ನವದೆಹಲಿ: ವ್ಯಾಪಾರಿಗಳ ಮನವಿಗೆ ಕೇಂದ್ರ ಸರ್ಕಾರ, ಯುಪಿಐ ಪಾವತಿಗೆ ಶುಲ್ಕ ವಿಧಿಸುವ ನಿಯಮವನ್ನು ದೀಪಾವಳಿಗೆ ಮುಂದೂಡಿದೆ. ಈ ಬಗ್ಗೆ ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೋರೇಷನ್ ಆಫ್ ಇಂಡಿಯಾ ಅಧಿಕೃತ ಮಾಹಿತಿ ಹೊರಡಿಸಿದೆ.
2,000 ಕ್ಕಿಂತ ಹೆಚ್ಚಿನ ಮೌಲ್ಯದ ಯುಪಿಐ ಪಾವತಿಗಳ ಮೇಲೆ ಅಕ್ಟೋಬರ್ 15 ರಿಂದ ಜಾರಿಗೆ ತರಲು ಉದ್ದೇಶಿಸಿದ್ದ ವ್ಯಾಪಾರಿ ರಿಯಾಯಿತಿ ದರ(Merchant Discount Rate (MDR)) ದೀಪಾವಳಿ ಹಬ್ಬದ ನಂತರ ಅಂದರೆ, ನವೆಂಬರ್ ಎರಡನೇ ವಾರದ ನಂತರ ಜಾರಿ ಮಾಡಲಾಗುವುದು ಎಂದು ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (NPCI) ತಿಳಿಸಿದೆ.
ಏನಿದು ಹೊಸ ನಿಯಮ?
ಹೊಸ ನಿಯಮದ ಪ್ರಕಾರ 2000 ರೂಪಾಯಿ ಮೇಲ್ಪಟ್ಟ ವ್ಯಾಪಾರ ವಹಿವಾಟುಗಳಿಗೆ ಶೇ.0.4 ರಷ್ಟು ಶುಲ್ಕ ವಿಧಿಸಲು ನಿರ್ಧರಿಸಲಾಗಿತ್ತು. ಈ ಶುಲ್ಕವನ್ನು ವ್ಯಾಪಾರಿಗಳು ಭರಿಸಬೇಕಾಗಿದ್ದು, ಗ್ರಾಹಕರಿಗೆ ಯಾವುದೇ ಹೊರೆ ಇರುವುದಿಲ್ಲ ಎಂದು ಕೇಂದ್ರ ಹೇಳಿತ್ತು. ಆದರೂ ಸಹ ಈ ನಿಯಮ ಜಾರಿಯಾಗುವ ಮುನ್ನವೇ ವ್ಯಾಪಾರಿಗಳು ಹೊಸ ಅಭಿಯಾನ ಶುರು ಮಾಡಿದ್ದವು. ಕ್ಯಾಶ್ ಕೊಡುವುದಾದರೆ ನಿಖರ ಬೆಲೆ ಕೊಡಿ, ಆನ್ಲೈನ್ ಪಾವತಿ ಯಾದರೆ ಒಂದೆರಡು ರೂಪಾಯಿ ಹೆಚ್ಚು ಮಾಡಬೇಕು ಎಂದು ತಮ್ಮದೇ ಆದ ನಿಯಮ ಹಾಕೊಳ್ಳುವ ಮೂಲಕ ಕೇಂದ್ರದ ಈ ನಿರ್ಧಾರದ ವಿರುದ್ಧ ಕಿಡಿಕಾರಿದರು.
