ದೇಶ

ಕೇರಳ ಸಿಎಂ ಕಚೇರಿಯಿಂದಲೇ ಬಿಜೆಪಿ ಗೆಲುವಿಗೆ ಸ್ಕೆಚ್..? ತ್ರಿಶೂರ್ ಪೂರಂ ಗಲಾಟೆಯ ಹಿಂದಿದೆಯಾ ಅಮಿತ್ ಷಾ-ಪಿಣರಾಯಿ ಒಪ್ಪಂದ..? | Kerala Election

Kerala Election
Kerala Election
Published on: 
Kerala Election: ಕೇರಳ ವಿಧಾನಸಭಾ ಚುನಾವಣೆಯ ಕಣ ಅಂತಿಮ ಹಂತಕ್ಕೆ ತಲುಪಿದ್ದು, ಏಪ್ರಿಲ್ 9ರ ಮತದಾನಕ್ಕೆ ಕೇವಲ ಎರಡು ದಿನ ಬಾಕಿ ಇರುವಾಗ ರಾಜಕೀಯ ಜಿದ್ದಾಜಿದ್ದಿ ತಾರಕಕ್ಕೇರಿದೆ. ಬಹಿರಂಗ ಪ್ರಚಾರದ ಅಂತಿಮ ದಿನವಾದ ಮಂಗಳವಾರ, ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಕೆ.ಸಿ. ವೇಣುಗೋಪಾಲ್, ಮುಖ್ಯಮಂತ್ರಿ ಪಿಣರಾಯಿ ವಿಜಯನ್​ಗೆ ಪತ್ರ ಬರೆಯುವ ಮೂಲಕ ಎಲ್‌ಡಿಎಫ್ ಸರ್ಕಾರದ ವಿರುದ್ಧ ಗಂಭೀರ ಆರೋಪಗಳ ಸುರಿಮಳೆಗೈದಿದ್ದಾರೆ.

ವೇಣುಗೋಪಾಲ್​ ತಮ್ಮ ಪತ್ರದಲ್ಲಿ ಉಲ್ಲೇಖಿಸಿರುವ ಪ್ರಮುಖ ಪ್ರಶ್ನೆಗಳು

1. ಕೇಂದ್ರ ಗೃಹ ಸಚಿವ ಅಮಿತ್ ಷಾ ಅವರನ್ನು ದೆಹಲಿಯ ನಿವಾಸದಲ್ಲಿ ಯಾವುದೇ ಅಧಿಕಾರಿಗಳಿಲ್ಲದೆ ಭೇಟಿ ಮಾಡಿದ ಹಿಂದಿನ ರಹಸ್ಯ ಕಾರ್ಯಸೂಚಿ ಏನು? ಅಲ್ಲಿ ಯಾವುದಾದರೂ ಒಪ್ಪಂದ ಮಾಡಿಕೊಳ್ಳಲಾಗಿದೆಯೇ?
2. ದೆಹಲಿಯ ಕೇರಳ ಹೌಸ್‌ನಲ್ಲಿ ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರಿಗೆ ಅಧಿಕಾರಿಗಳಿಲ್ಲದೆ ಉಪಾಹಾರ ಸಭೆ ಆಯೋಜಿಸಿದ್ದು ಏಕೆ? ಅಲ್ಲಿ ಯಾವ ಒಪ್ಪಂದವನ್ನು ಅಂತಿಮಗೊಳಿಸಲಾಯಿತು?
3. ಕೇಂದ್ರ ಸಚಿವ ನಿತಿನ್ ಗಡ್ಕರಿ ಅವರೊಂದಿಗೆ ದೆಹಲಿಯಲ್ಲಿ ಅಧಿಕೃತ ಸಭೆ ನಡೆಸಿದ್ದೀರಿ, ಆದರೆ ಅವರನ್ನು ದೆಹಲಿಯ ಹೊರಗೆ ಭೇಟಿ ಮಾಡಿದ್ದೀರಾ? ಅದರ ಉದ್ದೇಶವೇನು? ಅದು ಒಪ್ಪಂದದ ಭಾಗವೇ?
4. ಸಿಪಿಐ ಮತ್ತು ಅದರ ಮಂತ್ರಿಗಳ ವಿರೋಧದ ಹೊರತಾಗಿಯೂ, ಮಿತ್ರಪಕ್ಷಗಳನ್ನು ಕತ್ತಲೆಯಲ್ಲಿಟ್ಟು ಕೇರಳದಲ್ಲಿ ಪಿಎಂ ಶ್ರೀ ಯೋಜನೆಯನ್ನು ಜಾರಿಗೆ ತರಲು ಬಿಜೆಪಿಯೊಂದಿಗೆ ಒಪ್ಪಂದ ಮಾಡಿಕೊಂಡಿದ್ದು ಏಕೆ?
5. ಎಲ್‌ಡಿಎಫ್ ಮಿತ್ರಪಕ್ಷಗಳನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳದೆ ಅತ್ಯಂತ ಗೌಪ್ಯವಾಗಿ ಕಾರ್ಮಿಕ ಸಂಹಿತೆಗಳನ್ನು ಜಾರಿಗೆ ತಂದದ್ದು ಏಕೆ? ಕಾರ್ಮಿಕ ಸಂಘಗಳ ನೋಂದಣಿ ಶುಲ್ಕವನ್ನು 1,000 ರೂ.ಗಳಿಂದ 10,000 ರೂ.ಗಳಿಗೆ ಹೆಚ್ಚಿಸಿದ್ದು ಯಾರನ್ನು ತೃಪ್ತಿಪಡಿಸಲು?
6. ಎಸ್‌ಎನ್‌ಸಿ-ಲಾವಲಿನ್ ಪ್ರಕರಣದಲ್ಲಿ ಸುಪ್ರೀಂ ಕೋರ್ಟ್‌ನಲ್ಲಿ 40 ಕ್ಕೂ ಹೆಚ್ಚು ಬಾರಿ ವಿಚಾರಣೆ ಮುಂದೂಡಿಕೆಯಾಗಿರುವುದು ಕೇಂದ್ರ ಸರ್ಕಾರದಿಂದ ಬಂದ ಪ್ರತಿಫಲವೇ? ನಿಮ್ಮ ಕುಟುಂಬದ ಹಿತಾಸಕ್ತಿ ರಕ್ಷಿಸಲು ಪ್ರಧಾನಿ ಮೋದಿಯನ್ನು ಟೀಕಿಸಲು ಹಿಂಜರಿಯುತ್ತಿದ್ದೀರಾ?
7. ಎಕ್ಸಲಾಜಿಕ್ ಸೊಲ್ಯೂಷನ್ಸ್ ಮಾಸಿಕ ಪಾವತಿ ಪ್ರಕರಣದಲ್ಲಿ ತನಿಖೆಯನ್ನು ಸ್ಥಗಿತಗೊಳಿಸಲು ಕೇಂದ್ರದೊಂದಿಗೆ ಮಾಡಿಕೊಂಡ ಒಪ್ಪಂದದ ನಿಯಮಗಳೇನು? ನಿಮ್ಮ ಮಗನ ವಿರುದ್ಧದ ಇಡಿ ನೋಟಿಸ್‌ನ ಪ್ರಸ್ತುತ ಸ್ಥಿತಿ ಏನು?
8. ತ್ರಿಶೂರ್ ಲೋಕಸಭಾ ಕ್ಷೇತ್ರದಲ್ಲಿ ಬಿಜೆಪಿ ಗೆಲುವಿಗೆ ಮತ್ತು ತ್ರಿಶೂರ್ ಪೂರಂ ಅಡ್ಡಿಪಡಿಸಲು ಅನುಕೂಲ ಮಾಡಿಕೊಟ್ಟ ಆರೋಪ ಎದುರಿಸುತ್ತಿರುವ ಎಡಿಜಿಪಿ ಎಂ.ಆರ್. ಅಜಿತ್ ಕುಮಾರ್ ಅವರನ್ನು ಯಾರ ಸೂಚನೆಯ ಮೇರೆಗೆ ರಕ್ಷಿಸುತ್ತಿದ್ದೀರಿ?
9. ಶ್ರೀ ಎಂ ಅವರ ಮಧ್ಯಸ್ಥಿಕೆಯಲ್ಲಿ ರಾಜಧಾನಿಯ ಸ್ಟಾರ್ ಹೋಟೆಲ್‌ನಲ್ಲಿ ನಿಮ್ಮ ಮತ್ತು ಬಿಜೆಪಿ ನಾಯಕರ ನಡುವೆ ನಡೆದ ಒಪ್ಪಂದದ ವಿವರಗಳನ್ನು ಸಾರ್ವಜನಿಕರಿಗೆ ಬಹಿರಂಗಪಡಿಸುವ ಧೈರ್ಯ ನಿಮಗಿದೆಯೇ?
10. ಮಾಜಿ ಪ್ರಧಾನ ಕಾರ್ಯದರ್ಶಿ ಒಳಗೊಂಡ ಚಿನ್ನ ಮತ್ತು ಡಾಲರ್ ಕಳ್ಳಸಾಗಣೆ ಪ್ರಕರಣಗಳ ತನಿಖೆ ಅರ್ಧದಲ್ಲೇ ಏಕೆ ಸ್ಥಗಿತಗೊಂಡಿತು? ಈ ತನಿಖೆಯ ವಿರುದ್ಧ ನಿಮ್ಮ ಸರ್ಕಾರ ನೇಮಿಸಿದ ನ್ಯಾಯಮೂರ್ತಿ ವಿ.ಕೆ. ಮೋಹನನ್ ಆಯೋಗ ಈಗ ಎಲ್ಲಿದೆ?.
ಈ ಎಲ್ಲಾ ಪ್ರಶ್ನೆಗಳಿಗೆ ಮುಖ್ಯಮಂತ್ರಿಗಳಿಂದ ಶೀಘ್ರ ಪ್ರತಿಕ್ರಿಯೆ ನಿರೀಕ್ಷಿಸುತ್ತಿರುವುದಾಗಿ ವೇಣುಗೋಪಾಲ್ ತಿಳಿಸಿದ್ದು, ಸದ್ಯಕ್ಕೆ ಈ ಆರೋಪಗಳಿಗೆ ಮುಖ್ಯಮಂತ್ರಿ ಕಚೇರಿಯಿಂದಾಗಲಿ ಅಥವಾ ಸಿಪಿಐ(ಎಂ)ನಿಂದಾಗಲಿ ಯಾವುದೇ ತಕ್ಷಣದ ಪ್ರತಿಕ್ರಿಯೆ ಲಭ್ಯವಾಗಿಲ್ಲ(ಏಜೆನ್ಸೀಸ್​​).
Pinarayi Vijayan
KC Venugopal
kerala election
congressvsldf
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net