Lottery Jackpot: ಸೂಪರ್ ಮಾರ್ಕೆಟ್ ಕೆಲಸಗಾರನಿಗೆ ಒಲಿಯಿತು 10 ಕೋಟಿ ಅದೃಷ್ಟ!

ಮಲಪ್ಪುರಂ ಜಿಲ್ಲೆಯ ಪರಪ್ಪನಂಗಡಿ ಮೂಲದ 51 ವರ್ಷದ ಎನ್.ವಿ. ಪದ್ಮನಾಭನ್ ಈ ಬೃಹತ್ ಮೊತ್ತದ ವಿಜೇತರು. ಕಳೆದ ಎಂಟು ವರ್ಷಗಳಿಂದ ಕೋಳಿಚೇನಾದ ಸೂಪರ್ ಮಾರ್ಕೆಟ್ ಒಂದರಲ್ಲಿ ಕೆಲಸ ಮಾಡುತ್ತಿದ್ದ ಇವರಿಗೆ ಮಂಗಳವಾರ ಬೆಳಗ್ಗೆ ಸಿಕ್ಕ ಸುದ್ದಿ ಇಡೀ ಕುಟುಂಬದಲ್ಲಿ ಹಬ್ಬದ ವಾತಾವರಣ ನಿರ್ಮಿಸಿದೆ. ಪದ್ಮನಾಭನ್ ಅವರಿಗೆ ಪತ್ನಿ ಸ್ಮಿತಾ ಮತ್ತು ಇಬ್ಬರು ಮಕ್ಕಳಿದ್ದಾರೆ (ಶ್ರೀಹರಿ ಮತ್ತು ಪಾರ್ವಣ).

ಪದ್ಮನಾಭನ್ ಅವರು ನಿತ್ಯ ಲಾಟರಿ ಖರೀದಿಸುವ ಹವ್ಯಾಸ ಹೊಂದಿದವರಲ್ಲ. ಕಳೆದ ಮಾರ್ಚ್ 26 ರಂದು ಅವರು ತಮಿಳುನಾಡಿನ ಕೊಯಮತ್ತೂರಿನಲ್ಲಿ ದೇವಸ್ಥಾನದ ದರ್ಶನ ಮುಗಿಸಿ ಕೇರಳಕ್ಕೆ ಮರಳುತ್ತಿದ್ದರು. ಈ ವೇಳೆ ಪಾಲಕ್ಕಾಡ್‌ನಲ್ಲಿ ಬಸ್ ನಿಂತಾಗ, ಅಲ್ಲಿ 'ಬಂಪರ್' ಎಡಿಷನ್ ಲಾಟರಿ ಮಾರಾಟವಾಗುತ್ತಿರುವುದನ್ನು ಕಂಡು ಕುತೂಹಲಕ್ಕೆ ಒಂದು ಟಿಕೆಟ್ ಖರೀದಿಸಿದ್ದರು. ಆ ಒಂದು ಟಿಕೆಟ್ (SB 517026) ಇಂದು ಅವರ ಬದುಕನ್ನೇ ಬದಲಿಸಿದೆ.

ಬಹುಮಾನ ಗೆದ್ದ ವಿಷಯ ತಿಳಿಯುತ್ತಿದ್ದಂತೆಯೇ ಪದ್ಮನಾಭನ್ ಅವರು ಪರಪ್ಪನಂಗಡಿಯ ಎಸ್‌ಬಿಐ (SBI) ಶಾಖೆಯ ವ್ಯವಸ್ಥಾಪಕರಿಗೆ ವಿನ್ನಿಂಗ್ ಟಿಕೆಟ್ ಅನ್ನು ಹಸ್ತಾಂತರಿಸಿದ್ದಾರೆ. ತೆರಿಗೆ ಮತ್ತು ಏಜೆಂಟ್ ಕಮಿಷನ್ ಕಳೆದು ಅವರಿಗೆ ಕೋಟ್ಯಂತರ ರೂಪಾಯಿ ಕೈ ಸೇರಲಿದೆ. ಮಧ್ಯಮ ವರ್ಗದ ಕುಟುಂಬಕ್ಕೆ ಈ ಹಣ ಆನೆಬಲ ತಂದಂತಾಗಿದ್ದು, ಮಕ್ಕಳ ಶಿಕ್ಷಣ ಮತ್ತು ಭವಿಷ್ಯಕ್ಕಾಗಿ ಈ ಹಣವನ್ನು ಬಳಸುವುದಾಗಿ ಕುಟುಂಬಸ್ಥರು ಸಂತಸ ಹಂಚಿಕೊಂಡಿದ್ದಾರೆ.

ಕೇರಳ ಲಾಟರಿ ಇತಿಹಾಸದಲ್ಲಿ ಇಂತಹ ಅನೇಕ ಬಡ ಕುಟುಂಬಗಳು ರಾತ್ರೋರಾತ್ರಿ ಶ್ರೀಮಂತರಾದ ಉದಾಹರಣೆಗಳಿವೆ. ಇದೀಗ ಪದ್ಮನಾಭನ್ ಅವರ ಸರದಿಯಾಗಿದ್ದು, ಇಡೀ ರಾಜ್ಯದ ಗಮನ ಸೆಳೆದಿದ್ದಾರೆ,(ಏಜೆನ್ಸೀಸ್​).