ಸಿಎಂ ವಿಜಯ್ ಬೆಂಬಲಿಸಿದ್ದ 21 ಶಾಸಕರಿಗೆ ಸಿಕ್ಕಿತು ಬಿಗ್ ರಿಲೀಫ್! ಸ್ಪೀಕರ್ ತೀರ್ಪಿನ ಹಿಂದೆ ಅಡಗಿದೆಯೇ AIADMKಯ ಭವಿಷ್ಯದ ಅಸಲಿ ರಹಸ್ಯ! AIADMK Rebel MLAs Disqualification

ಇತ್ತೀಚೆಗೆ ನಡೆದ ತಮಿಳುನಾಡು ವಿಧಾನಸಭಾ ಚುನಾವಣೆಯಲ್ಲಿ ನಟ ವಿಜಯ್ ನೇತೃತ್ವದ ಟಿವಿಕೆ ಪಕ್ಷವು 108 ಸ್ಥಾನಗಳನ್ನು ಗೆದ್ದು ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿತ್ತು. ಬಹುಮತಕ್ಕೆ ಕೆಲವು ಸ್ಥಾನಗಳ ಕೊರತೆಯಿದ್ದ ಕಾರಣ ಕಾಂಗ್ರೆಸ್, ಎಡ ಪಕ್ಷಗಳು ಮತ್ತು ವಿಸಿಕೆ ಬೆಂಬಲದೊಂದಿಗೆ ವಿಜಯ್ ಸರ್ಕಾರ ರಚಿಸಿದ್ದರು. ಆದರೆ ಮೇ 13 ರಂದು ನಡೆದ ವಿಶ್ವಾಸಮತ ಪರೀಕ್ಷೆಯ ಸಂದರ್ಭದಲ್ಲಿ ಎಐಎಡಿಎಂಕೆಯ ಪ್ರಮುಖ ನಾಯಕರಾದ ಷಣ್ಮುಗಂ ಮತ್ತು ಎಸ್.ಪಿ. ವೇಲುಮಣಿ ನೇತೃತ್ವದ ಬಂಡಾಯ ಬಣದ 25 ಶಾಸಕರು ಅಚ್ಚರಿಯ ರೀತಿಯಲ್ಲಿ ಸಿಎಂ ವಿಜಯ್ ಪರವಾಗಿ ಮತ ಚಲಾಯಿಸಿದ್ದರು. ಇದರಿಂದಾಗಿ ಸರ್ಕಾರದ ಪರ ಮತಗಳ ಸಂಖ್ಯೆ 119 ರಿಂದ 144 ಕ್ಕೆ ಏರಿಕೆಯಾಗಿ, ವಿಜಯ್ ಸರ್ಕಾರ ಸುಲಭವಾಗಿ ಬಹುಮತ ಸಾಬೀತುಪಡಿಸಿತ್ತು.

ವಿಶ್ವಾಸಮತ ಯಾಚನೆ ವೇಳೆ ಎಐಎಡಿಎಂಕೆಯ ಒಟ್ಟು 47 ಶಾಸಕರ ಪೈಕಿ 25 ಶಾಸಕರು ಬಂಡಾಯವೆದ್ದು ಸರ್ಕಾರದ ಪರ ಮತ ಹಾಕಿದರೆ, ಎಡಪ್ಪಾಡಿ ಪಳನಿಸ್ವಾಮಿ ಅವರಿಗೆ ನಿಷ್ಠರಾಗಿದ್ದ ಇನ್ನುಳಿದ 22 ಶಾಸಕರು ಸರ್ಕಾರದ ವಿರುದ್ಧ ಮತ ಚಲಾಯಿಸಿದ್ದರು. ಇದು ಪಕ್ಷದೊಳಗಿನ ಅಧಿಕೃತ ಸೀಳನ್ನು ಜಗಜ್ಜಾಹೀರು ಮಾಡಿತ್ತು. ಆ ಬಳಿಕ ಬಂಡಾಯವೆದ್ದಿದ್ದ 25 ಶಾಸಕರ ಪೈಕಿ ಐದು ಶಾಸಕರು ಮತ್ತೆ ಇಪಿಎಸ್ ಬಣಕ್ಕೆ ಮರಳಿದ್ದರಿಂದ ಪಳನಿಸ್ವಾಮಿ ಅವರ ಸಂಖ್ಯಾಬಲ ಅಲ್ಪ ಮಟ್ಟಿಗೆ ಚೇತರಿಸಿಕೊಂಡು 27ಕ್ಕೆ ತಲುಪಿದೆ.

ಪಕ್ಷದ ವಿಪ್ ಉಲ್ಲಂಘಿಸಿ ಸರ್ಕಾರದ ಪರ ಮತ ಹಾಕಿದ ಶಾಸಕರನ್ನು ಶಾಸಕ ಸ್ಥಾನದಿಂದ ಅನರ್ಹಗೊಳಿಸಬೇಕು ಎಂದು ಪಳನಿಸ್ವಾಮಿ ಬಣ ಸ್ಪೀಕರ್ ಮೆಟ್ಟಿಲೇರಿತ್ತು. ಆದರೆ, ಸಂವಿಧಾನದ ಪಕ್ಷಾಂತರ ನಿಷೇಧ ಕಾಯ್ದೆಯ ಪ್ರಕಾರ ಒಂದು ಪಕ್ಷದ ಶಾಸಕಾಂಗ ಪಕ್ಷ ಸೀಳಾಗಬೇಕಾದರೆ ಅಥವಾ ಮತ್ತೊಂದು ಪಕ್ಷದೊಂದಿಗೆ ವಿಲೀನವಾಗಬೇಕಾದರೆ ಕನಿಷ್ಠ ಮೂರನೇ ಎರಡರಷ್ಟು ಶಾಸಕರ ಬೆಂಬಲ ಬೇಕಾಗುತ್ತದೆ. ಎಐಎಡಿಎಂಕೆ ವಿಷಯದಲ್ಲಿ ಈ ಮಿತಿ 31 ಶಾಸಕರಾಗಬೇಕಿತ್ತು. ಆದರೆ ಬಂಡಾಯ ಬಣದ ಬಳಿ ಅಷ್ಟು ಸಂಖ್ಯಾಬಲ ಇಲ್ಲದಿದ್ದರೂ, ಸ್ಪೀಕರ್ ಅವರು ತಾಂತ್ರಿಕ ಕಾರಣಗಳನ್ನು ಪರಿಗಣಿಸಿ 21 ಶಾಸಕರಿಗೆ ಸದ್ಯಕ್ಕೆ ಯಾವುದೇ ಅನರ್ಹತೆಯ ಶಿಕ್ಷೆ ವಿಧಿಸದೆ ರಿಲೀಫ್ ನೀಡಿದ್ದಾರೆ.

ವಿಶ್ವಾಸಮತ ಯಾಚನೆಯ ವೇಳೆ ವಿಜಯ್ ಸರ್ಕಾರವನ್ನು ಬೆಂಬಲಿಸಿದ್ದ 25 ಬಂಡಾಯ ಶಾಸಕರ ಪೈಕಿ ನಾಲ್ಕು ಶಾಸಕರು ಇತ್ತೀಚೆಗಷ್ಟೇ ಅಧಿಕೃತವಾಗಿ ಸಿಎಂ ವಿಜಯ್ ಸಮ್ಮುಖದಲ್ಲಿ ಟಿವಿಕೆ ಪಕ್ಷವನ್ನು ಸೇರ್ಪಡೆಯಾಗಿದ್ದಾರೆ. ಇದು ಎಐಎಡಿಎಂಕೆ ಪಕ್ಷದಲ್ಲಿ ಇಪಿಎಸ್ ಅವರ ಹಿಡಿತ ಕೈತಪ್ಪುತ್ತಿರುವುದಕ್ಕೆ ಸ್ಪಷ್ಟ ಸಾಕ್ಷಿಯಾಗಿದೆ.

ಮತ್ತೊಂದೆಡೆ, ಈ ಬೆಳವಣಿಗೆಯ ಕುರಿತು ಸ್ಪಷ್ಟನೆ ನೀಡಿರುವ ಬಂಡಾಯ ಬಣದ ಹಿರಿಯ ನಾಯಕ ಎಸ್.ಪಿ. ವೇಲುಮಣಿ, ನಮಗಾಗಲಿ ಅಥವಾ ನಮ್ಮ ಸಹೋದ್ಯೋಗಿ ಶಷುಣ್ಮುಗಂ ಅವರಿಗಾಗಲಿ ಪಕ್ಷವನ್ನು ಒಡೆಯುವ ಯಾವುದೇ ಉದ್ದೇಶವಿಲ್ಲ. ನಾವು ಇಂದಿಗೂ ಎಐಎಡಿಎಂಕೆ ಪಕ್ಷಕ್ಕೆ ನಿಷ್ಠರಾಗಿದ್ದೇವೆ. ಮಾಜಿ ಮುಖ್ಯಮಂತ್ರಿ ದಿವಂಗತ ಜಿ. ಜಯಲಲಿತಾ ಅವರ ಅಮ್ಮಾ ಆಡಳಿತದ ಪರಂಪರೆಯನ್ನು ಮರಳಿ ತರುವುದಷ್ಟೇ ನಮ್ಮ ಗುರಿ ಎಂದು ಹೇಳಿದ್ದಾರೆ. ಅಲ್ಲದೆ, ಇತ್ತೀಚೆಗೆ ನಡೆದ ಸಂಪುಟ ವಿಸ್ತರಣೆಯ ಸಂದರ್ಭದಲ್ಲಿ ತಮ್ಮ ಬಣದ ಯಾವುದೇ ಶಾಸಕರು ಸಿಎಂ ವಿಜಯ್ ಸರ್ಕಾರದಲ್ಲಿ ಸಚಿವ ಸ್ಥಾನವನ್ನು ಆಕಾಂಕ್ಷಿಸಿಲ್ಲ ಮತ್ತು ಯಾವುದೇ ಸ್ಥಾನ ಪಡೆದಿಲ್ಲ ಎಂದೂ ಸ್ಪಷ್ಟಪಡಿಸಿದ್ದಾರೆ.

ಸ್ಪೀಕರ್ ಅವರ ಈ ತೀರ್ಪಿನಿಂದಾಗಿ ತಮಿಳುನಾಡು ವಿಧಾನಸಭೆಯಲ್ಲಿ ವಿಜಯ್ ನೇತೃತ್ವದ ಸರ್ಕಾರದ ಬಲ ಮತ್ತಷ್ಟು ಗಟ್ಟಿಯಾದಂತಾಗಿದೆ. ಆದರೆ, ಉರುಳುತ್ತಿರುವ ದಿನಗಳಲ್ಲೇ ಶಾಸಕರು ಪಕ್ಷ ಬದಲಿಸುತ್ತಿರುವುದು ಮತ್ತು ವಿರೋಧ ಪಕ್ಷದ ನಾಯಕರ ಬಹಿರಂಗ ಬಂಡಾಯವು ಎಐಎಡಿಎಂಕೆ ಪಕ್ಷದ ಭವಿಷ್ಯವನ್ನು ತೀವ್ರ ಅನಿಶ್ಚಿತತೆಗೆ ತಳ್ಳಿದೆ,(ಏಜೆನ್ಸೀಸ್​​).