ಬ್ರಹ್ಮಾಂಡದ ಕೌತುಕ: ಫೆಬ್ರವರಿಯಲ್ಲಿ 'ಅಗ್ನಿ ಉಂಗುರ', ಮಾರ್ಚ್‌ನಲ್ಲಿ 'ರಕ್ತ ಚಂದ್ರ'ನ ದರ್ಶನ! | Blood Moon

ವರ್ಷದ ಮೊದಲ ಸೂರ್ಯಗ್ರಹಣವು ಫೆಬ್ರವರಿ 17ರಂದು ಸಂಭವಿಸಲಿದೆ. ಈ ದಿನ ಚಂದ್ರನು ಸೂರ್ಯ ಮತ್ತು ಭೂಮಿಯ ನಡುವೆ ಬಂದಾಗ, ಸೂರ್ಯನ ಮಧ್ಯಭಾಗವನ್ನು ಮಾತ್ರ ಆವರಿಸುತ್ತಾನೆ. ಆಗ ಸೂರ್ಯನ ಹೊರಭಾಗವು ಪ್ರಕಾಶಮಾನವಾದ ಚಿನ್ನದ ಉಂಗುರದಂತೆ ಕಾಣುತ್ತದೆ. ಇದನ್ನು 'ಅನ್ಯುಲರ್ ಸೋಲಾರ್ ಎಕ್ಲಿಪ್ಸ್' ಎಂದು ಕರೆಯಲಾಗುತ್ತದೆ.

ಈ ಅದ್ಭುತ ದೃಶ್ಯವು ಮುಖ್ಯವಾಗಿ ಅಂಟಾರ್ಕ್ಟಿಕಾ ಮತ್ತು ದಕ್ಷಿಣ ಸಾಗರದ ಭಾಗಗಳಲ್ಲಿ ಗೋಚರಿಸುತ್ತದೆ. ದಕ್ಷಿಣ ಆಫ್ರಿಕಾ ಮತ್ತು ದಕ್ಷಿಣ ಅಮೆರಿಕಾದಲ್ಲಿ ಇದು ಭಾಗಶಃ ಗ್ರಹಣವಾಗಿ ಕಾಣಿಸುತ್ತದೆ. ಇನ್ನು ಈ ಸೂರ್ಯಗ್ರಹಣವು ಭಾರತದಲ್ಲಿ ಕಾಣಿಸುವುದಿಲ್ಲ.

ಸೂರ್ಯಗ್ರಹಣದ ಬೆನ್ನಲ್ಲೇ ಮಾರ್ಚ್ 3ರಂದು ಸಂಪೂರ್ಣ ಚಂದ್ರಗ್ರಹಣ ಸಂಭವಿಸಲಿದೆ. ಭೂಮಿಯ ನೆರಳು ಚಂದ್ರನ ಮೇಲೆ ಸಂಪೂರ್ಣವಾಗಿ ಬಿದ್ದಾಗ, ಚಂದ್ರನು ಕಡು ಕೆಂಪು ಬಣ್ಣಕ್ಕೆ ತಿರುಗುತ್ತಾನೆ. ಈ ವಿದ್ಯಮಾನವನ್ನೇ 'ಬ್ಲಡ್ ಮೂನ್' ಎಂದು ಕರೆಯಲಾಗುತ್ತದೆ. ಸುಮಾರು 58 ನಿಮಿಷಗಳ ಕಾಲ ಚಂದ್ರನು ಈ ರೋಚಕ ರೂಪದಲ್ಲಿ ಇರಲಿದ್ದಾನೆ.

ಭಾರತದ ಪಾಲಿಗೆ ಇದು ಅತ್ಯಂತ ವಿಶೇಷ. ಬೆಂಗಳೂರು ಸೇರಿದಂತೆ ಭಾರತದ ಅನೇಕ ಭಾಗಗಳಲ್ಲಿ ಈ ಚಂದ್ರಗ್ರಹಣವು ಸಂಜೆ 6:28ರಿಂದ 7:53ರ ಅವಧಿಯಲ್ಲಿ ಭಾಗಶಃ ಗ್ರಹಣವಾಗಿ ಗೋಚರಿಸಲಿದೆ. ಚಂದ್ರನು ಉದಯಿಸುವಾಗಲೇ ಗ್ರಹಣ ಹಿಡಿದ ರೂಪದಲ್ಲಿ ಬರಲಿದ್ದಾನೆ. ಏಷ್ಯಾ, ಆಸ್ಟ್ರೇಲಿಯಾ, ಪೆಸಿಫಿಕ್ ಮತ್ತು ಉತ್ತರ ಅಮೆರಿಕಾದಲ್ಲಿ ಈ ಪೂರ್ಣ ಗ್ರಹಣ ಸ್ಪಷ್ಟವಾಗಿ ಕಾಣಲಿದೆ ಎಂದು ವರದಿಯಾಗಿದೆ.