ಟಿಎಂಸಿ ಬಂಡಾಯ, ಡಿಎಂಕೆ-ಕಾಂಗ್ರೆಸ್ ವೈರತ್ವ: ಮೋದಿ ಸರ್ಕಾರಕ್ಕೆ ಸಿಗುತ್ತಾ 'ಕ್ಷೇತ್ರ ಮರುವಿಂಗಡಣೆ' ಗೆಲುವು? TMC Split Delimitation Bill NDA Lok Sabha

ಟಿಎಂಸಿಯ ಈ ಆಂತರಿಕ ಬಿರುಕು ಮತ್ತು ತಮಿಳುನಾಡಿನಲ್ಲಿ ಕಾಂಗ್ರೆಸ್-ಡಿಎಂಕೆ ಮೈತ್ರಿ ಮುರಿದುಬಿದ್ದಿರುವುದು ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಸರ್ಕಾರಕ್ಕೆ ಆನೆಬಲ ತಂದಿದೆ. ಈ ಹೊಸ ರಾಜಕೀಯ ಸಮೀಕರಣದಿಂದಾಗಿ, ದೇಶದ ಇತಿಹಾಸದಲ್ಲೇ ಅತ್ಯಂತ ಮಹತ್ವದ ಮತ್ತು ವಿವಾದಾತ್ಮಕ ಎನ್ನಲಾದ ಕ್ಷೇತ್ರ ಮರುವಿಂಗಡಣೆ ವಿಧೇಯಕ ಮತ್ತು ಮಹಿಳಾ ಮೀಸಲಾತಿ ವಿಧೇಯಕಗಳನ್ನು ಮುಂಬರುವ ಮುಂಗಾರು ಅಧಿವೇಶನದಲ್ಲೇ ಅಂಗೀಕರಿಸಲು ಎನ್‌ಡಿಎ ಸರ್ಕಾರಕ್ಕೆ ಭಾರಿ ದೊಡ್ಡ ಅವಕಾಶ ಸಿಕ್ಕಂತಾಗಿದೆ.

ಟಿಎಂಸಿ ಸಂಸದರಾದ ಕಾಕೋಲಿ ಘೋಷ್ ದಸ್ತಿದಾರ್ ಮತ್ತು ಶರ್ಮಿಳಾ ಸರ್ಕಾರ್ ನೀಡಿರುವ ಮಾಹಿತಿ ಪ್ರಕಾರ, ಪಕ್ಷದಲ್ಲಿ ತಮಗೆ ಸ್ವತಂತ್ರವಾಗಿ ಕೆಲಸ ಮಾಡಲು ಅವಕಾಶ ಸಿಗುತ್ತಿಲ್ಲ ಮತ್ತು ಭ್ರಷ್ಟಾಚಾರದ ವಿರುದ್ಧದ ಅಸಮಾಧಾನದಿಂದಾಗಿ 20 ಸಂಸದರು ಒಟ್ಟಾಗಿ ಹೊಸ ಬಣ ರಚಿಸಲು ನಿರ್ಧರಿಸಿದ್ದಾರೆ. ಪಕ್ಷಾಂತರ ನಿಷೇಧ ಕಾಯ್ದೆಯಿಂದ ತಪ್ಪಿಸಿಕೊಳ್ಳಲು ಅಗತ್ಯವಿರುವ ಸಂಖ್ಯೆಗಿಂತ ಒಂದು ಸ್ಥಾನ ಹೆಚ್ಚೇ ಇವರ ಬಳಿ ಇದೆ. ಈಗಾಗಲೇ ಲೋಕಸಭಾ ಸ್ಪೀಕರ್ ಓಂ ಬಿರ್ಲಾ ಅವರಿಗೆ ಈ ಕುರಿತು ಪತ್ರ ಬರೆಯಲಾಗಿದ್ದು, ಸಂಸದರು ಕೇಂದ್ರ ಸಚಿವ ಭೂಪೇಂದ್ರ ಯಾದವ್ ಅವರ ನಿವಾಸದಲ್ಲಿ ಮುಂದಿನ ಕಾರ್ಯತಂತ್ರದ ಬಗ್ಗೆ ಸುದೀರ್ಘ ಚರ್ಚೆ ನಡೆಸಿದ್ದಾರೆ.

ಕಳೆದ ಏಪ್ರಿಲ್ ತಿಂಗಳಲ್ಲಿ ಸಂವಿಧಾನದ 131ನೇ ತಿದ್ದುಪಡಿ ವಿಧೇಯಕ (ಕ್ಷೇತ್ರ ಮರುವಿಂಗಡಣೆ ವಿಧೇಯಕ) ಮಂಡನೆಯಾದಾಗ ಸರ್ಕಾರಕ್ಕೆ ಅಗತ್ಯವಿದ್ದ ಮೂರನೇ ಎರಡರಷ್ಟು ಬಹುಮತ ಸಿಗದೆ ಹಿನ್ನಡೆಯಾಗಿತ್ತು. ಈ ವಿಧೇಯಕದ ಅಡಿಯಲ್ಲಿ 2011ರ ಜನಗಣತಿಯ ಆಧಾರದ ಮೇಲೆ ಲೋಕಸಭಾ ಕ್ಷೇತ್ರಗಳ ಗಡಿಗಳನ್ನು ಮರುನಿರ್ಧಾರ ಮಾಡಬೇಕಿದೆ. ಇದು ಜಾರಿಯಾದರೆ ಮಾತ್ರ ಮಹಿಳೆಯರಿಗೆ ಶೇ. 33 ಸೀಟು ಮೀಸಲಿಡುವ ಕಾಯ್ದೆ ಪೂರ್ಣ ಪ್ರಮಾಣದಲ್ಲಿ ಅನುಷ್ಠಾನಕ್ಕೆ ಬರಲು ಸಾಧ್ಯವಾಗುತ್ತದೆ. ಹೀಗಾಗಿ ಜುಲೈ ಮೂರನೇ ವಾರದಲ್ಲಿ ಆರಂಭವಾಗಲಿರುವ ಮುಂಗಾರು ಅಧಿವೇಶನದಲ್ಲಿ ಇದನ್ನು ಹೇಗಾದರೂ ಮಾಡಿ ಪಾಸ್ ಮಾಡಿಸಲು ಬಿಜೆಪಿ ಭರದ ಸಿದ್ಧತೆ ನಡೆಸಿದೆ.

ಪ್ರಸ್ತುತ ಲೋಕಸಭೆಯ ಒಟ್ಟು ಬಲ 543 ಆಗಿದೆ. ಆದರೆ ಬಸಿರ್‌ಹಟ್, ಶಿಲ್ಲಾಂಗ್ ಮತ್ತು ನೌಗಾಂಗ್ ಸೇರಿ ಮೂರು ಕ್ಷೇತ್ರಗಳು ಸದ್ಯ ಖಾಲಿಯಿವೆ. ಹೀಗಾಗಿ ಸಂಸತ್ತಿನ ಪರಿಣಾಮಕಾರಿ ಸಂಖ್ಯೆ 540ಕ್ಕೆ ಇಳಿದಿದೆ. ಯಾವುದೇ ಸಾಂವಿಧಾನಿಕ ತಿದ್ದುಪಡಿ ವಿಧೇಯಕ ಪಾಸ್ ಆಗಬೇಕಾದರೆ 360 ಸಂಸದರ (2/3 ಬಹುಮತ) ಬೆಂಬಲ ಕಡ್ಡಾಯ.

ಇದರ ಜೊತೆಗೆ ತಮಿಳುನಾಡು ವಿಧಾನಸಭಾ ಚುನಾವಣೆ ಮುಗಿದ ಬೆನ್ನಲ್ಲೇ ಕಾಂಗ್ರೆಸ್ ಪಕ್ಷವು ಡಿಎಂಕೆ ಕೈಬಿಟ್ಟು, ನಟ ವಿಜಯ್ ಅವರ ತಮಿಳಗ ವೆಟ್ರಿ ಕಳಗಂ ಪಕ್ಷದೊಂದಿಗೆ ಸರ್ಕಾರ ರಚಿಸಲು ಕೈಜೋಡಿಸಿದೆ. ಇದರಿಂದ ತೀವ್ರ ನೊಂದಿರುವ ಎಂ.ಕೆ. ಸ್ಟಾಲಿನ್ ನೇತೃತ್ವದ ಡಿಎಂಕೆ, ರಾಷ್ಟ್ರ ಮಟ್ಟದಲ್ಲಿ ಇಂಡಿಯಾ ಒಕ್ಕೂಟ ಮುಗಿದ ಕಥೆ ಎಂದು ಘೋಷಿಸಿದೆ. ಡಿಎಂಕೆಯ 22 ಲೋಕಸಭಾ ಸಂಸದರು ವಿಧೇಯಕದ ಆಧಾರದ ಮೇಲೆ ಎನ್‌ಡಿಎಗೆ ಬೆಂಬಲ ನೀಡುವ ಸೂಚನೆ ನೀಡಿದ್ದಾರೆ. ಶಿವಸೇನಾ (ಯುಬಿಟಿ) ಪಕ್ಷದ ಕೆಲವು ಸಂಸದರು ಕೂಡ ಸರ್ಕಾರದ ಪರ ನಿಲ್ಲುವ ಸಾಧ್ಯತೆಯಿದೆ. ಇವೆಲ್ಲವೂ ಒಟ್ಟಾದರೆ ಎನ್‌ಡಿಎ ಬಲ 345ಕ್ಕೆ ಏರಲಿದ್ದು, ಮ್ಯಾಜಿಕ್ ನಂಬರ್ 360 ತಲುಪಲು ಕೇವಲ 15 ಸೀಟುಗಳಷ್ಟೇ ಬಾಕಿಯಿರುತ್ತವೆ. ಇದನ್ನು ಪಕ್ಷೇತರರು ಮತ್ತು ಸಣ್ಣ ಪಕ್ಷಗಳ ಮೂಲಕ ಕ್ರೋಢೀಕರಿಸಲು ಬಿಜೆಪಿ ತಂತ್ರ ರೂಪಿಸಿದೆ.

ಲೋಕಸಭೆ ಮಾತ್ರವಲ್ಲದೆ ಮೇಲ್ಮನೆಯಾದ ರಾಜ್ಯಸಭೆಯಲ್ಲೂ ಟಿಎಂಸಿಗೆ ಭಾರಿ ಹೊಡೆತ ಬಿದ್ದಿದೆ. ಟಿಎಂಸಿಯ ಹಿರಿಯ ಸಂಸದ ಸುಖೇಂದು ಶೇಖರ್ ರಾಯ್ ಈಗಾಗಲೇ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದು, ಅವರು ಶೀಘ್ರದಲ್ಲೇ ಬಿಜೆಪಿ ಬೆಂಬಲದೊಂದಿಗೆ ಮರು ಆಯ್ಕೆಯಾಗಲಿದ್ದಾರೆ ಎನ್ನಲಾಗುತ್ತಿದೆ. ಇವರ ಬೆನ್ನಲ್ಲೇ ಇನ್ನು ಕೆಲವು ಅತೃಪ್ತ ಟಿಎಂಸಿ ರಾಜ್ಯಸಭಾ ಸಂಸದರು ಕೂಡ ಕೇಸರಿ ಪಾಳಯಕ್ಕೆ ಜಿಗಿಯಲು ರೆಡಿಯಾಗಿದ್ದಾರೆ. ಒಟ್ಟಿನಲ್ಲಿ, ಪ್ರಾದೇಶಿಕ ಪಕ್ಷಗಳ ಕುಟುಂಬ ರಾಜಕಾರಣ ಮತ್ತು ಆಂತರಿಕ ಕಲಹಗಳೇ ಈಗ ಪ್ರಧಾನಿ ಮೋದಿ ಅವರಿಗೆ ದೇಶದ ಕಾನೂನು ವ್ಯವಸ್ಥೆಯನ್ನು ಮರುರೂಪಿಸಲು ದೊಡ್ಡ ಅಸ್ತ್ರವಾಗಿ ಸಿಕ್ಕಿವೆ,(ಏಜೆನ್ಸೀಸ್​).