ಮುಂಭಾಗದ ಚಕ್ರವಿಲ್ಲದ ಸೈಕಲ್‌ನಲ್ಲಿ 7,000 ಕಿ.ಮೀ ಕ್ರಮಿಸಿದ ಯುವಕ: ಈ ಸಾಹಸ ಯಾತ್ರೆ ಹಿಂದಿದೆ ಒಂದೊಳ್ಳೆ ಉದ್ದೇಶ! Cycling

ನವದೆಹಲಿ: ಡ್ರಗ್ಸ್ ಮುಕ್ತ ಸಮಾಜದ ಸಂದೇಶ ಸಾರಲು ಕೇರಳದ ಸಾಹಸಿ ಯುವಕನೊಬ್ಬ ಮುಂಭಾಗದ ಚಕ್ರವೇ ಇಲ್ಲದ ಸೈಕಲ್‌ನಲ್ಲಿ ( Cycling ) ಬರೋಬ್ಬರಿ 11,000 ಕಿಲೋಮೀಟರ್ ದೂರದ ಸವಾಲಿನ ಪಯಣಕ್ಕೆ ನಾಂದಿ ಹಾಡಿದ್ದು, ಇಡೀ ದೇಶದ ಗಮನ ಸೆಳೆದಿದ್ದಾರೆ.

ಕೇರಳದಿಂದ ನೇಪಾಳದ ಎವರೆಸ್ಟ್ ಬೇಸ್ ಕ್ಯಾಂಪ್‌ವರೆಗೆ ಮುಂಭಾಗದ ಟೈರ್ ಇಲ್ಲದ ಸೈಕಲ್ ತುಳಿಯುತ್ತಿರುವ ಸಾಹಸಿ ಸನೀದ್ ಅವರ ಈ ವಿನೂತನ ಅಭಿಯಾನವು ಸದ್ಯ ದೇಶಾದ್ಯಂತ ಭಾರೀ ವೈರಲ್ ಆಗಿದ್ದು, ಯುವಜನತೆಗೆ ಮಾದರಿಯಾಗಿದೆ. ಸಿವಿಲ್ ಇಂಜಿನಿಯರಿಂಗ್ ಹಾಗೂ ಇಂಟೀರಿಯರ್ ಡಿಸೈನಿಂಗ್ ಪದವೀಧರರಾಗಿರುವ ಸನೀದ್, ವೃತ್ತಿಪರ ಬೈಕ್ ಸ್ಟಂಟರ್ ಕೂಡ ಹೌದು. ಭಾರತೀಯ ಸೇನೆಗೂ ಪರೇಡ್ ಸ್ಟಂಟ್‌ಗಳ ತರಬೇತಿ ನೀಡಿರುವ ಇವರು, ಮಾದಕ ದ್ರವ್ಯ ಸೇವನೆಯ ವಿರುದ್ಧ ಜನಜಾಗೃತಿ ಮೂಡಿಸಲು ಈ ಕಠಿಣ ಸಾಹಸವನ್ನು ಕೈಗೊಂಡಿದ್ದಾರೆ.

ಪ್ರಸ್ತುತ ತಮಿಳುನಾಡಿನ ತಿರುಚ್ಚಿರಾಪಳ್ಳಿಯ ಮೂಲಕ ತಮ್ಮ ಪಯಣ ಮುಂದುವರಿಸಿರುವ ಸನೀದ್, ಈಗಾಗಲೇ ಈ ಸಾಹಸಯಾತ್ರೆಯಲ್ಲಿ 7,000 ಕಿಲೋಮೀಟರ್‌ಗಳಿಗೂ ಅಧಿಕ ದೂರವನ್ನು ಯಶಸ್ವಿಯಾಗಿ ಕ್ರಮಿಸಿದ್ದಾರೆ. ಮುಂಭಾಗದ ಚಕ್ರವಿಲ್ಲದ ಕಾರಣ ಸೈಕಲ್‌ನ ಸಂಪೂರ್ಣ ಭಾರ ಹಾಗೂ ಸಮತೋಲನವನ್ನು ಕಾಪಾಡಿಕೊಳ್ಳುವುದು ಅಷ್ಟು ಸುಲಭವಲ್ಲವಾದರೂ, ದೃಢಸಂಕಲ್ಪದಿಂದ ಅವರು ಈ ಸವಾಲನ್ನು ಎದುರಿಸುತ್ತಿದ್ದಾರೆ. ಈ ಹಿಂದೆ ಕೇರಳದಿಂದ ಕಾಶ್ಮೀರದವರೆಗೆ ಇದೇ ರೀತಿ ಮುಂಭಾಗದ ಚಕ್ರವಿಲ್ಲದ ಸೈಕಲ್‌ನಲ್ಲಿ ಪ್ರಯಾಣಿಸಿ ಗಮನ ಸೆಳೆದಿದ್ದ ಅವರು, ಈಗ ಹಿಮಾಲಯದ ತಪ್ಪಲಿನತ್ತ ಹೆಜ್ಜೆಹಾಕಿದ್ದಾರೆ.

ಪ್ರತಿದಿನ ಸಾಮಾನ್ಯವಾಗಿ 50 ರಿಂದ 60 ಕಿಲೋಮೀಟರ್ ದೂರ ಕ್ರಮಿಸುವ ಸನೀದ್, ಒಮ್ಮೆ ಒಂದೇ ದಿನದಲ್ಲಿ ಬರೋಬ್ಬರಿ 150 ಕಿಲೋಮೀಟರ್ ಸೈಕಲ್ ತುಳಿದು ತಮ್ಮ ಗರಿಷ್ಠ ಸಾಮರ್ಥ್ಯ ಸಾಬೀತುಪಡಿಸಿದ್ದಾರೆ. ರಸ್ತೆಯ ಪರಿಸ್ಥಿತಿ ಮತ್ತು ಪ್ರತಿಕೂಲ ಹವಾಮಾನ, ವಿಶೇಷವಾಗಿ ಜೋರಾಗಿ ಬೀಸುವ ಗಾಳಿಯು ಈ ಪಯಣವನ್ನು ಮತ್ತಷ್ಟು ಕಷ್ಟಕರವಾಗಿಸುತ್ತದೆ ಎಂದು ಸನೀದ್​ ಅವರು ತಮ್ಮ ಅನುಭವ ಹಂಚಿಕೊಂಡಿದ್ದಾರೆ. ಇಷ್ಟೆಲ್ಲಾ ಕಷ್ಟಗಳ ನಡುವೆಯೂ ಹೆಲ್ಮೆಟ್, ಸುರಕ್ಷತಾ ಪರಿಕರಗಳು ಹಾಗೂ ಅಗತ್ಯ ಸಾಮಗ್ರಿಗಳೊಂದಿಗೆ ಅವರು ತಮ್ಮ ಅಭಿಯಾನವನ್ನು ಮುಂದುವರಿಸಿದ್ದಾರೆ.

ತಮ್ಮ ಸೈಕಲ್‌ನ ಹಿಂದೆ "Say no to drugs. World Record. Kerala to Everest Base Camp. Without Front Tyre" ಎಂಬ ಫಲಕವನ್ನು ಅಳವಡಿಸಿಕೊಂಡು ಅವರು ಜನರಿಗೆ ಎಚ್ಚರಿಕೆಯ ಸಂದೇಶ ಸಾರುತ್ತಿದ್ದಾರೆ. ಜೀವನದಲ್ಲಿ ಸಾಧನೆ ಮಾಡಲು ಯಾವುದೇ ಕೃತಕ ಉತ್ತೇಜಕಗಳು ಅಥವಾ ಡ್ರಗ್ಸ್ ಬೇಕಾಗಿಲ್ಲ, ಮನಸ್ಸಿಗೆ ಖುಷಿ ನೀಡುವ ಸತ್ಕಾರ್ಯಗಳ ಮೂಲಕ ಬದುಕನ್ನು ರೂಪಿಸಿಕೊಳ್ಳಿ ಎಂದು ಅವರು ಯುವ ಸಮೂಹಕ್ಕೆ ಕರೆ ನೀಡಿದ್ದಾರೆ. ಮಾದಕ ವ್ಯಸನದಿಂದ ಯುವಜನತೆ ದೂರವಿದ್ದು, ಆರೋಗ್ಯಕರ ಜೀವನ ಶೈಲಿ ಅಳವಡಿಸಿಕೊಳ್ಳಬೇಕು ಎಂಬುದೇ ಈ ಸುದೀರ್ಘ ಪಯಣದ ಏಕೈಕ ಉದ್ದೇಶವಾಗಿದೆ, (ಏಜೆನ್ಸೀಸ್​).