ದಾವೂದ್ ಇಬ್ರಾಹಿಂ ಜೊತೆಗಿನ ಆ ಒಂದು ಫೋಟೋ ನನ್ನ ಜೀವನವನ್ನೇ ಬದಲಿಸಿತು: ದಶಕಗಳ ಬಳಿಕ ಮೌನ ಮುರಿದ ಮಂದಾಕಿನಿ ಹೇಳಿದ್ದೇನು? Mandakini on Dawood Ibrahim

ನವದೆಹಲಿ:  80ರ ದಶಕದಲ್ಲಿ ತನ್ನ ಅಭಿನಯ ಅದಕ್ಕಿಂತ ತನ್ನ ಅಂದದ ಮೂಲಕವೇ ಬಾಲಿವುಡ್​ ಅನ್ನು ಆಳಿದ ನಟಿ ಎಂದರೆ ಅದು ಮಂದಕಿನಿ. ಆದರೆ, ತಮ್ಮ ವೃತ್ತಿ ಜೀವನದ ಉತ್ತುಂತದಲ್ಲಿದ್ದಾಗ ಭೂಗತ ಪಾತಕಿ, ಬಾಂಬೆ ಭೂಗತ ಜಗತ್ತಿನ ಡಾನ್​ ದಾವೂದ್​ ಇಬ್ರಾಹಿಂ ಜೊತೆ ಇವರ ಹೆಸರು ತಳುಕು ಹಾಕಿಕೊಂಡು ಆ ಸಮಯದಲ್ಲಿ ದೊಡ್ಡ ವಿವಾದವನ್ನೇ ಸೃಷ್ಟಿಸಿತ್ತು. 

ಈ ಘಟನೆ ನಡೆದು ನಡೆದ ದಶಕಗಳೇ ಕಳೆದ ನಂತರ ಈಗ ಹಿರಿಯ ನಟಿ ಮಂದಾಕಿನಿ (Mandakini on Dawood Ibrahim), ದಾವೂದ್​ ಜೊತೆಗಿನ ಆ ವಿವಾದಾತ್ಮಕ ಫೋಟೊ, ಸಂದರ್ಭ ಹಾಗೂ ಅದರಿಂದ ತಾವು ಅನುಭವಿಸಿದ ಕಷ್ಟಗಳ ಬಗ್ಗೆ ಸ್ವತಃ ನಟಿಯೇ ಮನಬಿಚ್ಚಿ ಮಾತನಾಡಿದ್ದಾರೆ. 

ಖಾಸಗಿ ಮಾಧ್ಯವಮೊಂದಕ್ಕೆ ನೀಡಿರುವ ಸಂದರ್ಶನದಲ್ಲಿ ಮಾತನಾಡುತ್ತಾ ಮಂದಾಕಿನಿ, ಜನರು ಏನೆಲ್ಲಾ ಮಾತನಾಡಿಕೊಳ್ಳುತ್ತಾರೆ ಅಥವಾ ಬರೆಯುತ್ತಾರೆ ಎಂಬುದನ್ನು ನಿಯಂತ್ರಿಸಲು ನಮ್ಮಿಂದ ಸಾಧ್ಯವಿಲ್ಲ. ಒಬ್ಬ ಕಲಾವಿದೆಯಾಗಿ ನಾವು ಸಾರ್ವಜನಿಕವಾಗಿ ಅನೇಕ ಜನರನ್ನು ಭೇಟಿಯಾಗಬೇಕಾಗುತ್ತದೆ ಎಂದಿದ್ದಾರೆ. ಮುಂದುವರಿದು ಸ್ಪಷ್ಟಪಡಿಸಿದ ಅವರು, ನಾನು ದುಬೈಗೆ ಕೇವಲ ಒಂದು ಕಾರ್ಯಕ್ರಮಕ್ಕಾಗಿ ಹೋಗಿದ್ದೆ ಹೊರತು, ದಾವೂದ್ ಇಬ್ರಾಹಿಂ ನನ್ನನ್ನು ವಿಶೇಷವಾಗಿ ಆಹ್ವಾನಿಸಿರಲಿಲ್ಲ ಎಂದು ಆ ಘಟನೆ ಬಗ್ಗೆ ಸ್ಪಷ್ಟನೆ ನೀಡಿದ್ದಾರೆ.

ದಾವೂದ್ ಜೊತೆಗಿನ ಆ ಫೋಟೋ ವೈರಲ್ ಆದ ಬಳಿಕ ಮಾಧ್ಯಮಗಳಲ್ಲಿ ಮತ್ತು ಜನರ ನಡುವೆ ದೊಡ್ಡ ಮಟ್ಟದ ಗಾಸಿಪ್‌ಗಳು ಹಬ್ಬಿದ್ದವು. ಇದು ತನ್ನ ಚಿತ್ರರಂಗದ ವೃತ್ತಿಜೀವನದ ಮೇಲೆ ತೀವ್ರ ಪರಿಣಾಮ ಬೀರಿತು ಎಂದು ಮಂದಾಕಿನಿ ಬೇಸರ ವ್ಯಕ್ತಪಡಿಸಿದ್ದಾರೆ.

ಆ ವಿವಾದದಿಂದ ನನ್ನ ಸಿನಿಮಾರಂಗದ ಹಾದಿಗೆ ಸಾಕಷ್ಟು ಹಾನಿಯಾಯಿತು. ಅಂತಹ ಸಂದರ್ಭಗಳಲ್ಲಿ ನಮ್ಮನ್ನು ರಕ್ಷಿಸಿಕೊಳ್ಳಲು ಅಥವಾ ವದಂತಿಗಳನ್ನು ಎದುರಿಸಲು ಒಂದು ಸರಿಯಾದ ಮ್ಯಾನೇಜ್‌ಮೆಂಟ್ ತಂಡವಿರಬೇಕು ಎಂಬುದು ನನಗೆ ತಡವಾಗಿ ಅರಿವಾಯಿತು. ನಾನು ಆ ಸಮಯದಲ್ಲಿ ಎಲ್ಲೆಡೆ ಆ ವದಂತಿಗಳನ್ನು ನಿರಾಕರಿಸುತ್ತಲೇ ಇದ್ದೆ, ಎಂದು ಅವರು ನೆನಪಿಸಿಕೊಂಡಿದ್ದಾರೆ.

ರಾಜ್ ಕಪೂರ್ ನಿರ್ದೇಶನದಲ್ಲಿ ಮೂಡಿಬಂದ ಬ್ಲಾಕ್‌ಬಸ್ಟರ್ ಚಿತ್ರ 'ರಾಮ್ ತೇರಿ ಗಂಗಾ ಮೈಲಿ' ಚಿತ್ರದ ಮೂಲಕ ಮಂದಾಕಿನಿ ಬಾಲಿವುಡ್‌ಗೆ ಕಾಲಿಟ್ಟರು. ಈ ಚಿತ್ರದ ಮೂಲಕ ಅವರು ರಾತ್ರೋರಾತ್ರಿ ಸ್ಟಾರ್ ನಟಿಯಾಗಿ ಹೊರಹೊಮ್ಮಿದರು. 1980ರ ದಶಕದ ಬಾಲಿವುಡ್ ಚಿತ್ರರಂಗದಲ್ಲಿ ಅವರೇ ಪ್ರಮುಖ ಮುಖವಾಗಿದ್ದರು.

ಆ ಚಿತ್ರದ ಅಸಾಧಾರಣ ಯಶಸ್ಸಿನ ನಂತರ ಬಾಲಿವುಡ್‌ನಲ್ಲಿ ಬಿಡುವಿಲ್ಲದೆ ಕೆಲಸ ಮಾಡಿದ ಮಂದಾಕಿನಿ, ತಮ್ಮ ಸಿನಿಪಯಣದಲ್ಲಿ ಬರೋಬ್ಬರಿ 75ಕ್ಕೂ ಹೆಚ್ಚು ಚಲನಚಿತ್ರಗಳಲ್ಲಿ ನಟಿಸಿ ಸೈ ಎನಿಸಿಕೊಂಡಿದ್ದಾರೆ. ವರ್ಷಗಳ ಬಳಿಕ ಮಂದಾಕಿನಿ ನೀಡಿರುವ ಈ ಸ್ಪಷ್ಟನೆಯು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತು ಬಾಲಿವುಡ್ ಅಂಗಳದಲ್ಲಿ ಮತ್ತೊಮ್ಮೆ ಭಾರೀ ಚರ್ಚೆಗೆ ಗ್ರಾಸವಾಗಿದೆ, (ಏಜೆನ್ಸೀಸ್​).