Virat Kohli controversy: ಕ್ರಿಕೆಟಿಗ ವಿರಾಟ್ ಕೊಹ್ಲಿ ಹಾಗೂ ಅವರ ಪತ್ನಿ ಅನುಷ್ಕಾ ಶರ್ಮಾ ವೃಂದಾವನದ ಆಧ್ಯಾತ್ಮಿಕ ಗುರು ಪ್ರೇಮಾನಂದ ಮಹಾರಾಜ್ ಅವರನ್ನು ಹಲವು ಬಾರಿ ಭೇಟಿ ಮಾಡಿದ್ದಾರೆ. ಆದರೆ ಇದೀಗ ಇದೇ ಭೇಟಿಯ ವಿಚಾರ 5 ಕೋಟಿ ರೂ. ಆರೋಪದಿಂದಾಗಿ ಭಾರೀ ಚರ್ಚೆಗೆ ಬಂದಿದೆ.
ಇನ್ನು, ಭಕ್ತಿ, ಸಂಬಂಧ, ನಂಬಿಕೆ ಹಾಗೂ ಜೀವನದ ಹಲವು ವಿಚಾರಗಳ ಬಗ್ಗೆ ಪ್ರವಚನ ನೀಡುವ ಪ್ರೇಮಾನಂದ ಮಹಾರಾಜ್ ಅವರಿಗೆ ದೇಶಾದ್ಯಂತ ದೊಡ್ಡ ಸಂಖ್ಯೆಯಲ್ಲಿ ಭಕ್ತರಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲೂ ಅವರ ಪ್ರವಚನಗಳು ಸಾಕಷ್ಟು ಜನಪ್ರಿಯವಾಗಿವೆ.
ವಿರಾಟ್-ಅನುಷ್ಕಾ ಹಲವು ಬಾರಿ ಭೇಟಿ
ವಿರಾಟ್ ಕೊಹ್ಲಿ ಮತ್ತು ಅನುಷ್ಕಾ ಶರ್ಮಾ ವೃಂದಾವನಕ್ಕೆ ತೆರಳಿ ಪ್ರೇಮಾನಂದ ಮಹಾರಾಜ್ ಅವರನ್ನು ಹಲವು ಬಾರಿ ಭೇಟಿ ಮಾಡಿದ್ದಾರೆ. ಇದುವರೆಗೆ ಈ ಭೇಟಿಗಳನ್ನು ದಂಪತಿಯ ವೈಯಕ್ತಿಕ ಆಧ್ಯಾತ್ಮಿಕ ಭೇಟಿಗಳಾಗಿಯೇ ನೋಡಲಾಗಿತ್ತು. ಆದರೆ ಇದೀಗ ಆಶ್ರಮದ ಸುತ್ತ ಕೇಳಿಬರುತ್ತಿರುವ ಆರೋಪಗಳ ನಡುವೆ ಕೊಹ್ಲಿ ಹೆಸರೂ ವಿವಾದಕ್ಕೆ ಬಂದಿದೆ.
5 ಕೋಟಿ ರೂ. ಆರೋಪ ಏನು?
ಶ್ರೀಕೃಷ್ಣ ಜನ್ಮಭೂಮಿ ಸಂಘರ್ಷ ನ್ಯಾಯಾಸ್ ಅಧ್ಯಕ್ಷ ದಿನೇಶ್ ಫಲಹಾರಿ ಮಹಾರಾಜ್ ಅವರ ಆರೋಪದಿಂದ ಈ ವಿವಾದ ಶುರುವಾಗಿದೆ. ಆಶ್ರಮಕ್ಕೆ ಸಂಬಂಧಿಸಿದ ಕೆಲವರು ವಿರಾಟ್ ಕೊಹ್ಲಿ ಅವರನ್ನು ಪ್ರೇಮಾನಂದ ಮಹಾರಾಜ್ ಭೇಟಿ ಮಾಡಲು ಕರೆತಂದಿದ್ದು, ಇದಕ್ಕಾಗಿ 5 ಕೋಟಿ ರೂ. ಖರ್ಚು ಮಾಡಲಾಗಿದೆ ಎಂದು ಅವರು ಆರೋಪಿಸಿದ್ದಾರೆ. ಕೊಹ್ಲಿ ಅವರ ಜನಪ್ರಿಯತೆಯ ಮೂಲಕ ಪ್ರೇಮಾನಂದ ಮಹಾರಾಜ್ರ ಪ್ರಭಾವ ಹೆಚ್ಚಿಸುವ ಉದ್ದೇಶ ಇದರ ಹಿಂದೆ ಇತ್ತು ಎಂಬ ಆರೋಪವೂ ಕೇಳಿಬಂದಿದೆ.
