Amrutha Anjan Review - ವೈರಲ್​ ಸ್ಟಾರ್​ಗಳ ಟ್ರೆಂಡಿಂಗ್​ ಲವ್​, ಹ್ಯಾಶ್​ಟ್ಯಾಗ್​ ಸಂದೇಶ

Amrutha Anjan Review - "ಅಮೃತ ಅಂಜನ್​' ಮೂಲಕ 6 ಇಂಚು ಮೊಬೈಲ್​ ಸ್ಕ್ರೀನ್​ನಿಂದ 60 ಅಡಿ ಬಿಗ್​ಸ್ಕ್ರೀನ್​ಗೆ ಯೂಟ್ಯೂಬ್​ ಸ್ಟಾರ್​ಗಳು ದಂಡಯಾತ್ರೆ ಹೊರಟಿದ್ದಾರೆ. ಜ್ಯೋತಿರಾವ್​ ಮೋಹಿತ್​ ನಿರ್ದೇಶನದ "ಅಮೃತಾಂಜನ್​' ವಿಡಿಯೋಗಳು ಯೂಟ್ಯೂಬ್​ನಲ್ಲಿ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡಿದ್ದವು. ಇದೀಗ ಅದೇ ಕಾನ್ಸೆಪ್ಟ್​ನಲ್ಲಿ ವೈರಲ್​ ಸ್ಟಾರ್​ಗಳಾದ ಸುಧಾಕರ್​ ಗೌಡ, ಪಾಯಲ್​ ಚಂಗಪ್ಪ, ಗೌರವ್​ ಶೆಟ್ಟಿ, ಶ್ರೀಭವ್ಯ, ಕಾರ್ತಿಕ್​, ಪಲ್ಲವಿ ಜತೆ ಈ ರೊಮ್ಯಾಂಟಿಕ್​ ಕಾಮಿಡಿ ಸಿನಿಮಾ ಮಾಡಿದ್ದಾರೆ. ವಿಶೇಷ ಅಂದರೆ ಹಿರಿತೆರೆಗೆ ಹೊರಟಿರುವ ಈ ಕಿರುತೆರೆ ತಂಡಕ್ಕೆ ಖುದ್ದು ನಟ ಯಶ್​ ಜಾಲತಾಣದಲ್ಲಿ ಶುಭ ಹಾರೈಸಿದ್ದಾರೆ. ಹಾಗಾದರೆ ಹೇಗಿದೆ ಈ "ಅಮೃತ ಅಂಜನ'?

ಆತ ಜಗನ್​ ರೈ ಮೋಹನ್​ (ಸುಧಾಕರ್​). ಕಾರ್ಕಳದ ಕಡು ಬಡ ಕುಟುಂಬದ ಹುಡುಗ. ಅಪ್ಪ (ನವೀನ್​ ಪಡೀಲ್​) ಕುಡುಕ, ಮಗ ತರಲೆ. ಶಾಲೆಯಲ್ಲಿ ಟೀಚರ್​ನೇ ಎದುರು ಹಾಕಿಕೊಳ್ಳುವ ಜಗನ್​ಗೆ ಟಿಸಿ ಕೊಟ್ಟು ಕಳುಹಿಸುತ್ತಾರೆ. ಕೊನೆಗೆ ದೂರ ಸಿಟಿಯಲ್ಲಿ ಹಾಸ್ಟೆಲ್​ ಸೇರುತ್ತಾನೆ. ಶಾಲೆ ಮುಗಿಸಿ ಎಂಜಿನಿಯರಿಂಗ್​ ಕಾಲೇಜಿಗೆ ಹೋಗುವ ಜಗನ್​ಗೆ ವಿವಾಹಿತ ಐಟಿ ಉದ್ಯೋಗಿ ಗೌರವ್​ ಮತ್ತು ಉಂಡಾಡಿ ಗುಂಡನಂತೆ ಕಂಠಪೂರ್ತಿ ಕುಡಿದು ಓಡಾಡಿಕೊಂಡಿರುವ ಉಮೇಶ್​ (ಕಾರ್ತಿಕ್​) ಗೆಳೆಯರು. ಸಂಜೆ ಮೇಲೆ ಸಭೆ ಸೇರಿ ಜೀವನದ ಆಗುಹೋಗುಗಳು, ಕಷ್ಟ&ಸುಖಗಳ ಬಗ್ಗೆ ಮಾತನಾಡುವುದು ಅವರ ರೂಢಿ. ಅದೇ ಸಮಯದಲ್ಲಿ ಆಗಷ್ಟೆ ಬ್ರೇಕಪ್​ ಆದ ಉರಿ (ಪಾಯಲ್​) ಮೇಲೆ ಜಗನ್​ಗೆ ಪ್ರೀತಿ ಉಕ್ಕುತ್ತದೆ. ಆಕೆಯೋ ಐೋನ್​, ಹೋಟೆಲ್​, ಓಡಾಟ ಅಂತ ಜಗನ್​ನ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿಸಿ, ಬ್ರೇಕಪ್​ ಎಂದುಬಿಡುತ್ತಾಳೆ. ಮುಂದೆ? ಜಗನ್​ ಸಾಲದ ಜಗತ್ತಿನಿಂದ ಪಾರಾಗುತ್ತಾನಾ? ಪ್ರೀತಿಯ ಜಗತ್ತಿಗೆ ಮರಳುತ್ತಾನಾ? "ಅಮೃತ ಅಂಜನ್​' ನೋಡಿ.

ಚಿತ್ರದಲ್ಲಿ ನಗಿಸುವುದರ ಜತೆ ಜತೆಗೆ ಉತ್ತಮ ಸಂದೇಶಗಳನ್ನೂ ದಾಟಿಸಲು ಯತ್ನಿಸಿದ್ದಾರೆ ನಿರ್ದೇಶಕ ಮೋಹಿತ್​. ಯೂಟ್ಯೂಬ್​ನಲ್ಲಿ ಬಂದಿರುವ ಕೆಲ ಸನ್ನಿವೇಶಗಳನ್ನು ಚಿತ್ರದಲ್ಲಿ ಮತ್ತೆ ಬಳಸಿಕೊಳ್ಳಲಾಗಿದೆ. 153 ನಿಮಿಷಗಳ ಈ ಸಿನಿಮಾ ಸುದೀರ್ ಅಂತನ್ನಿಸಿದರೂ ಕಲಾವಿದರ ಪಾರ್ಮೆನ್ಸ್​, ಕಾಮಿಡಿ ಕಚಗುಳಿ ಬೋರ್​ ಆಗಲು ಬಿಡುವುದಿಲ್ಲ. ಹೀಗಾಗಿಯೇ "ಅಮೃತ ಅಂಜನ್​'ಅನ್ನು ಒಮ್ಮೆ ನೋಡಲಡ್ಡಿಯಿಲ್ಲ.