Mumbai Indians: ಮುಂಬರುವ 2027ರ ಐಪಿಎಲ್ಗೂ ಮುನ್ನ ಐದು ಬಾರಿಯ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ತಂಡದಲ್ಲಿ ಮಹತ್ವದ ಬದಲಾವಣೆಗಳು ನಡೆಯುತ್ತಿವೆ. ತಂಡದ ಯಶಸ್ವಿ ಕೋಚ್‌ಗಳಲ್ಲಿ ಒಬ್ಬರಾದ ಮಹೇಲಾ ಜಯವರ್ಧನೆ ಹಾಗೂ ಮುಂಬೈ ಫ್ರಾಂಚೈಸಿ ಪರಸ್ಪರ ಒಪ್ಪಂದದ ಮೇರೆಗೆ ಬೇರ್ಪಡಲು ನಿರ್ಧರಿಸಿದ್ದು, ಈ ನಿರ್ಗಮನವು ತಂಡದಲ್ಲಿ ದೊಡ್ಡ ಮಟ್ಟದ ಬದಲಾವಣೆಯ ಮುನ್ಸೂಚನೆಯಾಗಿದೆ. ಇದರೊಂದಿಗೆ ತಂಡದ ನಾಯಕತ್ವದ ಕುರಿತಾಗಿಯೂ ಹೊಸ ಚರ್ಚೆಗಳು ಮುನ್ನೆಲೆಗೆ ಬಂದಿದ್ದು, ರೋಹಿತ್ ಶರ್ಮಾ ಅವರು ಮತ್ತೆ ಮುಂಬೈ ತಂಡದ ನಾಯಕನಾಗಿ ಕಣಕ್ಕಿಳಿಯಬಹುದು ಎಂಬ ಊಹಾಪೋಹಗಳು ಜೋರಾಗಿವೆ.
ಮಹೇಲಾ ಜಯವರ್ಧನೆ ನಿರ್ಗಮನದೊಂದಿಗೆ ಮುಂಬೈ ಇಂಡಿಯನ್ಸ್ ಜೊತೆಗಿನ ಅವರ ಸುದೀರ್ಘ ಹಾಗೂ ಯಶಸ್ವಿ ಅಧ್ಯಾಯಕ್ಕೆ ತೆರೆಬಿದ್ದಿದೆ. ಈ ಕುರಿತು ಪ್ರತಿಕ್ರಿಯಿಸಿರುವ ಮಹೇಲಾ, ಮುಂಬೈ ಇಂಡಿಯನ್ಸ್ ಕಳೆದ ಒಂದು ದಶಕದಿಂದ ನನ್ನ ಪ್ರಯಾಣದ ಅತ್ಯಂತ ವಿಶೇಷ ಭಾಗವಾಗಿದೆ. ಆಟಗಾರರು, ಕೋಚಿಂಗ್ ಸಿಬ್ಬಂದಿ, ಒನ್ ಫ್ಯಾಮಿಲಿ ಅಭಿಮಾನಿಗಳ ಬೆಂಬಲ ನನ್ನ ಜೀವನದಲ್ಲಿ ಸದಾ ಸ್ಮರಣೀಯ ಎಂದು ಭಾವನಾತ್ಮಕವಾಗಿ ಬರೆದುಕೊಂಡಿದ್ದಾರೆ. ಹಾಗೆಯೇ, ಮುಂಬೈ ಫ್ರಾಂಚೈಸಿ ಮಾಲಿಕರಾದ ನೀತಾ ಅಂಬಾನಿ ಮಾತನಾಡಿ, ತಂಡಕ್ಕೆ ಜಯವರ್ಧನೆ ನೀಡಿದ ಶಾಂತಿಯುತ ನಾಯಕತ್ವ, ಪ್ರಾಮಾಣಿಕತೆ ಮತ್ತು ಅಪಾರ ಕೊಡುಗೆಗೆ ಕೃತಜ್ಞತೆ ಸಲ್ಲಿಸಿದ್ದಾರೆ.
