ಚುನಾವಣೆಗೂ ಮುನ್ನವೇ ತಮಿಳುನಾಡಿನ 1.31 ಕೋಟಿ ಮಹಿಳೆಯರ ಖಾತೆಗೆ ತಲಾ 5 ಸಾವಿರ ರೂ. ಹಣ ಹಾಕಿದ ಸಿಎಂ ಎಂ.ಕೆ.ಸ್ಟಾಲಿನ್ | CM M K Stalin

ಚೆನ್ನೈ: ಕೆಲವೇ ತಿಂಗಳಲ್ಲಿ ನಡೆಯಲಿರುವ ತಮಿಳುನಾಡು ವಿಧಾನಸಭೆ ಚುನಾವಣೆಗೂ ಮುನ್ನವೇ ಅಡ್ವಾನ್ಸ್​ ಆಗಿ ಸಿಎಂ ಎಂ.ಕೆ.ಸ್ಟಾಲಿನ್(CM M K Stalin) ನೇತೃತ್ವದ ಡಿಎಂಕೆ ಸರ್ಕಾರ, ರಾಜ್ಯದಲ್ಲಿನ 1.31 ಕೋಟಿ ಮಹಿಳೆಯರ ಖಾತೆಗೆ ಇಂದು(ಫೆ. 13) ತಲಾ 5000 ರೂ. ಹಣವನ್ನು ಅವರ ಬ್ಯಾಂಕ್​ ಖಾತೆಗಳಿಗೆ ಜಮೆ ಮಾಡಿದೆ. 

2021ರಲ್ಲಿ ಅಧಿಕಾರಕ್ಕೆ ಬಂದ ಡಿಎಂಕೆ ರಾಜ್ಯದಲ್ಲಿ ಬಿಪಿಎಲ್ ಕಾರ್ಡ್ ಹೊಂದಿದ ಮನೆಯ ಒಬ್ಬ ಮಹಿಳೆಗೆ ಪ್ರತಿ ತಿಂಗಳು ಒಂದು ಸಾವಿರ ರೂ. ನೀಡುವ ಕಲೈನಾರ್ ಮಹಿಳಾ ಹಕ್ಕುಗಳು ಯೋಜನೆಯನ್ನು ಜಾರಿಗೆ ತಂದಿತ್ತು. ಈ ಅದೇ ಯೋಜನೆ ಮೂರು ತಿಂಗಳ ಹಣದ ಜೊತೆಗೆ ಬೇಸಿಗೆ ವಿಶೇಷ ಪ್ಯಾಕೇಜ್ ಅಡಿಯಲ್ಲಿ ಹೆಚ್ಚುವರಿಯಾಗಿ 2 ಸಾವಿರ ಹಣವನ್ನು ನೀಡಿದೆ.

ಈ ಕುರಿತು ಎಕ್ಸ್​​ನಲ್ಲಿ ಪೋಸ್ಟ್​ ವಿಡಿಯೋ ಮೂಲಕ ಮಾತನಾಡಿರುವ ಸಿಎಂ ಎಂ.ಕೆ.ಸ್ಟಾಲಿನ್, ಇಂದು ರಾಜ್ಯದ ಮಹಿಳೆಯರಿಗೆ ಅವರ ಕಲೈನಾರ್ ಹಕ್ಕು ಯೋಜನೆಯ ಫೆಬ್ರವರಿ, ಮಾರ್ಚ್ ಮತ್ತು ಏಪ್ರಿಲ್ ತಿಂಗಳುಗಳ ಹಣವನ್ನು ಮುಂಗಡವಾಗಿ ಹಾಕಲಾಗಿದೆ. ಮುಂದಿನ ಚುನಾವಣೆಯನ್ನು ಉಲ್ಲೇಖಿಸಿ ಕೆಲವರು ಮಹಿಳೆರಿಗೆ ಹೋಗಬೇಕಿದ್ದ ಹಣವನ್ನು ಕೆಲವರು ತಡೆಯಲು ಪ್ರಯತ್ನಿಸಿದ್ದರು.

ಆದರೆ ಫಲಾನುಭವಿಗಳು ಯಾವುದೇ ಅಡೆತಡೆಗಳನ್ನು ಎದುರಿಸದಂತೆ ನೋಡಿಕೊಳ್ಳಲು ನಮ್ಮ ಸರ್ಕಾರ ಮುಂಚೆಯೇ ಕಾರ್ಯನಿರ್ವಹಿಸಿದೆ. ತಮಿಳುನಾಡಿನ ಮಹಿಳೆಯರಿಗೆ, ಈ ಮಹಿಳಾ ಹಕ್ಕುಗಳ ಅನುದಾನವು ಸ್ಟಾಲಿನ್ ನೀಡಿದ ಭರವಸೆಯಾಗಿದೆ. ಅಡೆತಡೆಗಳನ್ನು ಸೃಷ್ಟಿಸಲು ಯಾರೇ ಪ್ರಯತ್ನಿಸಿದರೂ, ನಾನು ಅದರಿಂದ ಹಿಂದೆ ಸರಿಯುವುದಿಲ್ಲ.

ಇಂದು ನಮ್ಮ ದ್ರಾವಿಡ ಮಾದರಿ ಸರ್ಕಾರ ಅವರಿಗಿಂತ ಮೊದಲೇ ಫೆಬ್ರವರಿ, ಮಾರ್ಚ್ ಹಾಗೂ ಏಪ್ರಿಲ್ ತಿಂಗಳ 3000 ರೂ. ಹಣದ ಜೊತೆಗೆ 2,000 ರೂ. ಬೇಸಿಗೆಯ ವಿಶೇಷ ಪ್ಯಾಕೇಜ್ ಸೇರಿ ಒಟ್ಟು 5,000 ರೂ. ಹಣವನ್ನು ಕಲೈನಾರ್ ಮಹಿಳಾ ಹಕ್ಕುಗಳ ಯೋಜನೆಯ ಎಲ್ಲಾ 1.31 ಕೋಟಿ ಫಲಾನುಭವಿಗಳಿಗೆ ಇಂದು ಬೆಳಿಗ್ಗೆ ಜಮಾ ಮಾಡಲಾಗಿದೆ ಎಂದು ತಿಳಿಸಿದ್ದಾರೆ (ಏಜೆನ್ಸೀಸ್).