Kirti Azad | ಅನುರಾಗ್ ಠಾಕೂರ್ ಆರೋಪಕ್ಕೆ ಪುಷ್ಠಿ...ಸದನದಲ್ಲಿ ಧೂಮಪಾನ ಮಾಡಿದರಾ ಸಂಸದ ಕೀರ್ತಿ ಆಜಾದ್..? ಇಲ್ಲಿದೆ ನೋಡಿ ವಿಡಿಯೋ

ಸುಮಾರು 35 ಸೆಕೆಂಡುಗಳ ಈ ವಿಡಿಯೋದಲ್ಲಿ ಆಜಾದ್ ಲೋಕಸಭೆಯೊಳಗೆ ಕುಳಿತು ಧೂಮಪಾನ ಮಾಡುವಂತೆ ಕಾಣುವ ಸನ್ನೆಯನ್ನು ಮಾಡುತ್ತಿದ್ದರು, ಅವರು ತಮ್ಮ ಬಲಗೈಯನ್ನು ಬಾಯಿಗೆ ತಂದು ಸುಮಾರು ಐದು ಸೆಕೆಂಡುಗಳ ಕಾಲ ಅದನ್ನು ಹಾಗೆಯೇ ಹಿಡಿದಿದ್ದರು. ಬಿಜೆಪಿ ನಾಯಕರು ಹಂಚಿಕೊಂಡಿರುವ ಕ್ಲಿಪ್‌ನಲ್ಲಿ ಸಿಗರೇಟ್, ಇ-ಸಿಗರೇಟ್ ಅಥವಾ ಯಾವುದೇ ಹೊಗೆ ಕಾಣುತ್ತಿಲ್ಲ.

ಸಂಸತ್ತಿನ ಚಳಿಗಾಲದ ಅಧಿವೇಶನದ ಸಮಯದಲ್ಲಿ ತೃಣಮೂಲ ಕಾಂಗ್ರೆಸ್ ಸಂಸದರೊಬ್ಬರು ಲೋಕಸಭೆಯ ಆವರಣದೊಳಗೆ ಇ-ಸಿಗರೇಟ್ ಅಥವಾ ವೇಪ್ ಸೇದುತ್ತಿದ್ದಾರೆ ಎಂದು ಬಿಜೆಪಿ ಸಂಸದ ಅನುರಾಗ್ ಠಾಕೂರ್ ಆರೋಪಿಸಿದ್ದರು. ಯಾವ ಸದಸ್ಯರ ಹೆಸರನ್ನು ಉಲ್ಲೇಖಿಸದೆ ಈ ವಿಷಯವನ್ನು ಪ್ರಸ್ತಾಪಿಸಿದ್ದ ಠಾಕೂರ್​, ಉಲ್ಲಂಘನೆಯನ್ನು ಗಮನಿಸುವಂತೆ ಲೋಕಸಭಾ ಸ್ಪೀಕರ್ ಓಂ ಬಿರ್ಲಾ ಅವರನ್ನು ಒತ್ತಾಯಿಸಿದರು.

ಇಡೀ ದೇಶದಲ್ಲಿ ಇ-ಸಿಗರೇಟ್‌ಗಳನ್ನು ನಿಷೇಧಿಸಲಾಗಿದೆ, ಹೀಗಿದ್ದಾಗ ಲೋಕಸಭೆಯ ಸ್ಪೀಕರ್ ಸದನದಲ್ಲಿ ಇ-ಸಿಗರೇಟ್ ಸೇದಲು ಅವರು ಅನುಮತಿ ನೀಡಿದ್ದಾರೆಯೇ ಎಂದು ಕೇಳಲು ಬಯಸುತ್ತೇನೆ. ಟಿಎಂಸಿ ಸಂಸದರೊಬ್ಬರು ಇಲ್ಲಿ ಅನೇಕ ದಿನಗಳಿಂದ ಈ ಕಾರ್ಯದಲ್ಲಿ ತೊಡಗಿದ್ದಾರೆ ಎಂದು ಠಾಕೂರ್​ ಆರೋಪಿಸಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿದ ಬಿರ್ಲಾ, ಸಂಸತ್ ಸದಸ್ಯರು ಸದನದೊಳಗೆ ಧೂಮಪಾನ ಮಾಡಲು ಅನುಮತಿಸುವ ನಿಯಮ ಅಥವಾ ಪೂರ್ವನಿದರ್ಶನವಿಲ್ಲ ಎಂದು ಹೇಳಿದರು. ಅಂತಹ ಘಟನೆಯನ್ನು ಸ್ಪಷ್ಟ ಸಾಕ್ಷಿಯೊಂದಿಗೆ0 ನನ್ನ ಗಮನಕ್ಕೆ ತಂದರೆ, ಸೂಕ್ತ ಕ್ರಮ ಕೈಗೊಳ್ಳುತ್ತೇನೆ ಎಂದು ಭರವಸೆ ನೀಡಿದರು.

ಇ-ಸಿಗರೇಟ್‌ಗಳು ಎಲೆಕ್ಟ್ರಾನಿಕ್ ಸಾಧನಗಳಾಗಿದ್ದು, ಬಳಕೆದಾರರು ಉಸಿರಾಡುವ ಏರೋಸಾಲ್​​ನ್ನು ಉತ್ಪಾದಿಸಲು ದ್ರವವನ್ನು ಬಿಸಿ ಮಾಡುತ್ತವೆ. ಈ ದ್ರವವು ಸಾಮಾನ್ಯವಾಗಿ ನಿಕೋಟಿನ್, ಸುವಾಸನೆ ನೀಡುವ ಏಜೆಂಟ್‌ಗಳು ಮತ್ತು ಇತರ ರಾಸಾಯನಿಕಗಳನ್ನು ಹೊಂದಿರುತ್ತದೆ. ಸಾಂಪ್ರದಾಯಿಕ ಸಿಗರೇಟ್‌ಗಳಿಗಿಂತ ಭಿನ್ನವಾಗಿ, ಇ-ಸಿಗರೇಟ್‌ಗಳು ತಂಬಾಕನ್ನು ಸುಡುವುದಿಲ್ಲ, ಆದರೆ ಅವು ಇನ್ನೂ ನಿಕೋಟಿನ್ ಅನ್ನು ನೀಡುತ್ತವೆ, ಇದು ವ್ಯಸನಕಾರಿಯಾಗಿದೆ ಮತ್ತು ಬಳಕೆದಾರರಿಗೆ ಹಾನಿಕಾರಕವಾಗಿದೆ. ಇದನ್ನು ಬಳಸುವುದರಿಂದ ಅಪಾಯಗಳು ಎದುರಾಗಬಹುದು ಎಂದು ವೈದ್ಯರು ಎಚ್ಚರಿಸಿದ್ದರೂ ಕೂಡ ಅವುಗಳನ್ನು ಧೂಮಪಾನಕ್ಕೆ ಪರ್ಯಾಯವಾಗಿ ಮಾರಾಟ ಮಾಡಲಾಗುತ್ತದೆ(ಏಜೆನ್ಸೀಸ್​).