ಮಹಿಳೆಯರ ರೈಸಿಂಗ್​ ಸ್ಟಾರ್ಸ್​ ಏಷ್ಯಾಕಪ್​ ಟಿ20: ಸೆಮಿಫೈನಲ್​ಗೇರಿದ ಭಾರತ ಎ

ಟೆರ್ಡ್​ಥಾಯಿ ಕ್ರಿಕೆಟ್​ ಗ್ರೌಂಡ್​ನಲ್ಲಿ ಕಾದಾಟದಲ್ಲಿ ಭಾರತ ತಂಡ ಟಾಸ್​ ಗೆದ್ದು ಫೀಲ್ಡಿಂಗ್​ ಆಯ್ದುಕೊಂಡಿತು. ಮೊದಲ ಬ್ಯಾಟಿಂಗ್​ಗೆ ಇಳಿದ ನೇಪಾಳ, ಭಾರತೀಯ ಸ್ಪಿನ್​ ದಾಳಿ ಎದುರು ರನ್​ ಗಳಿಸಲು ತಿಣುಕಾಡಿ 18 ಓವರ್​ಗಳಲ್ಲಿ 78 ರನ್​ಗಳಿಗೆ ಸರ್ವಪತನ ಕಂಡಿತು. ಪ್ರತಿಯಾಗಿ ಭಾರತ 7.5 ಓವರ್​ಗಳಲ್ಲೇ 3 ವಿಕೆಟ್​ಗೆ 82 ರನ್​ ಗಳಿಸಿ, ಇನ್ನೂ 73 ಎಸೆತ ಬಾಕಿ ಇರುವಂತೆ ಜಯಿಸಿತು.

ಟೂರ್ನಿಯ ಮೊದಲ ಪಂದ್ಯದಲ್ಲಿ ಯುಎಇ ವಿರುದ್ಧ ಆಘಾತ ಎದುರಿಸಿದ್ದ ಭಾರತ, ನಂತರ ಸತತ 2 ಜಯದೊಂದಿಗೆ ಪುಟಿದೆದ್ದಿದೆ. ಈ ಮೂಲಕ ಭಾರತ 4 ಅಂಕ ಮತ್ತು +3.042 ರನ್​ರೇಟ್​ನೊಂದಿಗೆ ಎ ಗುಂಪಿನಲ್ಲಿ ಅಗ್ರಸ್ಥಾನಕ್ಕೇರಿದರೆ, ಯುಎಇ ವಿರುದ್ಧ ಗೆದ್ದ ಪಾಕ್​ 4 ಅಂಕ ಗಳಿಸಿದರೂ, ರನ್​ರೇಟ್​ನಲ್ಲಿ(0.457) ಹಿಂದೆ ಬಿದ್ದು, ಗುಂಪಿನ 2ನೇ ಸ್ಥಾನದೊಂದಿಗೆ ಉಪಾಂತ್ಯಕ್ಕೇರಿತು. ಯುಎಇ ಕೂಡ 4 ಅಂಕ ಗಳಿಸಿದರೂ, ಕಳಪೆ ರನ್​ರೇಟ್​ನಿಂದಾಗಿ (-0.765) ಹೊರಬಿದ್ದಿತು.

ನೇಪಾಳ: 18 ಓವರ್​ಗಳಲ್ಲಿ 78 (ಬಿಂದು ರಾವಲ್​ 11, ಸಂಜಾನಾ 22, ಪೂಜಾ 10, ರುಬಿ 12, ತನುಜಾ 12ಕ್ಕೆ 4, ರಾಧಾ 17ಕ್ಕೆ 2, ಮಿನ್ನು ಮಣಿ 8ಕ್ಕೆ 3), ಭಾರತ ಎ: 7.5 ಓವರ್​ಗಳಲ್ಲಿ 3 ವಿಕೆಟ್​ಗೆ 82 (ವೃಂದಾ 39*, ಅನುಷ್ಕಾ 10, ತೇಜಲ್​ 18, ಮನೀಷಾ 28ಕ್ಕೆ 1, ಸೀತಾ ರಾಣಾ 9ಕ್ಕೆ 1), ಪಂದ್ಯಶ್ರೇಷ್ಠ: ತನುಜಾ ಕನ್ವರ್​.

ಭಾರತ ತಂಡ ಇನ್ನು ಶುಕ್ರವಾರ ನಡೆಯಲಿರುವ ಮೊದಲ ಸೆಮಿಫೈನಲ್​ ಪಂದ್ಯದಲ್ಲಿ ಶ್ರೀಲಂಕಾ ಅಥವಾ ಥಾಯ್ಲೆಂಡ್​ ತಂಡವನ್ನು ಎದುರಿಸಲಿದೆ. ಲಂಕಾ-ಥಾಯ್ಲೆಂಡ್​ ನಡುವೆ ಬುಧವಾರ ಬಿ ಗುಂಪಿನ ಕೊನೇ ಲೀಗ್​ ಪಂದ್ಯ ನಡೆಯಲಿದ್ದು, ಇದರಲ್ಲಿ ಗೆದ್ದ ತಂಡ ಭಾರತಕ್ಕೆ ಎದುರಾಳಿಯಾಗಲಿದೆ. ಬಾಂಗ್ಲಾದೇಶ ತಂಡ ಬಿ ಗುಂಪಿನಲ್ಲಿ ಅಗ್ರಸ್ಥಾನ ಪಡೆಯುವ ನಿರೀಕ್ಷೆ ಇದ್ದು, 2ನೇ ಸೆಮೀಸ್​ನಲ್ಲಿ ಪಾಕಿಸ್ತಾನಕ್ಕೆ ಎದುರಾಳಿಯಾಗಲಿದೆ.