ಶಾಂತಿಭಂಗ ಹಾಗೂ ನಿಷೇಧಾಜ್ಞೆ ಉಲ್ಲಂಘನೆ ಆರೋಪದಡಿ ಬಂಧಿತರಾದ ಇಬ್ಬರನ್ನೂ ನ್ಯಾಯಾಲಯದ ಮುಂದೆ ಹಾಜರುಪಡಿಸಲಾಗಿದ್ದು, ನ್ಯಾಯಾಲಯವು ಅವರಿಗೆ ಐದು ದಿನಗಳ ನ್ಯಾಯಾಂಗ ಬಂಧನ ವಿಧಿಸಿ ತಿಹಾರ್ ಜೈಲಿಗೆ ಕಳುಹಿಸಿದೆ. ಇದರಿಂದಾಗಿ ಸಿಜೆಪಿ ನಾಯಕ ಅಶುತೋಷ್ ರಂಕಾ ಅವರು ತಮ್ಮ ಹುಟ್ಟುಹಬ್ಬದ ವಿಶೇಷ ದಿನವನ್ನು ಬಂಧನದಲ್ಲಿದ್ದುಕೊಂಡೇ ಕಳೆಯುವಂತಾಗಿದೆ.
ಅಭಿಜಿತ್ ದೀಪ್ಕೆ ಭಾವುಕ ಪೋಸ್ಟ್
ತಮ್ಮ ಆಪ್ತ ಗೆಳೆಯರು ಹಾಗೂ ಪಕ್ಷದ ನಾಯಕರು ಜೈಲು ಸೇರಿರುವ ಕುರಿತು ಸಿಜೆಪಿ ಸಂಸ್ಥಾಪಕ ಅಭಿಜಿತ್ ದೀಪ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಭಾವುಕರಾಗಿದ್ದಾರೆ. ಯಾವುದೇ ಕಷ್ಟದ ಪರಿಸ್ಥಿತಿಯಲ್ಲೂ ಅಶುತೋಷ್ ರಂಕಾ ಅವರ ಧೈರ್ಯ ಮತ್ತು ಶಾಂತ ಸ್ವಭಾವ ತಮಗೆ ದೊಡ್ಡ ಸ್ಪೂರ್ತಿ ಎಂದು ಸ್ಮರಿಸಿಕೊಂಡಿರುವ ಅವರು, ಸೆರೆವಾಸದಲ್ಲೂ ಹುಟ್ಟುಹಬ್ಬ ಆಚರಿಸಿಕೊಳ್ಳಬೇಕಾಗಿ ಬಂದಿರುವುದು ತನ್ನ ಎದೆ ಒಡೆಯುವಂತೆ ಮಾಡಿದೆ ಎಂದು ಭಾವುಕರಾಗಿ ಬರೆದುಕೊಂಡಿದ್ದಾರೆ. ಯಾವುದೇ ನಾಯಕತ್ವ ಅಥವಾ ಸ್ವಾರ್ಥವಿಲ್ಲದೆ ಜನರಿಗಾಗಿ ನಿಲ್ಲುವ ಇಂತಹ ಗೆಳೆಯರು ಸಿಗಲು ಭಾಗ್ಯ ಮಾಡಿರಬೇಕು ಎಂದು ಕೊಂಡಾಡಿದ್ದಾರೆ.
