Nepal Flash Floods: ಮುಂಜಾನೆ ಎಲ್ಲರೂ ಸಿಹಿ ನಿದ್ದೆಯಲ್ಲಿದ್ದರು.. ಆವಾಗಲೇ ನದಿಯಲ್ಲಿ ಪ್ರವಾಹದ ಅಬ್ಬರ ಶುರುವಾಗಿದೆ. ಬೆಟ್ಟದಲ್ಲಿ ಉಂಟಾದ ಭೂಕುಸಿತದಿಂದ ನೇಪಾಳದ ಗೂರ್ಖಾ ಜಿಲ್ಲೆಯ ನದಿ ತೀರದ ಪ್ರದೇಶಗಳಲ್ಲಿ ದಿಢೀರ್ ಪ್ರವಾಹ ಉಂಟಾಗಿದೆ. ನೀರಿನ ರಭಸಕ್ಕೆ ಮನೆಗಳು ಕೊಚ್ಚಿಹೋಗಿದ್ದು, ತೂಗುಸೇತುವೆಗಳು ಸೇರಿದಂತೆ ಹಲವು ಮೂಲಸೌಕರ್ಯಗಳು ಹಾನಿಗೀಡಾಗಿವೆ.
ಇಂದು ಮುಂಜಾನೆ ಬುಧಿ ಗಂಡಕಿ ನದಿ ತೀರದ ಪ್ರದೇಶಗಳಲ್ಲಿ ಈ ಪ್ರವಾಹ ಸಂಭವಿಸಿದೆ. ಚುಮ್ನುಬ್ರಿ ಮತ್ತು ಧಾರ್ಚೆ ಗ್ರಾಮೀಣ ಮುನ್ಸಿಪಾಲಿಟಿ ವ್ಯಾಪ್ತಿಯ ಸಲೇರಿ ಪುಕಾ, ಜಗತ್, ನ್ಯಾಕ್‌ಚೆಟ್ ಹಾಗೂ ಫಿಲಿಮ್ ಬಜಾರ್ ಪ್ರದೇಶಗಳಲ್ಲಿ ಪ್ರವಾಹದ ಹೊಡೆತ ಜೋರಾಗಿತ್ತು.
ಭೂಕುಸಿತದಿಂದ ಏಕಾಏಕಿ ನುಗ್ಗಿದ ನೀರು
ಬೆಟ್ಟದ ಪ್ರದೇಶದಲ್ಲಿ ಭಾರೀ ಭೂಕುಸಿತ ಸಂಭವಿಸಿದ್ದರಿಂದ ನದಿಯ ಉಪನದಿ ಅಥವಾ ಹಳ್ಳದ ನೀರಿನ ಹರಿವು ಬಂದ್ ಆಗಿತ್ತು. ಇದರಿಂದ ನೀರು ಒಂದೇ ಕಡೆ ಸಂಗ್ರಹವಾಗಿ ತಾತ್ಕಾಲಿಕ ತಡೆಯಂತಾಗಿತ್ತು. ಬಳಿಕ ಆ ತಡೆ ಏಕಾಏಕಿ ಒಡೆದಿದ್ದರಿಂದ ಭಾರೀ ಪ್ರಮಾಣದ ನೀರು ಬುಧಿ ಗಂಡಕಿ ನದಿಗೆ ನುಗ್ಗಿದೆ. ಇದರಿಂದ ನೋಡನೋಡುತ್ತಿದ್ದಂತೆಯೇ ನದಿಯಲ್ಲಿ ನೀರಿನ ಹರಿವು ಹೆಚ್ಚಾಗಿ ಪ್ರವಾಹ ಉಂಟಾಗಿದೆ.
ಬಹುತೇಕ ಹೆಚ್ಚು ಮನೆಗಳಿಗೆ ಹಾನಿ
ಪ್ರವಾಹದ ನೀರಿನ ರಭಸಕ್ಕೆ ಸಿಲುಕಿ ಬಹುತೇಕ ಮನೆಗಳು ಕೊಚ್ಚಿಹೋಗಿವೆ. ಗ್ರಾಮಗಳನ್ನು ಸಂಪರ್ಕಿಸುವ ತೂಗುಸೇತುವೆಗಳಿಗೂ ಹಾನಿಯಾಗಿದ್ದು, ಜಲವಿದ್ಯುತ್ ಯೋಜನೆಯೊಂದರ ನಿರ್ಮಾಣ ಸ್ಥಳಕ್ಕೂ ನೀರು ನುಗ್ಗಿದೆ. ಇದರಿಂದ ನದಿ ತೀರದ ಪ್ರದೇಶಗಳಲ್ಲಿ ವಾಸಿಸುವ ಜನರ ಬದುಕು ಅಸ್ತವ್ಯಸ್ತವಾಗಿದೆ.
