Mental Wellbeing: ನಮಗೆ ಒಳ್ಳೆಯ ಕೆಲಸ, ಕುಟುಂಬ, ಹಣ ಎಲ್ಲವೂ ಇದ್ದರೂ ಕೆಲವೊಮ್ಮೆ ನೆಮ್ಮದಿ ಇರಲ್ಲ. ಬೇರೆಯವರು ಹೊಸ ಕಾರು ತಗೊಂಡಾಗ, ವಿದೇಶಕ್ಕೆ ಹೋಗಿ ಬಂದಾಗ ಅಥವಾ ಏನಾದ್ರೂ ಸಾಧನೆ ಮಾಡಿದಾಗ, ನಮ್ಮ ಜೀವನದಲ್ಲಿ ಏನೋ ಕಡಿಮೆ ಇದೆ ಅನ್ನಿಸಬಹುದು. ಇದಕ್ಕೆ ಸೋಷಿಯಲ್ ಮೀಡಿಯಾದಲ್ಲಿ ಬೇರೆಯವರ ಜೀವನ ನೋಡಿಕೊಂಡು ನಮ್ಮ ಬದುಕನ್ನು ಹೋಲಿಕೆ ಮಾಡಿಕೊಳ್ಳುವ ಅಭ್ಯಾಸವೂ ಒಂದು ಕಾರಣ.
ಇನ್‌ಸ್ಟಾಗ್ರಾಮ್, ಫೇಸ್‌ಬುಕ್‌ನಲ್ಲಿ ಹಲವರು ತಮ್ಮ ಖುಷಿಯ ಕ್ಷಣಗಳು, ಪ್ರವಾಸ ಮತ್ತು ಯಶಸ್ಸಿನ ಫೋಟೋಗಳನ್ನು ಹಂಚಿಕೊಳ್ಳುತ್ತಾರೆ. ಆದರೆ ಅವರ ಕಷ್ಟ, ಸಮಸ್ಯೆ ಮತ್ತು ವೈಫಲ್ಯಗಳು ಅಷ್ಟಾಗಿ ಕಾಣಿಸಲ್ಲ. ಹೀಗಾಗಿ ಬೇರೆಯವರ ಜೀವನವೇ ಪರ್ಫೆಕ್ಟ್, ನಮ್ಮ ಬದುಕೇ ಸಪ್ಪೆ ಅನ್ನೋ ಭಾವನೆ ಬರಬಹುದು.
‘ಸಾಮಾಜಿಕ ಹೋಲಿಕೆ’ ಅಂದರೆ?
ಮನಃಶಾಸ್ತ್ರದಲ್ಲಿ ಇದನ್ನು ‘ಸಾಮಾಜಿಕ ಹೋಲಿಕೆ’ (Social Comparison) ಎಂದು ಕರೆಯುತ್ತಾರೆ. ಬೇರೆಯವರ ಸಾಧನೆ ನೋಡಿ ಪ್ರೇರಣೆ ಪಡೆಯೋದು ಒಳ್ಳೆಯದೇ. ಆದರೆ ಅದೇ ಹೋಲಿಕೆ ನಮ್ಮಲ್ಲಿ ಬೇಸರ ಮತ್ತು ಕೀಳರಿಮೆ ಮೂಡಿಸಿದರೆ ಸಮಸ್ಯೆಯಾಗಬಹುದು.
ಇನ್‌ಫ್ಲುಯೆನ್ಸರ್‌ಗಳ ಜೀವನ ನೋಡಿ ಆಸೆ ಹೆಚ್ಚಾಗುತ್ತಾ?
ಇನ್‌ಫ್ಲುಯೆನ್ಸರ್‌ಗಳ ದುಬಾರಿ ಬಟ್ಟೆ, ಹೊಸ ಮೊಬೈಲ್‌, ಐಷಾರಾಮಿ ಪ್ರವಾಸ ನೋಡಿ ನಮಗೂ ಅದೇ ಬೇಕು ಅನ್ನಿಸಬಹುದು. ನಮ್ಮ ಬಳಿ ಒಳ್ಳೆಯ ವಸ್ತುಗಳಿದ್ದರೂ ಬೇರೆಯವರ ಬಳಿ ಇರೋದನ್ನು ನೋಡಿ ಹೊಸ ಆಸೆಗಳು ಹುಟ್ಟುತ್ತವೆ. ಇದರಿಂದ ಅನಗತ್ಯ ಖರ್ಚು ಹೆಚ್ಚಾಗುವ ಸಾಧ್ಯತೆಯೂ ಇದೆ.
