ಇದು ರಾಷ್ಟ್ರೀಯ ಅವಮಾನ: ತ್ರಿಪುರ ವಿದ್ಯಾರ್ಥಿ ಏಂಜೆಲ್ ಚಕ್ಮಾ ಹತ್ಯೆ ಬಗ್ಗೆ ಶಶಿ ತರೂರ್ ಆಕ್ರೋಶ | Shashi Tharoor

ಈ ಬಗ್ಗೆ ಎಕ್ಸ್​​ನಲ್ಲಿ ಪೋಸ್ಟ್​ ಮಾಡಿರುವ ಸಂಸದ ತರೂರ್, ನಮ್ಮ ದೇಶದ ನಾಗರಿಕನೊಬ್ಬ, ಈಶಾನ್ಯದಿಂದ ಬಂದವನು, ತನ್ನ ಭಾರತೀಯ ಗುರುತನ್ನು ಪ್ರತಿಪಾದಿಸಿದ್ದಕ್ಕಾಗಿ ತನ್ನ ಪ್ರಾಣವನ್ನೇ ಪಣಕ್ಕಿಡಬೇಕಾಗಿರುವುದು ರಾಷ್ಟ್ರೀಯ ಅವಮಾನ ಎಂದು ಹೇಳಿದ್ದಾರೆ. ಅಲ್ಲದೆ, ನಮ್ಮ ಸ್ವಂತ ಭೂಮಿಯಲ್ಲಿ ನಮ್ಮ ಸಹೋದರ ಸಹೋದರಿಯರ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಸಾಧ್ಯವಾಗದಿದ್ದರೆ, ಏಕ್ ಭಾರತ್ ಶ್ರೇಷ್ಠ ಭಾರತ್ ಎಂಬ ನಮ್ಮ ಮಾತು ಟೊಳ್ಳುತನದ್ದಾಗಿರುತ್ತದೆ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. 

ಮುಂದುವರೆದು ಮಾತನಾಡಿದ ತರೂರ್​, ಹೊಣೆಗಾರಿಕೆಯು ನ್ಯಾಯಾಲಯಗಳನ್ನು ಮೀರಿ ರಾಷ್ಟ್ರದ ಸಾಮೂಹಿಕ ಆತ್ಮಸಾಕ್ಷಿಗೆ ವಿಸ್ತರಿಸಬೇಕು. ಚಕ್ಮಾ ಅವರ ಸಾವನ್ನು ಅಂಕಿಅಂಶ ಅಥವಾ ಶೈಕ್ಷಣಿಕ ಶೀರ್ಷಿಕೆಗೆ ಇಳಿಸಬಾರದು. ಬದಲಿಗೆ ಶಿಕ್ಷಣ, ಸಹಾನುಭೂತಿ ಮತ್ತು ಸುಧಾರಣೆಗೆ ವೇಗವರ್ಧಕವಾಗಿ ಕಾರ್ಯನಿರ್ವಹಿಸಬೇಕು. ಶಾಲೆಗಳು ಎಲ್ಲಾ ಭಾರತೀಯ ಸಮುದಾಯಗಳ ಇತಿಹಾಸ ಮತ್ತು ಸಂಸ್ಕೃತಿಗಳನ್ನು ಕಲಿಸಬೇಕು ಮತ್ತು ಮಾಧ್ಯಮಗಳು ಈಶಾನ್ಯದ ಜನರನ್ನು ಘನತೆಯಿಂದ ಚಿತ್ರಿಸಬೇಕು ಎಂದು ತರೂರ್ ಪ್ರತಿಪಾದಿಸಿದ್ದಾರೆ.

ರಾಜಕೀಯ ಮತ್ತು ಧಾರ್ಮಿಕ ಮುಖಂಡರು ಧ್ವನಿ ಎತ್ತುವಂತೆ ಸಂಸದರು ಕರೆ ನೀಡಿದ್ದು, ಹಿಂದೂ ತತ್ವಶಾಸ್ತ್ರವನ್ನು ಉಲ್ಲೇಖಿಸಿದ ತರೂರ್, ಬಹುತ್ವ ಮತ್ತು ಒಳಗೊಳ್ಳುವಿಕೆ ಸಂಪ್ರದಾಯದ ಮೂಲದಲ್ಲಿದೆ. ಇದು ಐತಿಹಾಸಿಕವಾಗಿ ಬುಡಕಟ್ಟು, ಜಾತಿ, ಭಾಷೆ ಮತ್ತು ನಂಬಿಕೆಗಳಲ್ಲಿ ವೈವಿಧ್ಯತೆಯನ್ನು ಸ್ವೀಕರಿಸಿದೆ ಎಂದು ಸ್ಟಷ್ಟಪಡಿಸಿದ್ದಾರೆ. 

ಡಿಸೆಂಬರ್ 9 ರ ರಾತ್ರಿ ಡೆಹ್ರಾಡೂನ್‌ನ ಸೆಲಾಕಿ ಪ್ರದೇಶದಲ್ಲಿ ಈ ದುರಂತ ಸಂಭವಿಸಿದೆ. ಏಂಜಲ್ ಚಕ್ಮಾ ಮತ್ತು ಅವರ ಕಿರಿಯ ಸಹೋದರ ಮೈಕೆಲ್ ಸ್ಥಳೀಯ ಮಾರುಕಟ್ಟೆಯಿಂದ ಹಿಂತಿರುಗುತ್ತಿದ್ದಾಗ ಆರು ಜನರ ಗುಂಪು ಅವರನ್ನು ಅಡ್ಡಗಟ್ಟಿತು. ಅಲ್ಲದೆ, ದಾಳಿಕೋರರು ಸಹೋದರರ ಮೇಲೆ ಜನಾಂಗೀಯ ನಿಂದನೆಗಳನ್ನು ಎಸೆಯಲು ಪ್ರಾರಂಭಿಸಿದರು. ಇವರ ರಾಷ್ಟ್ರೀಯತೆಯನ್ನು ಪ್ರಶ್ನಿಸಿದರು ಮತ್ತು ಅವರನ್ನು ಚೀನೀ ಮತ್ತು ವಿದೇಶಿಯರು ಎಂದು ಕರೆದರು.

ಈ ಘಟನೆಯ ಬಗ್ಗೆ ಪ್ರತ್ಯಕ್ಷದರ್ಶಿಗಳು ಹೇಳುವ ಪ್ರಕಾರ, ಏಂಜಲ್ ತನ್ನ ನಿಲುವಿನಲ್ಲಿ ದೃಢವಾಗಿ ನಿಂತು, ನಾವು ಚೀನೀಯರಲ್ಲ, ನಾವು ಭಾರತೀಯರು. ನಾವು ನಿಮಗೆ ನಮ್ಮ ಗುರುತನ್ನು ಏಕೆ ಸಾಬೀತುಪಡಿಸಬೇಕು? ಎಂದು ಉತ್ತರಿಸಿದರು.

ಈ ಪ್ರತಿಕ್ರಿಯೆಯು ಗುಂಪನ್ನು ಕೆರಳಿಸಿದ್ದು, ಏಂಜಲ್ ಮೇಲೆ ಚಾಕುಗಳು ಮತ್ತು ಹೆವಿ ಮೆಟಲ್ ಕಾಡಾದಿಂದ ಕ್ರೂರವಾಗಿ ಹಲ್ಲೆ ನಡೆಸಲಾಯಿತು. ಏಂಜಲ್​ ಬೆನ್ನುಮೂಳೆಯ ಮೇಲೆ ಆಳವಾದ ಇರಿತದ ಗಾಯವು ಅವರನ್ನು ಪಾರ್ಶ್ವವಾಯುವಿಗೆ ತಳ್ಳಿತು ಮತ್ತು ತಲೆಗೆ ತೀವ್ರವಾದ ಗಾಯವು ಅಂತಿಮವಾಗಿ ಬಹು ಅಂಗಾಂಗ ವೈಫಲ್ಯಕ್ಕೆ ಕಾರಣವಾಯಿತು.

ಉತ್ತರಾಖಂಡದ ಡೆಹ್ರಾಡೂನ್‌ನಲ್ಲಿ ನಡೆದ ಭೀಕರ ಜನಾಂಗೀಯ ದಾಳಿಯ ನಂತರ 17 ದಿನಗಳ ಕಾಲ ಜೀವನ್ಮರಣ ಹೋರಾಟದ ನಂತರ ತ್ರಿಪುರಾದ ಎಂಬಿಎ ವಿದ್ಯಾರ್ಥಿ ಡಿಸೆಂಬರ್ 26ರಂದು ಸಾವನ್ನಪ್ಪಿದರು,(ಏಜೆನ್ಸೀಸ್).