ಛತ್ತೀಸ್‌ಗಢದಲ್ಲಿ ಸಾವಿರಾರು ಕ್ವಿಂಟಾಲ್ ಭತ್ತ ಕಣ್ಮರೆ; ಇಲಿ, ಗೆದ್ದಲಿನ ಹೆಸರಲ್ಲಿ ನೂರಾರು ಕೋಟಿ ಲೂಟಿ ಶಂಕೆ? Paddy

ಛತ್ತೀಸ್‌ಗಢ: ಭಾರತದ ಭತ್ತದ ಕಣಜ ಎಂಬ ಖ್ಯಾತಿಯ ಛತ್ತೀಸ್‌ಗಢ ರಾಜ್ಯದಲ್ಲಿ ಈಗ ಸರ್ಕಾರ ಸಂಗ್ರಹಿಸಿದ್ದ ಸಾವಿರಾರು ಕ್ವಿಂಟಾಲ್ ಭತ್ತ (Paddy) ಕಣ್ಮರೆಯಾಗುತ್ತಿದೆ ಎಂದು ವರದಿಯಾಗಿದೆ. ಕಣ್ಮರೆಗೆ ಕಾರಣವೇನು? ಎಂದು ಪ್ರಶ್ನಿಸಿದರೆ ಇಲಿ, ಪಕ್ಷಿ ಮತ್ತು ಗೆದ್ದಲುಗಳ ಕಾರಣದಿಂದಲೇ ಭತ್ತ ಕಣ್ಮರೆಯಾಗುತ್ತಿದೆ ಎನ್ನುವುದು ಅಧಿಕಾರಗಳ ಉತ್ತರವಾಗಿದೆ.

ಛತ್ತೀಸ್‌ಗಢದ ಯಾವುದೇ ಭಾಗದಲ್ಲಿ ಈ ಘಟನೆ ನಡೆದಾಗ,ಹವಾಮಾನದ ವ್ಯತ್ಯಾಸ ಮತ್ತು ಹಸಿವಿನಿಂದಾಗಿ ಈ ಪ್ರಮಾಣದಲ್ಲಿ ಭತ್ತ ಕಣ್ಮರೆಯಾಗುತ್ತಿದೆ ಎಂದು ಅಧಿಕಾರಿಗಳು ಹೇಳುತ್ತಿದ್ದಾರೆ. ಆದರೆ ಇವರು ಕಣ್ಮರೆಯಾದ ಭತ್ತದ ಮಾಹಿತಿ ನೀಡಿದಾಗ ಇಲ್ಲೇನೋ ಸಮಸ್ಯೆ ಖಂಡಿತವಾಗಿ ಇದೆ ಎಂದು ಭಾಸವಾಗುತ್ತದೆ.

ಮಹಾಸಮುಂದ್‌ ಜಿಲ್ಲೆಯಲ್ಲಿ ಒಣಗಿಸುವಿಕೆ ಮತ್ತು ಹಾನಿಯ ಹೆಸರಿನಲ್ಲಿ ಹತ್ತು ತಿಂಗಳಲ್ಲಿ ಸುಮಾರು 25,780 ಕ್ವಿಂಟಾಲ್ ಭತ್ತ ನಾಶವಾಗಿದೆ ಎಂಬ ಲೆಕ್ಕ ನೀಡಲಾಗಿದೆ. ಅಂದರೆ ಲೆಕ್ಕದ ಪ್ರಕಾರ ಗಂಟೆಗೆ 3 ಕ್ವಿಂಟಾಲ್, ದಿನಕ್ಕೆ 85 ಕ್ವಿಂಟಾಲ್ ಭತ್ತ ನಾಶವಾಗಿದೆ ಎಂದರ್ಥ. ದಿನಕ್ಕೆ ಕ್ವಿಂಟಾಲ್ ಲೆಕ್ಕದಲ್ಲಿ ಭತ್ತವನ್ನು ತಿನ್ನುವ ಇಲಿ ಮತ್ತು ಪಕ್ಷಿಗಳು ಭೂಮಿ ಮೇಲೆ ಇದ್ದಾವೆಯೇ? ಎಂಬ ಪ್ರಶ್ನೆಗೆ ಅಧಿಕಾರಿಗಳೇ ಉತ್ತರಿಸಬೇಕು.

ಅಧಿಕಾರಿಗಳ ನೀಡಿದ ದತ್ತಾಂಶದಂತೆ ಈ ರೀತಿಯ ಘಟನೆಗಳು ಐದು ಕೇಂದ್ರಗಳಲ್ಲಿ ನಡೆದಿವೆ. ಮಹಾಸಮುಂದ್‌ನಲ್ಲಿ 25,780 ಕ್ವಿಂಟಾಲ್, ಬಾಗ್ಬಹರಾದಲ್ಲಿ 18,395 , ಪಿಥೋರಾದಲ್ಲಿ 6,828, ಬಸ್ನಾದಲ್ಲಿ 13,428 ಮತ್ತು ಸರೈಪಾಲಿಯಲ್ಲಿ 17,188 ಕ್ವಿಂಟಾಲ್ ಭತ್ತವು ತೇವಾಂಶ, ಪಕ್ಷಿ ಮತ್ತು ಗೆದ್ದಲು ಬಾಧೆಯಿಂದಾಗಿ ನಾಶವಾಗಿದೆ ಎಂದು ಅಧಿಕಾರಿಗಳು ಸಮರ್ಥಿಸಿಕೊಂಡಿದ್ದಾರೆ.

ಮಾಧ್ಯಮ ಪ್ರತಿನಿಧಿ ಜತೆ ಮಾತನಾಡಿದ ಮಹಾಸಮುಂದ್‌ನ ಜಿಲ್ಲಾ ಮಾರುಕಟ್ಟೆ ಅಧಿಕಾರಿ ಅಶುತೋಷ್ ಕೊಸಾರಿಯಾ, ಈ ಸಮಸ್ಯೆ ಹೆಚ್ಚಾಗಿ ತಾಂತ್ರಿಕವಾಗಿದ್ದು, ನಾವು 2024-25 ರ ಭತ್ತವನ್ನು ಐದು ತಿಂಗಳ ಬದಲು ಸುಮಾರು 11 ತಿಂಗಳು ಸಂಗ್ರಹಿಸಿದ್ದೇವೆ. ಛತ್ತೀಸ್‌ಗಢದಾದ್ಯಂತ ಒಣಗುವುದರಿಂದ ಸರಾಸರಿ ಶೇ. 3.5 ರಷ್ಟು ಭತ್ತ ಹಾಳಾಗುತ್ತದೆ ಮತ್ತು ಮಹಾಸಮುಂದ್‌ನ ಅಂಕಿ ಅಂಶವು ಶೇ. 3.57 ರಷ್ಟಿದೆ ಎಂದು ಹೇಳಿದರು.

ಬಗ್ಬಹರಾ ಖರೀದಿ ಉಸ್ತುವಾರಿ ದೀಪೇಶ್ ಪಾಂಡೆ ಭತ್ತವನ್ನು ದೀರ್ಘಕಾಲದವರೆಗೆ ಸಂಗ್ರಹಿಸಲಾಗುತ್ತಿತ್ತು, ಆದ್ದರಿಂದ ಅದರಲ್ಲಿರುವ ತೇವಾಂಶ ನೈಸರ್ಗಿಕವಾಗಿ ಒಣಗಿ ಹೋಯಿತು. ಐದು ತಿಂಗಳ ನಂತರ, ಸರ್ಕಾರಿ ತಂಡವು ಪರೀಕ್ಷೆಯನ್ನು ನಡೆಸಿತು. ಆ ಸಮಯದಲ್ಲಿ, ಒಂದು ಚೀಲದ ಪ್ರಮಾಣಿತ ತೂಕ 40 ಕೆಜಿ ಇರುವ ಭತ್ತವು 37.48 ಕೆಜಿ ತೂಕವಿತ್ತು ಯಾದೃಚ್ಛಿಕ ಪರಿಶೀಲನೆಯ ಸಮಯದಲ್ಲಿ, ಐದು ತಿಂಗಳುಗಳಲ್ಲಿ ಒಣಗಿದ ಕಾರಣ ಸುಮಾರು 2.5 ಕೆಜಿ ತೂಕ ಕಡಿಮೆಯಾಗಿದೆ ಎಂದು ಪರಿಶೀಲನಾ ಅಧಿಕಾರಿಗಳೇ ಒಪ್ಪಿಕೊಂಡರು ಎಂದು ಪಾಂಡೆ ಹೇಳಿದರು.

ಆದರೆ ಆಹಾರ, ನಾಗರಿಕ ಸರಬರಾಜು ಮತ್ತು ಗ್ರಾಹಕ ಸಂರಕ್ಷಣಾ ಇಲಾಖೆಯಿಂದ ಸೆಪ್ಟೆಂಬರ್ 12 ರ ಸುತ್ತೋಲೆ ಪ್ರಕಾರ, ಶೇಕಡಾ 1 ರಷ್ಟು ಕೊರತೆ ಇದ್ದರೆ ಶೋ-ಕಾಸ್ ನೋಟಿಸ್, ಶೇಕಡಾ 1-2 ರಷ್ಟು ಇಲಾಖಾ ವಿಚಾರಣೆ ಮತ್ತು ಶೇಕಡಾ 2 ಕ್ಕಿಂತ ಹೆಚ್ಚಿನದನ್ನು ಅಮಾನತುಗೊಳಿಸುವುದಾಗಿ ಹೇಳುತ್ತದೆ. ಆದರೆ ಛತ್ತೀಸ್‌ಗಢದ ಈ ಭಾಗಗಳಲ್ಲಿ ಶೇ. 3 ಕ್ಕಿಂತ ಹೆಚ್ಚಿನ ಭತ್ತವು ನಾಶವಾಗಿವೆ ಎಂದು ಸರ್ಕಾರಿ ಲೆಕ್ಕಗಳೇ ಹೇಳುತ್ತಿದ್ದರು ಇದನ್ನು ಕೇವಲ ನೈಸರ್ಗಿಕ ಪ್ರಕ್ರಿಯೆ ಎಂದು ಪರಿಗಣಿಸಿದರ ಹಿಂದೆ ಯಾವ ಉದ್ದೇಶವಿದೆ ಎನ್ನವುದು ತಿಳಿದು ಬರಬೇಕಾಗಿದೆ,(ಏಜನ್ಸೀಸ್).