ಮಕ್ಕಳ ಶಿಕ್ಷಣಕ್ಕಾಗಿ ಬರಿಗಾಲಿನಲ್ಲಿ ಮ್ಯಾರಥಾನ್!... ಓಡುವಾಗ ಕಣ್ಣೆದುರು ಅವರ ಭವಿಷ್ಯ ಮಾತ್ರ ಕಾಣುತ್ತಿತ್ತು ಎಂದ ಮಹಾತಾಯಿ | Ramabai Ranveer

ಮುಂಬೈನಲ್ಲಿ ನಡೆದ ಅಪಘಾತವೊಂದರಲ್ಲಿ ಪತಿಯನ್ನು ಕಳೆದುಕೊಂಡ ನಂತರ, ಇಬ್ಬರು ಹೆಣ್ಣುಮಕ್ಕಳನ್ನು ಸಾಕುವ ಜವಾಬ್ದಾರಿ ಸಂಪೂರ್ಣವಾಗಿ ರಮಾಬಾಯಿ ಅವರ ಹೆಗಲೇರಿತು. ಆರ್ಥಿಕ ಸಂಕಷ್ಟಗಳಿದ್ದಾಗ್ಯೂ, ತಮ್ಮ ಇಬ್ಬರೂ ಹೆಣ್ಣುಮಕ್ಕಳಿಗೆ ಉತ್ತಮ ಶಿಕ್ಷಣ ಕೊಡಿಸಲೇಬೇಕು ಎಂಬ ದೃಢ ನಿರ್ಧಾರ ಅವರದ್ದಾಗಿತ್ತು. ಮಕ್ಕಳ ವಿದ್ಯಾಭ್ಯಾಸಕ್ಕೆ ನೆರವಾಗಲು, ರಮಾಬಾಯಿ ತಮ್ಮ ಹಿರಿಯ ಮಗಳನ್ನು ಅಂಬಾಜೋಗೈನ ಅಕಾಡೆಮಿಗೆ ಸೇರಿಸಿ, ತಾವು ಸಹ ಅಲ್ಲೇ ಅಡುಗೆ ಕೆಲಸಕ್ಕೆ ಸೇರಿಕೊಂಡರು. ಮಕ್ಕಳು ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ಸಿದ್ಧತೆ ನಡೆಸುತ್ತಿರುವಾಗ, ರಮಾಬಾಯಿ ಪ್ರತಿದಿನ ಅಡುಗೆ ತಯಾರಿಸಿ ಅವರ ಓದಿಗೆ ಆಸರೆಯಾಗಿ ನಿಲ್ಲುತ್ತಿದ್ದರು.

ಈ ನಡುವೆ, ಸ್ಥಳೀಯ ಸಂಸ್ಥೆಯೊಂದು 3,000 ರೂಪಾಯಿ ನಗದು ಬಹುಮಾನ ಹೊಂದಿದ್ದ ಅಮೃತ್ ದೌಡ್ ಮ್ಯಾರಥಾನ್ ಆಯೋಜಿಸಿತ್ತು. ತಮ್ಮ ಮಕ್ಕಳ ಶಿಕ್ಷಣಕ್ಕೆ ಹಣದ ಅಗತ್ಯವಿದ್ದ ಕಾರಣ ರಮಾಬಾಯಿ ಈ ಓಟದ ಸ್ಪರ್ಧೆಯಲ್ಲಿ ಪಾಲ್ಗೊಳ್ಳಲು ನಿರ್ಧರಿಸಿದರು. ಟ್ರ್ಯಾಕ್‌ಸೂಟ್‌ ಧರಿಸಿದ್ದ ಯುವ ಓಟಗಾರರ ನಡುವೆ ರಮಾಬಾಯಿ ಸಾಮಾನ್ಯ ಸೀರೆಯನ್ನುಟ್ಟು, ಕಾಲಿಗೆ ಚಪ್ಪಲಿ ಧರಿಸಿ ಸ್ಪರ್ಧೆಯ ಸಾಲಿನಲ್ಲಿ ನಿಂತಿದ್ದರು. ಆದರೆ, ಓಟ ಪ್ರಾರಂಭವಾದ ಕೆಲವೇ ಕ್ಷಣಗಳಲ್ಲಿ ಚಪ್ಪಲಿಗಳು ಜಾರತೊಡಗಿದವು. ತಕ್ಷಣವೇ ಚಪ್ಪಲಿಯನ್ನು ಕೈಯಲ್ಲೇ ಹಿಡಿದುಕೊಂಡ ರಮಾಬಾಯಿ, ಬರಿಗಾಲಿನಲ್ಲೇ ಓಟವನ್ನು ಮುಂದುವರಿಸಿದರು. ಚೂಪಾದ ಕಲ್ಲುಗಳನ್ನು ಲೆಕ್ಕಿಸದೆ, ಒಂದೆಡೆ ತಮ್ಮ ಸೀರೆಯನ್ನು ಸರಿದೂಗಿಸಿಕೊಳ್ಳುತ್ತಲೇ ಇತರ ಸ್ಪರ್ಧಿಗಳನ್ನು ಹಿಂದಿಕ್ಕಿ ಮುನ್ನುಗ್ಗಿದರು. ಕೊನೆಗೆ ರಮಾಬಾಯಿ ಮೊದಲಿಗರಾಗಿ ಅಂತಿಮ ಗೆರೆ ದಾಟಿದಾಗ, ಅಲ್ಲಿದ್ದ ವೀಕ್ಷಕರೆಲ್ಲರೂ ಅವರ ಛಲವನ್ನು ಕಂಡು ಚಪ್ಪಾಳೆ ತಟ್ಟಿ ಹರ್ಷ ವ್ಯಕ್ತಪಡಿಸಿದರು.

ತಮ್ಮ ಗೆಲುವಿನ ಕುರಿತು ಮಾತನಾಡಿದ ರಮಾಬಾಯಿ, ಸ್ಪರ್ಧೆಯಲ್ಲಿ ಅನೇಕ ಮಹಿಳೆಯರು ಭಾಗವಹಿಸಿದ್ದರು, ಆದರೆ ಬಹುಮಾನ ಗೆಲ್ಲಲೇಬೇಕು ಎಂಬ ದೃಢ ಸಂಕಲ್ಪ ನನ್ನಲ್ಲಿತ್ತು. ಓಡುವಾಗ ನನಗೆ ನನ್ನ ಮಕ್ಕಳ ಭವಿಷ್ಯ ಮಾತ್ರ ಕಾಣಿಸುತ್ತಿತ್ತು. ಈ 3,000 ರೂಪಾಯಿ ಬಹುಮಾನದ ಹಣದಿಂದ ಮಕ್ಕಳಿಗೆ ಅಗತ್ಯವಿರುವ ಪುಸ್ತಕಗಳನ್ನು ಖರೀದಿಸುತ್ತೇನೆ ಎಂದು ಹೇಳಿದರು. ಈ ಮ್ಯಾರಥಾನ್‌ನಲ್ಲಿ ರಮಾಬಾಯಿ ಅವರ ಮಗಳು ಪೂಜಾ ಕೂಡ ಭಾಗವಹಿಸಿದ್ದು, ದ್ವಿತೀಯ ಸ್ಥಾನ ಪಡೆದುಕೊಂಡಿದ್ದಾರೆ. ಅಮ್ಮನನ್ನು ಸ್ಪರ್ಧೆಯಲ್ಲಿ ಭಾಗವಹಿಸುವಂತೆ ನಾನೇ ಪ್ರೇರೇಪಿಸಿದ್ದೆ, ಆದರೆ ಅವರು ಪ್ರಥಮ ಸ್ಥಾನ ಪಡೆಯುತ್ತಾರೆ ಎಂದು ನಾನು ಊಹಿಸಿರಲಿಲ್ಲ ಎಂದು ಪೂಜಾ ಸಂತಸ ಹಂಚಿಕೊಂಡಿದ್ದಾರೆ.

ಕಷ್ಟಕರ ಪರಿಸ್ಥಿತಿಗಳಿದ್ದರೂ ತಮ್ಮ ತಾಯಿ ಎಂದಿಗೂ ಧೈರ್ಯಗೆಡದೆ ತಮ್ಮನ್ನು ಬೆಳೆಸಿದ್ದಾರೆ ಎಂದು ಪೂಜಾ ತಿಳಿಸಿದರು. ಪೂಜಾ ಪ್ರಸ್ತುತ ಪೊಲೀಸ್ ನೇಮಕಾತಿ ಪರೀಕ್ಷೆಗೆ ಸಿದ್ಧತೆ ನಡೆಸುತ್ತಿದ್ದು, ಪೊಲೀಸ್ ಅಧಿಕಾರಿಯಾಗುವ ಕನಸು ಹೊಂದಿದ್ದಾರೆ. ಅವರ ತಂಗಿ ಬ್ಯಾಂಕಿಂಗ್ ಪರೀಕ್ಷೆಗಳಿಗೆ ಸಿದ್ಧರಾಗುತ್ತಿದ್ದಾರೆ. ಈ ಕುಟುಂಬವು ಮೊದಲು ಕೃಷಿ ಕೆಲಸವನ್ನು ನೆಚ್ಚಿಕೊಂಡಿತ್ತು. ನಂತರ ಮಕ್ಕಳ ಓದಿಗೆ ನೆರವಾಗಲು ರಮಾಬಾಯಿ ಅಕಾಡೆಮಿಯಲ್ಲಿ ಅಡುಗೆ ಕೆಲಸಕ್ಕೆ ಸೇರಿದ್ದರು. ಪೂಜಾ ಅವರ ಪರಿಶ್ರಮವನ್ನು ಕಂಡ ಅಕಾಡೆಮಿಯ ನಿರ್ದೇಶಕರು ಆಕೆಯ ಶೈಕ್ಷಣಿಕ ಶುಲ್ಕವನ್ನು ಸಂಪೂರ್ಣವಾಗಿ ಮನ್ನಾ ಮಾಡಿದ್ದಾರೆ. ರಮಾಬಾಯಿ ರಣವೀರ ಅವರಿಗೆ ಈ ಮ್ಯಾರಥಾನ್ ಗೆಲುವು ಕೇವಲ ಒಂದು ಓಟದ ಸ್ಪರ್ಧೆಯಾಗಿರಲಿಲ್ಲ. ದಿನವಿಡೀ ಅಡುಗೆಮನೆಯಲ್ಲಿ ಬೆವರಿಸಿ ಮಕ್ಕಳ ಶಿಕ್ಷಣಕ್ಕೆ ನೆರವಾಗುತ್ತಿದ್ದ ಅವರು, ಮಕ್ಕಳಿಗೆ ಪುಸ್ತಕಗಳನ್ನು ಕೊಡಿಸಲು ಬರಿಗಾಲಿನಲ್ಲಿ ಓಡಿ ಗೆದ್ದ ಆ ನಗದು ಬಹುಮಾನ ಅವರ ಮಾತೃವಾತ್ಸಲ್ಯ ಮತ್ತು ಛಲಕ್ಕೆ ಸಾಕ್ಷಿಯಾಗಿದೆ(ಏಜೆನ್ಸೀಸ್​).