ಅಯ್ಯೋ... ನಿಮಗೆ ಅರ್ಥವಾಗುತ್ತೋ ಇಲ್ವೋ? ವೈರಮುತ್ತುಗೆ ಅಭಿನಂದಿಸಿದ 'ತಲೈವಾ'ಗೆ ಗಾಯಕಿ ಚಿನ್ಮಯಿ ಕ್ಲಾಸ್​!

ಚೆನ್ನೈ: ಜ್ಞಾನಪೀಠ ಪ್ರಶಸ್ತಿ ಭಾರತೀಯ ಸಾಹಿತ್ಯದಲ್ಲೇ ಅತ್ಯುನ್ನತ ಪ್ರಶಸ್ತಿ. ದಶಕಗಳ ಬಳಿಕ ತಮಿಳು ಸಾಹಿತಿ, ಬರಹಗಾರರಾದ ವೈರಮುತ್ತು ಅವರಿಗೆ ಈ ಗೌರವ ಲಭಿಸಿದೆ. ಅವರ ಹೆಸರು ಕೇಳಿದೊಡನೆ, ರಾಜಕೀಯ ಹಾಗೂ ಚಿತ್ರರಂಗದ ಗಣ್ಯರು, ತಮಿಳುನಾಡಿಗೆ ಇದು ಹೆಮ್ಮೆಯ ವಿಷಯವಾಗಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಆದರೆ, ಮತ್ತೊಂದೆಡೆ ಇದು ಭಾರೀ ವಿವಾದಕ್ಕೆ ಕಾರಣವಾಗಿದೆ.

ಪ್ರಸ್ತುತ ಪರಿಸ್ಥಿತಿ ಭಿನ್ನವಾಗಿದೆ. ಈ ವರ್ಷ ವೈರಮುತ್ತು ಅವರಿಗೆ ಜ್ಞಾನಪೀಠ ಘೋಷಿಸಿದ ಬೆನ್ನಲ್ಲೇ ಅನೇಕರು ವಿರೋಧ ಮತ್ತು ಖಂಡಿಸುತ್ತಿದ್ದಾರೆ. 2018ರಲ್ಲಿ #MeToo ಹೋರಾಟ ಈಗ ಮತ್ತೆ ಮುನ್ನೆಲೆಗೆ ಬಂದಿದೆ. ವೈರಮುತ್ತು ಹೆಸರು ಪ್ರಶಸ್ತಿಗೆ ಆಯ್ಕೆಯಾಗಿರುವುದನ್ನು ಸುತರಾಮ್​ ಒಪ್ಪದ ಗಾಯಕಿ ಚಿನ್ಮಯಿ ಶ್ರೀಪಾದ, ಸಾಮಾಜಿಕ ಜಾಲತಾಣದ ಮೂಲಕ ತಮ್ಮ ಅಸಮಾಧಾನವನ್ನು ಹೊರಹಾಕಿದ್ದಾರೆ.

ಈ ಹಿಂದೆ ಅನೇಕ ಹೆಣ್ಣಮಕ್ಕಳು, ವೈರಮುತ್ತು ಮೇಲೆ ಲೈಂಗಿಕ ಕಿರುಕುಳದ ಆರೋಪ ಮಾಡಿದ್ದಾರೆ. ಇಷ್ಟೆಲ್ಲ ಕಣ್ಣು ಮುಂದೆಯೇ ನಡೆದಿದ್ದರೂ, ಇಂಥಾ ವ್ಯಕ್ತಿಗೆ ಏಕೆ ಪ್ರಶಸ್ತಿ ಕೊಡುತ್ತಿದ್ದೀರಿ? ವೈರಮುತ್ತುಗೆ ಗಣ್ಯರು ಮತ್ತು ಸಿನಿಮಾದ ಹಿರಿಯ ನಟರು ಶುಭಕೋರಿರುವುದು ಒಪ್ಪುವಂತದ್ದಲ್ಲ ಎಂದು ತೀವ್ರ ಕಿಡಿಕಾರಿದ್ದಾರೆ.

“ಬೇರೆ ಬೇರೆ ವಯಸ್ಸಿನ ಮಹಿಳೆಯರು ತಮಗೆ ಈತನಿಂದ ಲೈಂಗಿಕ ಕಿರುಕುಳ ಉಂಟಾಗಿದೆ ಎಂದು ದೂರಿದ ವ್ಯಕ್ತಿಗೆ ಈಗ ದೇಶದ ಅತ್ಯುನ್ನತ ಸಾಹಿತ್ಯ ಪ್ರಶಸ್ತಿ ಕೊಡಲಾಗುತ್ತಿದೆ ಎಂಬ ವಿಷಯ ಕೇಳಿ ನನಗೆ ತುಂಬ ಶಾಕ್​ ಆಗಿದೆ. 2002ರಲ್ಲಿ ಜ್ಞಾನಪೀಠ ಪಡೆದ ದಿವಂಗತ ಬರಹಗಾರ ಜಯಕಾಂತನ್ ಅವರ ಪುತ್ರಿ, ಇದೇ ವೈರಮುತ್ತು ತನ್ನ ತಂದೆಯ ಹೆಸರಿನಲ್ಲಿ ನಕಲಿ ಮೆಚ್ಚುಗೆ ಪತ್ರ ರಚಿಸಿದ್ದಾಗಿ ಆರೋಪಿಸಿದ್ದಾರೆ ಎಂದರು.

ಇನ್ನು ಲೇಖಕಿ ಮೀನಾ ಕಂದಸಾಮಿ ಅವರು, 2023ರಲ್ಲಿ ತಮ್ಮ ಎಕ್ಸ್ (ಟ್ವಿಟ್ಟರ್) ಖಾತೆಯಲ್ಲಿ ಮಾಡಿದ್ದ ಪೋಸ್ಟ್ ಅನ್ನು ರೀ-ಶೇರ್​ ಮಾಡಿಕೊಂಡಿದ್ದು, “ಉನ್ನತ ರಾಜಕಾರಣಿಗಳು ವೈರಮುತ್ತು ಅವರೊಂದಿಗೆ ಒಡನಾಟ ಇಟ್ಟುಕೊಂಡಿರುವುದು ಸರಿಯಲ್ಲ” ಎಂದು ಟೀಕಿಸಿದ್ದಾರೆ. “ತಮಿಳಿನಲ್ಲಿ ಉತ್ತಮ ಸಾಹಿತ್ಯಕ್ಕೆ ಕೊರತೆಯಿಲ್ಲ. ಆದರೆ, ಈ ಪ್ರಶಸ್ತಿ ಪಡೆದ ಮೂವರು ತಮಿಳು ಬರಹಗಾರರಲ್ಲಿ ಜಯಕಾಂತನ್ ಮಾತ್ರ ನಿಜವಾದ ಸಾಹಿತಿ” ಎಂದು ಸುಚಿತ್ರಾ ವಾದಿಸಿದ್ದಾರೆ.

ಸದ್ಯ ತಮಿಳುನಾಡಿನಲ್ಲಿ ವೈರಮುತ್ತು ಹೆಸರು ಪ್ರಶಸ್ತಿಗೆ ಆಯ್ಕೆ ಆಗಿರುವುದಕ್ಕೆ ಮೆಚ್ಚುಗೆಗಳಗಿಂತ ಟೀಕೆ, ವಿರೋಧವೇ ಹೆಚ್ಚಾಗಿ ಸದ್ದು ಮಾಡುತ್ತಿದೆ. ಇಲ್ಲಿ ಸಾಹಿತ್ಯ ಪ್ರಶಸ್ತಿಗೆ ಸಾಹಿತ್ಯವೇ ಮುಖ್ಯವೋ ಅಥವಾ ವ್ಯಕ್ತಿಗತ ಇತಿಹಾಸ ಮುಖ್ಯವೋ ಎಂಬ ಪ್ರಶ್ನೆ ಸಾಹಿತ್ಯ ಲೋಕದಲ್ಲಿ ಭಾರೀ ಸದ್ದು ಮಾಡಲಾರಂಭಿಸಿದೆ. ಈ ವಿವಾದ ಯಾವ ಹಂತಕ್ಕೆ ಹೋಗಿ ತಲುಪಲಿದೆ ಎಂಬುದನ್ನು ಕಾದು ನೋಡಬೇಕಿದೆ,(ಏಜೆನ್ಸೀಸ್).