕಳಪೆ ಪ್ರದರ್ಶನ ಬರುತ್ತಿರುವುದು ಆರ್​ಸಿಬಿ ಅಭಿಮಾನಿಗಳನ್ನು ಬಿಟ್ಟರೆ ಇನ್ಯಾರಿಂದಲೂ ಒಪ್ಪಿಕೊಳ್ಳಲು ಆಗುತ್ತಿಲ್ಲ. ಕ್ಯಾಚ್​ ಬಿಡುವ ದುಬೆ, ಭರವಸೆಯ ಓಪನರ್​ಗಳಿಂದಲೇ ಫ್ಲಾಪ್​ ಶೋ. ಮತ್ತೊಂದೆಡೆ, ಬೌಲರ್​ಗಳು ಕೂಡ ಕಮಾಲ್​ ಮಾಡುತ್ತಿಲ್ಲ. ಇದೆಲ್ಲದಕ್ಕಿಂತ ಹೆಚ್ಚಾಗಿ, 14.2 ಕೋಟಿ ರೂ. ಕೊಟ್ಟು ಖರೀದಿಸಿದ ಆಟಗಾರನಿಗೆ ಬೌಲಿಂಗ್ ಮಾಡಲು ಅವಕಾಶ ಕೊಡದಿರುವುದು ಹಲವರಲ್ಲಿ ಗೊಂದಲ ಮೂಡಿಸಿದೆ.  ​

ರವೀಂದ್ರ ಜಡೇಜಾರನ್ನು ರಾಜಸ್ಥಾನ ರಾಯಲ್ಸ್​ಗೆ ಟ್ರೇಡ್​ ಮಾಡಿದ ಸಿಎಸ್​ಕೆ, ಅವರ ಸ್ಥಾನದಲ್ಲಿ ಮತ್ತೊಬ್ಬ ಆಲ್​ರೌಂಡರ್​ ನೋಡಲು ಬಯಸಿತು. ಹೀಗಾಗಿಯೇ, ಉತ್ತರ ಪ್ರದೇಶದ ಅನ್​ಕ್ಯಾಪ್ಡ್​ ಆಲ್​ರೌಂಡರ್​ ಪ್ರಶಾಂತ್ ವೀರ್​ ಅವರನ್ನು ತಂಡಕ್ಕೆ ಕರೆದುಕೊಂಡಿತು. ಒಬ್ಬ ಎಡಗೈ ಸ್ಪಿನ್ನರ್ ಅನ್ನೇ ಖರೀದಿಸಿರುವ ಫ್ರಾಂಚೈಸಿ, ಅವರಿಂದ ಕೇವಲ ಬ್ಯಾಟಿಂಗ್ ಮಾಡಿಸುತ್ತಿದೆಯೇ ವಿನಃ ಬೌಲಿಂಗ್ ಮಾಡಲು ಅವಕಾಶ ಕೊಡುತ್ತಿಲ್ಲ. ​ಇದು ತಂಡದ ಸೋಲಿಗೆ ಇನ್ನೊಂದು ಬಲವಾದ ಕಾರಣ. ಅವಕಾಶ ಕೊಡದೆ ಹೀಗೆ ಆಡಿದರೆ, ಮುಂದಿನ ದಿನಗಳಲ್ಲಿ ಸಿಎಸ್​ಕೆ ಶೀಘ್ರವೇ ಲೀಗ್​ನಿಂದ ಹೊರಬೀಳುವುದು ಖಚಿತ,(ಏಜೆನ್ಸೀಸ್).