ಕಾಲುವೆಯಲ್ಲಿ ಸ್ನಾನ ಮಾಡಿದ ಬಾಲಕನಿಗೆ ವಿಪರೀತ ಜ್ವರ: ವೈದ್ಯರು ಪರೀಕ್ಷಿಸಿದಾಗ ಕಾದಿತ್ತು ಶಾಕಿಂಗ್​ ಸಂಗತಿ! Amoebic Encephalitis

Amoebic Encephalitis : ಕೇರಳದ ಕೋಯಿಕ್ಕೋಡ್​ನಲ್ಲಿರುವ ವೈದ್ಯಕೀಯ ಕಾಲೇಜು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಒಂಬತ್ತು ವರ್ಷದ ಬಾಲಕನಿಗೆ ಅಮೀಬಿಕ್ ಎನ್ಸೆಫಾಲಿಟಿಸ್ ಅಂದರೆ, ಮೆದುಳು ತಿನ್ನುವ ಅಮೀಬಾ ಇರುವುದು ದೃಢಪಟ್ಟಿದೆ.

ಸಂತ್ರಸ್ತ ಬಾಲಕ ಕೊಟ್ಟೂರು ಮೂಲದವನಾಗಿದ್ದು, ಮೂರು ದಿನಗಳ ಹಿಂದಷ್ಟೇ ತನ್ನ ಸ್ನೇಹಿತರೊಂದಿಗೆ ಕಾಲುವೆಯಲ್ಲಿ ಸ್ನಾನ ಮಾಡಿದ್ದ. ಇಲ್ಲಿಂದಲೇ ಆತನಿಗೆ ಈ ಕಾಯಿಲೆ ಬಂದಿರಬಹುದು ಎಂದು ನಂಬಲಾಗಿದೆ.

ಅಂದಹಾಗೆ, ಕೆಲವು ದಿನಗಳ ನಂತರ ಕೋಯಿಕ್ಕೋಡ್‌ನಲ್ಲಿ ಮತ್ತೆ ಅಮೀಬಿಕ್ ಎನ್ಸೆಫಾಲಿಟಿಸ್ ದೃಢಪಟ್ಟಿದೆ. ತಲೆನೋವು ಮತ್ತು ತೀವ್ರ ಜ್ವರ ಕಾಣಿಸಿಕೊಂಡ ನಂತರ ಬಾಲಕನನ್ನು ಆಸ್ಪತ್ರೆಗೆ ದಾಖಲಿಸಲಾಯಿತು. ಎಷ್ಟೇ ಔಷಧಿ ನೀಡಿದರೂ ಜ್ವರ ಕಡಿಮೆಯಾಗದಿದ್ದಾಗ, ಆತನನ್ನು ಪರೀಕ್ಷೆಗಾಗಿ ಕೋಯಿಕ್ಕೋಡ್ ವೈದ್ಯಕೀಯ ಕಾಲೇಜಿಗೆ ಕರೆದೊಯ್ಯಲಾಯಿತು. ಪರೀಕ್ಷಿಸಿದಾಗ ಆತನಲ್ಲಿ ಮೆದುಳು ತಿನ್ನುವ ಅಮೀಬಾ ಸೋಂಕು ಇರುವುದು ಕಂಡುಬಂದಿದೆ. ಸದ್ಯ ಮಗುವಿನ ಆರೋಗ್ಯ ಸ್ಥಿತಿ ಸಮಾಧಾನಕರವಾಗಿ ಎಂದು ವೈದ್ಯರು ತಿಳಿಸಿದ್ದಾರೆ.

ಕಾಲುವೆಯ ನೀರಿನಿಂದ ಈ ರೋಗ ಹರಡಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಆರೋಗ್ಯ ಇಲಾಖೆ ತನಿಖೆಯನ್ನು ತೀವ್ರಗೊಳಿಸಿದೆ. ಬಾಲಕ ಸ್ನಾನ ಮಾಡಿದ್ದ ಕಕ್ಕೋಡಿ ಶಾಖಾ ಕಾಲುವೆಯಿಂದ ನೀರಿನ ಮಾದರಿಯನ್ನು ಸಂಗ್ರಹಿಸಲಾಗಿದೆ. ಪರೀಕ್ಷಾ ಫಲಿತಾಂಶಗಳು ಬಂದ ನಂತರವೇ ಮೂಲವನ್ನು ಸ್ಪಷ್ಟಪಡಿಸಲಾಗುವುದು ಎಂದು ವೈದ್ಯಾಧಿಕಾರಿಗಳು ಮಾಧ್ಯಮಗಳಿಗೆ ತಿಳಿಸಿದ್ದಾರೆ.

ಮೆದುಳು ತಿನ್ನುವ ಅಮೀಬಾ ಅಥವಾ 'ನೆಗ್ಲೇರಿಯಾ ಫೌಲೆರಿ' ( Naegleria fowleri ) ಎಂಬುದು ಸಿಹಿನೀರಿನಲ್ಲಿ ವಾಸಿಸುವ ಒಂದು ಏಕಕೋಶ ಜೀವಿಯಾಗಿದೆ. ಇದು ಸಾಮಾನ್ಯವಾಗಿ ಬೆಚ್ಚಗಿನ ಹಳ್ಳ, ಕೆರೆ, ನದಿ ಹಾಗೂ ಕಲುಷಿತಗೊಂಡ ನೀರಿನ ಮೂಲಗಳಲ್ಲಿ ಕಂಡುಬರುತ್ತದೆ. ಮನುಷ್ಯರು ಇಂತಹ ಕಲುಷಿತ ನೀರಿನಲ್ಲಿ ಈಜುವಾಗ ಅಥವಾ ಸ್ನಾನ ಮಾಡುವಾಗ, ಈ ಅಮೀಬಾ ಮೂಗಿನ ಮೂಲಕ ದೇಹವನ್ನು ಪ್ರವೇಶಿಸುತ್ತದೆ. ಅಲ್ಲಿಂದ ನೇರವಾಗಿ ಮೆದುಳಿಗೆ ತಲುಪುವ ಈ ಜೀವಿಯು ಮೆದುಳಿನ ಅಂಗಾಂಶಗಳನ್ನು ನಾಶಪಡಿಸಲು ಪ್ರಾರಂಭಿಸುತ್ತದೆ. ಆದ್ದರಿಂದ, ಇದನ್ನು 'ಮೆದುಳು ತಿನ್ನುವ ಅಮೀಬಾ' ಎಂದು ಕರೆಯಲಾಗುತ್ತದೆ.

ವೈದ್ಯಕೀಯ ಲೋಕದಲ್ಲಿ ಈ ಸ್ಥಿತಿಯನ್ನು ಪ್ರೈಮರಿ ಅಮೀಬಿಕ್ ಮೆನಿಂಗೊಎನ್ಸೆಫಾಲಿಟಿಸ್ (PAM) ಎಂದು ಕರೆಯುತ್ತಾರೆ. ಈ ಸೋಂಕು ತಗುಲಿದ 1 ರಿಂದ 12 ದಿನಗಳ ಒಳಗೆ ಇದರ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ. ಸೋಂಕಿತ ವ್ಯಕ್ತಿಯಲ್ಲಿ ಅತೀವ್ರ ತಲೆನೋವು, ಜ್ವರ, ವಾಕರಿಕೆ, ವಾಂತಿ ಮತ್ತು ಕುತ್ತಿಗೆ ಬಿಗಿತದಂತಹ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ. ಸೋಂಕು ಉಲ್ಬಣಗೊಂಡಂತೆ ಗೊಂದಲ, ಸಮತೋಲನ ಕಳೆದುಕೊಳ್ಳುವುದು, ಮಾತು ತೊದಲುವಿಕೆ ಮತ್ತು ರೋಗಗ್ರಸ್ತವಾಗುವಿಕೆ ಉಂಟಾಗಬಹುದು, ಅಲ್ಲದೆ ತೀವ್ರತರದ ಪ್ರಕರಣಗಳಲ್ಲಿ ವ್ಯಕ್ತಿಯು ಕೋಮಾಗೂ ಜಾರಬಹುದು.

ಈ ಕಾಯಿಲೆಯು ಅತ್ಯಂತ ಅಪರೂಪವಾಗಿದ್ದರೂ ಸಹ, ಇದು ತುಂಬಾ ಮಾರಣಾಂತಿಕವಾಗಿದ್ದು ಬಹುತೇಕ ಸಂದರ್ಭಗಳಲ್ಲಿ ಸಾವಿಗೆ ಕಾರಣವಾಗುತ್ತದೆ. ಇದನ್ನು ತಡೆಗಟ್ಟಲು ಕಲುಷಿತ ಈಜುಕೊಳ ಅಥವಾ ಕೆರೆಗಳಿಗೆ ಇಳಿಯುವುದನ್ನು ತಪ್ಪಿಸಬೇಕು ಹಾಗೂ ಅನಿವಾರ್ಯ ಸಂದರ್ಭಗಳಲ್ಲಿ ಮೂಗಿನ ಕ್ಲಿಪ್‌ಗಳನ್ನು ಬಳಸಬೇಕು, (ಏಜೆನ್ಸೀಸ್​).