ಸ್ವಯಂ ಗೌರವಕ್ಕೆ ಧಕ್ಕೆ ತರುವುದು ನಾಗರಿಕ ಲಕ್ಷಣವಲ್ಲ!...ಸ್ಟಾಲಿನ್ ಅಣಕಿಸಿದ ಸಿಎಂ ವಿಜಯ್ ನಡೆಗೆ ಮಿತ್ರಪಕ್ಷದ ನಾಯಕನೇ ಗರಂ | Thirumavalavan

ವಿಧಾನಸಭೆಯ ಚರ್ಚೆಯ ವೇಳೆ ತಾವು ಮಾಡಿದ ಸನ್ನೆ ಉದ್ದೇಶಪೂರ್ವಕವಲ್ಲ ಮತ್ತು ಯಾರ ಮನಸ್ಸಿಗೂ ನೋವು ಉಂಟುಮಾಡುವ ಉದ್ದೇಶ ಹೊಂದಿರಲಿಲ್ಲ ಎಂದು ಸಿಎಂ ವಿಜಯ್ ಸ್ಪಷ್ಟನೆ ನೀಡಿದ ಮರುದಿನವೇ ತಿರುಮಾವಳವನ್ ಈ ಖಂಡನೆ ವ್ಯಕ್ತಪಡಿಸಿದ್ದಾರೆ.

ತಮ್ಮ ಎಕ್ಸ್ ಖಾತೆಯಲ್ಲಿ ಪೋಸ್ಟ್​ ಹಂಚಿಕೊಂಡಿರುವ ತಿರುಮಾವಳವನ್, ಪೊಲೀಸ್ ಇಲಾಖೆಯ ಅನುದಾನ ಕುರಿತ ಚರ್ಚೆಗೆ ಮುಖ್ಯಮಂತ್ರಿಗಳು ಉತ್ತರಿಸುವಾಗ, ಮಾಜಿ ಸಿಎಂ ಹಾಗೂ ಡಿಎಂಕೆ ನಾಯಕ ಸ್ಟಾಲಿನ್ ಅವರನ್ನು ಅಣಕಿಸುವಂತೆ ಪ್ರದರ್ಶಿಸಿದ ಬಾಡಿ ಲ್ಯಾಂಗ್ವೇಜ್ ಉದ್ದೇಶಪೂರ್ವಕವಲ್ಲ ಎಂದು ಅವರ ಕಡೆಯಿಂದ ಸ್ಪಷ್ಟನೆ ನೀಡಲಾಗಿದೆ. ಆದರೆ ವಿಸಿಕೆ ಪರವಾಗಿ ನಾವು ಸ್ಪಷ್ಟಪಡಿಸುವುದೇನೆಂದರೆ, ಇಂತಹ ನಡವಳಿಕೆಗಳು ಗೌರವಯುತ ರಾಜಕೀಯದ ಸಂಕೇತವಲ್ಲ ಮತ್ತು ಮಾನವ ಘನತೆಗೆ ವಿರುದ್ಧವಾದದ್ದು ಎಂದು ಬರೆದುಕೊಂಡಿದ್ದಾರೆ.

ಸಾರ್ವಜನಿಕ ಜೀವನದಲ್ಲಿ ಹಿರಿಯರಿಗೆ ಗೌರವ ನೀಡುವುದು ಮಾನವೀಯತೆಯ ಮೂಲಭೂತ ಕರ್ತವ್ಯವಾಗಿದೆ. ಉನ್ನತ ಸಂವಿಧಾನಾತ್ಮಕ ಹುದ್ದೆಯಲ್ಲಿರುವ ಮುಖ್ಯಮಂತ್ರಿಗಳು ತಮ್ಮ ಸ್ಥಾನದ ಗಂಭೀರತೆಯನ್ನು ಅರಿತು, ಭವಿಷ್ಯದಲ್ಲಿ ತಮ್ಮ ಬಾಡಿ ಲ್ಯಾಂಗ್ವೇಜ್ ಹಾಗೂ ನಡೆ-ನುಡಿಯಲ್ಲಿ ಹೆಚ್ಚಿನ ಸಂಯಮ ಮತ್ತು ಸೂಕ್ಷ್ಮತೆಯನ್ನು ಕಾಯ್ದುಕೊಳ್ಳಬೇಕು ಎಂದು ಅವರು ಸಲಹೆ ನೀಡಿದ್ದಾರೆ.

ಇದೇ ವೇಳೆ ತುರ್ತುಪರಿಸ್ಥಿತಿ ಕಾಲದ ಘಟನೆಗಳು ಹಾಗೂ ಸ್ಟಾಲಿನ್ ಅವರ ಬಂಧನದ ಕುರಿತು ಸದನದಲ್ಲಿ ನಡೆದ ಚರ್ಚೆಯನ್ನೂ ವಿಸಿಕೆ ನಾಯಕ ಟೀಕಿಸಿದ್ದು, ಮುಖ್ಯಮಂತ್ರಿಗಳ ಭಾಷಣದ ಕೆಲವು ಭಾಗಗಳನ್ನು ಕಡತದಿಂದ ತೆರವುಗೊಳಿಸಬೇಕೆಂಬ ಡಿಎಂಕೆ ಬೇಡಿಕೆಯ ನಡುವೆ, ಕಾನೂನು ಸಚಿವ ಆರ್‌ ನಿರ್ಮಲ್ ಕುಮಾರ್ ಅವರು ನೀಡಿದ ವಿವರಣೆಯು ಐತಿಹಾಸಿಕ ತಪ್ಪು ಎಂದು ಕಿಡಿಕಾರಿದ್ದಾರೆ.

ಸ್ಟಾಲಿನ್ ಅವರು ತಮ್ಮ ಆತ್ಮಕಥೆಯಾದ ಉಂಗಳಿಲ್ ಒರುನ್ (ನಿಮ್ಮಲ್ಲಿ ಒಬ್ಬ) ಪುಸ್ತಕದಲ್ಲಿ 1976 ರಲ್ಲಿ ನಡೆದ ತಮ್ಮ ಬಂಧನ ಮತ್ತು ತದನಂತರದ ಜೈಲುವಾಸವನ್ನು ವಿವರಿಸಿದ್ದಾರೆ. ಆ ಸಮಯದಲ್ಲಿ ಜೈಲು ಹೇಗೆ ಹಿಂಸಾರೂಪದ ಕೊಠಡಿಯಾಗಿ ಮಾರ್ಪಟ್ಟಿತ್ತು ಮತ್ತು ನೋವಿನ ಕೂಗುಗಳಿಂದ ಆವರಿಸಿತ್ತು ಎಂಬುದನ್ನು ಅವರು ಉಲ್ಲೇಖಿಸಿದ್ದಾರೆ. ಜಸ್ಟಿಸ್ ಎಂ ಎಂ ಇಸ್ಮಾಯಿಲ್ ಕಮಿಷನ್ ಮುಂದಿನ ಸಾಕ್ಷ್ಯವು, ಅವರು ಮತ್ತು ಇತರ ಕೈದಿಗಳು ತೀವ್ರ ದೈಹಿಕ ಕಿರುಕುಳವನ್ನು ಎದುರಿಸಿದರು ಎಂಬುದನ್ನು ಗಮನಿಸಿದೆ. ಇದರಿಂದಾಗಿ ಅವರ ದವಡೆಗೆ ಪೆಟ್ಟಾಗಿ ಅದು ಮುರಿದುಹೋಯಿತು.

ಡಿಎಂಕೆಗೆ, ಈ ಗಾಯವು ಕೇವಲ ದೈಹಿಕ ಕಲೆಯಷ್ಟೇ ಅಲ್ಲ. ಪಕ್ಷದ ನಾಯಕರು ಇದನ್ನು ಸಾಹಸದ ಗುರುತಾಗಿ ನೋಡುತ್ತಾರೆ. ಪ್ರಜಾಪ್ರಭುತ್ವವು ಒತ್ತಡದಲ್ಲಿದ್ದ ಸಮಯದಲ್ಲಿ ಸ್ಟಾಲಿನ್ ಅವರ ಪ್ರತಿರೋಧದ ಸಂಕೇತ ಎಂದು ಬಣ್ಣಿಸುತ್ತಾರೆ(ಏಜೆನ್ಸೀಸ್).