ಹರಟೆ ಹೊಡೆಯುತ್ತಿದ್ದವರ ಮೇಲೆ ಎರಗಿದ ನಾಯಿ: ಸಿಸಿಟಿವಿಯಲ್ಲಿ ಸೆರೆಯಾಯ್ತು ಸಾವು-ಬದುಕಿನ ಹೋರಾಟ; ವಿಡಿಯೋ ವೈರಲ್​! Viral Video

ವೈರಲ್​: ಇತ್ತೀಚೆಗೆ ಸಾಮಾಜಿಕ ಜಾಲತಾಣವಾದ X (ಟ್ವಿಟರ್) ನಲ್ಲಿ ವೈರಲ್ ಆಗುತ್ತಿರುವ ಒಂದು ಸಿಸಿಟಿವಿ ದೃಶ್ಯ ನೋಡಿದರೆ ಎಂತಹವರಿಗೂ ಎದೆನಡುಕ ಉಂಟಾಗುವುದು ಗ್ಯಾರಂಟಿ. ಯಾವುದೇ ಪ್ರಚೋದನೆ ಇಲ್ಲದಿದ್ದರೂ ನಾಯಿಯೊಂದು ಜನರ ಮೇಲೆ ಸತತವಾಗಿ ನಡೆಸಿದ ಭೀಕರ ದಾಳಿಯ ವಿಡಿಯೋ (Viral Video) ಈಗ ಸಾರ್ವಜನಿಕ ಸುರಕ್ಷತೆಯ ಬಗ್ಗೆ ದೊಡ್ಡ ಪ್ರಶ್ನೆಯನ್ನು ಹುಟ್ಟುಹಾಕಿದೆ.

ವೈರಲ್ ಆಗಿರುವ ಈ ವಿಡಿಯೋ ಕ್ಲಿಪ್‌ನಲ್ಲಿ ಮೂವರು ವ್ಯಕ್ತಿಗಳು ಹೊರಗಡೆ ಕುಳಿತು ಹರಟೆ ಹೊಡೆಯುತ್ತಿರುವುದು ಕಾಣಿಸುತ್ತದೆ. ಸುತ್ತಮುತ್ತ ಯಾವುದೇ ಅಪಾಯದ ಮುನ್ಸೂಚನೆ ಇರಲಿಲ್ಲ. ಆದರೆ, ಅಷ್ಟರಲ್ಲೇ ಎಲ್ಲಿಂದಲೋ ಬಂದ ನಾಯಿಯೊಂದು ಮಿಂಚಿನ ವೇಗದಲ್ಲಿ ಹಿಂದಿನಿಂದ ಬಂದು ಕುಳಿತಿದ್ದ ವ್ಯಕ್ತಿಯ ಮೇಲೆರಗುತ್ತದೆ. ಆ ದಾಳಿಯ ತೀವ್ರತೆಗೆ ಆ ವ್ಯಕ್ತಿ ಕುಳಿತಿದ್ದ ಕುರ್ಚಿಯಿಂದಲೇ ಕೆಳಕ್ಕೆ ಉರುಳುತ್ತಾನೆ.

ಈ ವಿಡಿಯೋ ಆನ್‌ಲೈನ್‌ನಲ್ಲಿ ಹರಿದಾಡುತ್ತಿದ್ದಂತೆ ಜನರಲ್ಲಿ ರೇಬೀಸ್ ರೋಗದ ಬಗ್ಗೆ ಭೀತಿ ಶುರುವಾಗಿದೆ. ನಾಯಿಯ ಅಸಹಜ ನಡವಳಿಕೆಯನ್ನು ಕಂಡ ನೆಟ್ಟಿಗರು ಇದು ರೇಬೀಸ್ ಲಕ್ಷಣ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಆ ನಾಯಿಗೆ ರೇಬೀಸ್ ಇರುವುದು ನೂರಕ್ಕೆ ನೂರು ಖಚಿತ. ಕಚ್ಚಿಸಿಕೊಂಡವರು ತಕ್ಷಣ ಆಸ್ಪತ್ರೆಗೆ ಧಾವಿಸಬೇಕು, ಎಂದು ಒಬ್ಬ ಬಳಕೆದಾರರು ಕಳವಳ ವ್ಯಕ್ತಪಡಿಸಿದ್ದಾರೆ. ಇನ್ನೊಬ್ಬರು ತಮ್ಮ ಅಸಹಾಯಕತೆಯನ್ನು ತೋಡಿಕೊಂಡಿದ್ದು, ನಾನು ಯಾವಾಗಲೂ ಬೀದಿಯಲ್ಲಿ ನಡೆಯುವಾಗ ಕಬ್ಬಿಣದ ವಾಕಿಂಗ್ ಸ್ಟಿಕ್ ಇಟ್ಟುಕೊಳ್ಳುತ್ತೇನೆ ಎಂದು ಬರೆದುಕೊಂಡಿದ್ದಾರೆ.

ಪಶುವೈದ್ಯಕೀಯ ತಜ್ಞರ ಪ್ರಕಾರ, ಒಂದು ಪ್ರಾಣಿ ಯಾವುದೇ ಕಾರಣವಿಲ್ಲದೆ ಅತಿಯಾದ ಆಕ್ರಮಣಶೀಲತೆ ತೋರಿಸುತ್ತಿದ್ದರೆ, ಅದು ರೇಬೀಸ್ ವೈರಲ್ ಸೋಂಕಿನ ಲಕ್ಷಣವಾಗಿರಬಹುದು. ರೇಬೀಸ್ ಎನ್ನುವುದು ಪ್ರಾಣಿಗಳ ಕಡಿತ ಅಥವಾ ಅವುಗಳ ಲಾಲಾರಸದ ಮೂಲಕ ಹರಡುವ ಮಾರಕ ಕಾಯಿಲೆ.

ಇದು ಮನುಷ್ಯನ ನರಮಂಡಲದ ಮೇಲೆ ನೇರ ಪರಿಣಾಮ ಬೀರುತ್ತದೆ. ಒಂದು ಬಾರಿ ರೋಗದ ಲಕ್ಷಣಗಳು ಕಾಣಿಸಿಕೊಂಡರೆ ಚಿಕಿತ್ಸೆ ನೀಡುವುದು ಕಷ್ಟವಾಗುತ್ತದೆ. ಆದ್ದರಿಂದ ನಾಯಿ ಅಥವಾ ಯಾವುದೇ ಪ್ರಾಣಿ ಕಚ್ಚಿದ ತಕ್ಷಣ ಅಧುನಿಕ ವೈದ್ಯಕೀಯ ಚಿಕಿತ್ಸೆ ಪಡೆದುಕೊಳ್ಳುವುದು ಅನಿವಾರ್ಯ.

ಭಾರತದಂತಹ ದೇಶಗಳಲ್ಲಿ ಬೀದಿ ನಾಯಿಗಳ ಸಂಖ್ಯೆ ಹೆಚ್ಚಿರುವುದರಿಂದ ಈ ಸಮಸ್ಯೆ ಕೇವಲ ಒಂದು ವಿಡಿಯೋಗೆ ಸೀಮಿತವಾಗಿಲ್ಲ. ಬೀದಿ ಪ್ರಾಣಿಗಳ ನಿರ್ವಹಣೆ ಮತ್ತು ರೇಬೀಸ್ ಮುಕ್ತ ಭಾರತ ನಿರ್ಮಾಣದ ಬಗ್ಗೆ ಸರ್ಕಾರಗಳು ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಬೇಕಿದೆ. ಅಲ್ಲಿಯವರೆಗೆ, ಹೊರಗಡೆ ಓಡಾಡುವಾಗ ಮತ್ತು ಮನೆಯ ಸುತ್ತಮುತ್ತ ಅಸಹಜವಾಗಿ ವರ್ತಿಸುವ ಪ್ರಾಣಿಗಳ ಬಗ್ಗೆ ಸಾರ್ವಜನಿಕರು ತೀವ್ರ ಎಚ್ಚರಿಕೆ ವಹಿಸುವುದು ಉತ್ತಮ,(ಏಜನ್ಸೀಸ್​).