ಸಾಲದ ಕಂತುಗಳು ಕಟ್ಟದಿದ್ರೆ ನಿಮ್ಮ ಫೋನ್ ಲಾಕ್ ಮಾಡಲಿದೆ ಬ್ಯಾಂಕ್​ಗಳು​!? ಹೀಗಿದೆ ಆರ್‌ಬಿಐ ಹೊಸ ರೂಲ್ಸ್​ | RBI New Rules

RBI New Rules: ಪ್ರಸ್ತುತ ಕಾಲಘಟ್ಟದಲ್ಲಿ ಡಿಜಿಟಲ್​ ಲೋನ್​ಗಳ ಹಾವಳಿ ಹೆಚ್ಚಾಗಿದ್ದು, ಜನಸಾಮಾನ್ಯರು ಆರು ಇಂಚಿನ ಬ್ರ್ಯಾಂಡೆಡ್ ಹೊಸ ಸ್ಮಾರ್ಟ್​ಫೋನ್​ ಖರೀದಿಗೆ ಮುಗಿಬೀಳುತ್ತಿದ್ದಾರೆ. ಅದರಲ್ಲೂ, ಈಗೆಲ್ಲ ಕೇವಲ ಶೇ.30ರಷ್ಟು ಡೌನ್​ಪೇಮೆಂಟ್​ ಮಾಡಿದರೆ ಸಾಕು ದುಬಾರಿ ಬೆಲೆಯ ಐಫೋನ್​ಗಳು ಕೂಡ ಸಾಲದಲ್ಲೇ ಲಭ್ಯವಿವೆ. ಹೀಗಿರುವಾಗ, ಹಲವು ವಸ್ತುಗಳ ಮೇಲಿನ ಸಾಲದ ಕಂತುಗಳನ್ನು ನೀವೇನಾದರೂ ಕಟ್ಟಲು ಮಿಸ್​ ಮಾಡಿದರೆ, ಆಯಾ ಬ್ಯಾಂಕ್​ಗಳು ನಿಮ್ಮ ಫೋನ್ ಅನ್ನು​ ಲಾಕ್ ಮಾಡಲಿದೆ ಎಂಬ ಆತಂಕಕಾರಿ ಪ್ರಶ್ನೆಗಳಿಗೆ ಭಾರತೀಯ ರಿಸರ್ವ್​ ಬ್ಯಾಂಕ್​ನ (ಆರ್​ಬಿಐ) ಹೊಸ ನಿಯಮಗಳಲ್ಲಿ ವಿವರವಾದ ಹಾಗೂ ಸೂಕ್ತ ಉತ್ತರಗಳಿವೆ.   ​  

ಸಾಲದ ಕಂತುಗಳನ್ನು ಪಾವತಿಸದಿದ್ದರೆ ಬ್ಯಾಂಕ್‌ಗಳು ಏನು ಮಾಡಬಹುದು? ನಿಮ್ಮ ಮೊಬೈಲ್ ಫೋನ್ ನಿಜಕ್ಕೂ ಲಾಕ್ ಆಗಲಿದ್ಯಾ? ಎಂಬುದರ ಕುರಿತು ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ಹೊಸ ಮಾರ್ಗಸೂಚಿಗಳನ್ನು ಹೊರಡಿಸಿದೆ. ಈ ಹೊಸ ರೂಲ್ಸ್​ 2027ರ ಜನವರಿ 1ರಿಂದಲೇ ಜಾರಿಗೆ ಬರಲಿದೆ. ನಿಯಮಗಳ ಪ್ರಕಾರ, ವೈಯಕ್ತಿಕ ಸಾಲ, ಗೃಹ ಸಾಲ ಅಥವಾ ವಾಹನ ಸಾಲದಂತಹ ಬಾಕಿಗಳನ್ನು ವಸೂಲಿ ಮಾಡುವ ನೆಪದಲ್ಲಿ ಬ್ಯಾಂಕ್‌ಗಳು ಸಾಲ ಪಡೆದವರ ಮೊಬೈಲ್ ಫೋನ್, ಲ್ಯಾಪ್‌ಟಾಪ್ ಅಥವಾ ಟ್ಯಾಬ್ಲೆಟ್‌ನ ವೈಶಿಷ್ಟ್ಯಗಳನ್ನು ಲಾಕ್ ಮಾಡಲು ಅಥವಾ ನಿಷ್ಕ್ರಿಯಗೊಳಿಸುವ ಹಕ್ಕನ್ನು ಹೊಂದಿಲ್ಲ. ಆದ್ರೆ, ಮೊಬೈಲ್​ ಫೋನ್​ಗೆ ಇದು ಅನ್ವಯಿಸಲಿದೆ.

ಹೌದು. ಸ್ಮಾರ್ಟ್​ಫೋನ್​ ಬಿಟ್ಟು ಉಳಿದ ಸಾಲಗಳ ಕಂತು ಮಿಸ್ ಮಾಡಿದರೆ ಅಂತಹ ಸಮಸ್ಯೆ ಇಲ್ಲ. ಆದರೆ, ಸಾಲದಲ್ಲಿ ಕೊಂಡ ಸ್ಮಾರ್ಟ್​ಫೋನ್​ಗಳಿಗೆ ಈ ಕಠಿಣ ನಿಯಮ ಅನ್ವಯವಾಗಲಿದೆ. ಲೋನ್​ ಒಪ್ಪಂದದಲ್ಲಿ ಸ್ಪಷ್ಟವಾಗಿ ಹೇಳಲಾದ ನಿಯಮಗಳ ಪ್ರಕಾರ ಸೀಮಿತ ನಿರ್ಬಂಧಗಳನ್ನು ಮಾತ್ರ ವಿಧಿಸಲು ಅವಕಾಶವಿದೆ. ಅದು ಮುಖ್ಯವಾಗಿ, ಲೋನ್​ ಕಂಪನಿಗಳಿಗೆ ಟೈಅಪ್​ ಆಗಿರುವ ಸ್ಮಾರ್ಟ್​ಫೋನ್​ಗಳಿಗೆ ಮಾತ್ರ.  ಆರ್​ಬಿಐ ಹೊಸ ನಿಯಮಗಳ ಪ್ರಕಾರ, ಒಂದೇ ಒಂದು ಕಂತು ಮಿಸ್​ ಮಾಡಿದ ತಕ್ಷಣವೇ ನಿಮ್ಮ ಫೋನ್ ಅನ್ನು ಲಾಕ್ ಮಾಡಲು ಅವಕಾಶವಿಲ್ಲ. ಲೋನ್​ ಪಡೆದ ಅಕೌಂಟ್​ ಕನಿಷ್ಠ 30 ದಿನಗಳವರೆಗೆ ಬಾಕಿ ಉಳಿಸಿಕೊಂಡ ಮೇಲೆ ಈ ಲಾಕಿಂಗ್​​ ಮಾಡುವ ಅಧಿಕಾರನ್ನು ಹೊಂದಿರಲಿದೆ. ಅದರಲ್ಲೂ, ಎಚ್ಚರಿಕೆಯ ನೋಟಿಫಿಕೇಶ್​​ನ್​ಗಳನ್ನು ಕಳುಹಿಸಿದ ನಂತರವೇ ನಿರ್ಬಂಧಿಸಲು ಸಾಧ್ಯ. 30 ದಿನಗಳ ನಂತರ ಸಂಪೂರ್ಣವಾಗಿ ಲಾಕ್​ ಆಗಿರುವುದಿಲ್ಲ ಎಂಬುದು ಇಲ್ಲಿ ಗಮನಾರ್ಹ.

ಇನ್​ಕಮಿಂಗ್ ಕರೆಗಳು, ಎಸ್​ಎಂಎಸ್​, ತುರ್ತು ಎಸ್​ಒಎಸ್, ಉದ್ಯೋಗಕ್ಕೆ ಸಂಬಂಧಿಸಿದಂತೆ ಯಾವುದೇ ಪ್ರಮುಖ ತುರ್ತು ಸೇವೆಗಳನ್ನು ತಡೆಹಿಡಿಯಲು ಸಾಧ್ಯವಿಲ್ಲ. ಅಲ್ಲದೆ, ಸಾಲಗಾರನ ಉದ್ಯೋಗ ಅಥವಾ ಜೀವನೋಪಾಯಕ್ಕೆ ತೊಂದರೆಯಾಗದಂತೆ ಕ್ರಮಗಳನ್ನು ಕೈಗೊಳ್ಳಬೇಕಿದೆ. ಬಾಕಿ ಪಾವತಿಸಿದ ಒಂದು ಗಂಟೆಯೊಳಗೆ ಎಲ್ಲಾ ನಿರ್ಬಂಧಗಳನ್ನು ತೆಗೆದುಹಾಕಬೇಕು. ಅಕಸ್ಮಾತ್​, ಬಾಕಿ ಹಣವನ್ನು ಪಾವತಿ ಮಾಡಿದ ಮೇಲೂ ಲಾಕ್​ ತೆಗೆಯಲು ವಿಳಂಬ ಮಾಡಿದ್ದಲ್ಲಿ, ಪ್ರತಿ ಗಂಟೆಗೆ 250 ರೂ. ದರದಲ್ಲಿ ಗ್ರಾಹಕನಿಗೆ ಆಯಾ ಬ್ಯಾಂಕ್​ಗಳು ಪರಿಹಾರ ಹಣವನ್ನು ಕೊಡಬೇಕು  ಎಂದು ಆರ್‌ಬಿಐ ತನ್ನ ನಿಯಮಾವಳಿಗಳಲ್ಲಿ ಸ್ಪಷ್ಟಪಡಿಸಿದೆ.

ಬ್ಯಾಂಕ್‌ಗಳು, ರಿಕವರಿ ಏಜೆಂಟ್‌ಗಳು ಮತ್ತು ಥರ್ಡ್-ಪಾರ್ಟಿ ಕಂಪನಿಗಳು ಸಾಲಗಾರರಿಗೆ ಪೂರ್ಣ ಮೊತ್ತವನ್ನು ಪಾವತಿಸುವಂತೆ ಕಿರುಕುಳ ನೀಡುತ್ತವೆ. ಹೊಸ ಆರ್‌ಬಿಐ ನಿಯಮಗಳ ಪ್ರಕಾರ, ಇದನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ಸಾಲಗಾರರ ವೈಯಕ್ತಿಕ ಡೇಟಾ, ಸಂಪರ್ಕಗಳು, ಫೋಟೋಗಳು, ಮೆಸೇಜಿಂಗ್​ ಆ್ಯಪ್​ಗಳು ಅಥವಾ ಲೋಕೇಷನ್​ ಮಾಹಿತಿಯನ್ನು ತಡೆಹಿಡಿಯುವಂತಿಲ್ಲ. 

ಆರ್‌ಬಿಐನ ಹೊಸ ನಿಯಮಗಳ ಪ್ರಕಾರ, ಸಾಲ ಕೊಟ್ಟ ಬ್ಯಾಂಕ್​ ಏಜೆಂಟ್​ಗಳು, ಬೆಳಗ್ಗೆ 8ರಿಂದ ಸಂಜೆ 7ರ ನಡುವೆ ಮಾತ್ರ ಲೋನ್​ ಪಡೆದವರನ್ನು ಸಂಪರ್ಕಿಸಬೇಕು. ಅಂದರೆ, ಸಾಲ ವಸೂಲಾತಿಯಲ್ಲಿ ಪಾರದರ್ಶಕತೆ ಹಾಗೂ ಸಾಲಗಾರರ ಘನತೆ ಮತ್ತು ಖಾಸಗಿತನವನ್ನು ಕಾಪಾಡುವ ಉದ್ದೇಶದಿಂದ ಈ ಹೊಸ ನಿಯಮಗಳನ್ನು ಭಾರತೀಯ ರಿಸರ್ವ್​ ಬ್ಯಾಂಕ್​ ತರುತ್ತಿರುವುದು ಗಮನಾರ್ಹ,(ಏಜೆನ್ಸೀಸ್).