ಈಸ್ಟ್ಲಂಡನ್: ಆತಿಥೇಯ ತಂಡದ ಸರ್ವಾಂಗೀಣ ನಿರ್ವಹಣೆ ಎದುರು ತಲೆಬಾಗಿದ ಭಾರತ ತಂಡ 19 ವಯೋಮಿತಿ ತಂಡಗಳ ಏಕದಿನ ಸರಣಿಯ 3ನೇ ಹಾಗೂ ಅಂತಿಮ ಪಂದ್ಯದಲ್ಲಿ 5 ವಿಕೆಟ್ಗಳಿಂದ ಶರಣಾಯಿತು. ಇದರಿಂದಾಗಿ ಕ್ಲೀನ್ಸ್ವೀಪ್ ಅವಕಾಶ ತಪ್ಪಿಸಿಕೊಂಡ ಭಾರತ, 2-1ರಿಂದ ಸರಣಿ ವಶಪಡಿಸಿಕೊಂಡಿತು. ಆರಂಭಿಕ ಎರಡೂ ಪಂದ್ಯಗಳಲ್ಲಿ ಭಾರತ ಜಯ ದಾಖಲಿಸಿತ್ತು. ಇದರೊಂದಿಗೆ ಭಾರತ ಜನವರಿ 17ರಂದು ಆರಂಭವಾಗಲಿರುವ ಕಿರಿಯರ ವಿಶ್ವಕಪ್ಗೆ ಭರ್ಜರಿ ಸಿದ್ಧತೆ ಕೈಗೊಂಡಿತು.
ಬುಫಾಲೊ ಪಾರ್ಕ್ನಲ್ಲಿ ಸೋಮವಾರ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ತಂಡ, ನಾಯಕ ಪ್ರಿಯಂ ಗಾರ್ಗ್ (52 ರನ್, 76 ಎಸೆತ, 6 ಬೌಂಡರಿ) ಅರ್ಧಶತಕ ನೆರವಿನಿಂದ 8 ವಿಕೆಟ್ಗೆ 192 ರನ್ ಪೇರಿಸಿತು. ಪ್ರತಿಯಾಗಿ ದಕ್ಷಿಣ ಆಫ್ರಿಕಾ ತಂಡ, ಜೊನಾಥನ್ ಬರ್ಡ್ (88*ರನ್, 121 ಎಸೆತ, 9 ಬೌಂಡರಿ, 1 ಸಿಕ್ಸರ್) ಏಕಾಂಗಿ ಹೋರಾಟದ ಫಲವಾಗಿ 48.2 ಓವರ್ಗಳಲ್ಲಿ 5 ವಿಕೆಟ್ಗೆ 193 ರನ್ ಗಳಿಸಿ ಜಯಿಸಿತು.
ಭಾರತ ತಂಡ ಇನ್ನು ವಿಶ್ವಕಪ್ಗೆ ಮುನ್ನ ಜನವರಿ 3 ರಿಂದ 9ರವರೆಗೆ ಆತಿಥೇಯ ದಕ್ಷಿಣ ಆಫ್ರಿಕಾ, ನ್ಯೂಜಿ ಲೆಂಡ್ ಮತ್ತು ಜಿಂಬಾಬ್ವೆ ಒಳಗೊಂಡ ಚತುಷ್ಕೋನ ಸರಣಿಯಲ್ಲಿ ಆಡಲಿದೆ. ಭಾರತ: 8 ವಿಕೆಟ್ಗೆ 192 (ಪ್ರಿಯಂ ಗಾರ್ಗ್ 52, ತಿಲಕ್ ವರ್ಮ 25, ವಿದ್ಯಾಧರ್ ಪಾಟೀಲ್ 15, ಆಚೀಲೆ 46ಕ್ಕೆ 2, ಮೊಲೆಸ್ಟೇನ್ 36ಕ್ಕೆ 2), ದಕ್ಷಿಣ ಆಫ್ರಿಕಾ: 48.2 ಓವರ್ಗಳಲ್ಲಿ 5 ವಿಕೆಟ್ಗೆ 193 (ಜೊನಾಥನ್ ಬರ್ಡ್ 88*, ಜಾಕ್ ಲೀಸ್ 31, ಲೋವ್ 29, ಯಶಸ್ವಿ ಜೈಸ್ವಾಲ್ 41ಕ್ಕೆ 2, ಆಕಾಶ್ ಸಿಂಗ್ 23ಕ್ಕೆ 1, ದಿವ್ಯಾಂಶ್ ಸಕ್ಸೆನಾ 18ಕ್ಕೆ 1). -ಏಜೆನ್ಸೀಸ್