ಕೇರಳದ 19ರ ಕುವರಿಗೆ ಮಿಸ್ ಯೂನಿವರ್ಸ್ ಇಂಡಿಯಾ ಕಿರೀಟ; ಕಾಜಿಯಾ ಲಿಜ್ ಮೆಜೊ ಯಾರು? | Who is Kajia Liz Mejo?

Miss Universe India 2026: ಕಾಲೇಜು, ಸ್ನೇಹಿತರು, ಕನಸುಗಳಲ್ಲೇ ಬ್ಯುಸಿಯಾಗಿರಬೇಕಾದ 19ರ ಹರೆಯದಲ್ಲಿ ಕೇರಳದ ಕಾಜಿಯಾ ಲಿಜ್ ಮೆಜೊ ದೇಶದ ಪ್ರತಿಷ್ಠಿತ ಸೌಂದರ್ಯ ಸ್ಪರ್ಧೆಯ ಕಿರೀಟ ಮುಡಿಗೇರಿಸಿಕೊಂಡಿದ್ದಾರೆ. ಆಗಸ್ಟ್ 23ರಂದು ಜೈಪುರದಲ್ಲಿ ನಡೆದ ಅದ್ಧೂರಿ ಗ್ರ್ಯಾಂಡ್ ಫಿನಾಲೆಯಲ್ಲಿ 52 ಸ್ಪರ್ಧಿಗಳನ್ನು ಹಿಂದಿಕ್ಕಿ 2026ರ ಮಿಸ್ ಯೂನಿವರ್ಸ್ ಇಂಡಿಯಾ ಪಟ್ಟವನ್ನು ತಮ್ಮದಾಗಿಸಿಕೊಂಡಿದ್ದಾರೆ.

ಈ ಗೆಲುವಿನೊಂದಿಗೆ ಕಾಜಿಯಾ ಲಿಜ್ ಮೆಜೊ ಮತ್ತೊಂದು ಅಪರೂಪದ ಸಾಧನೆ ಮಾಡಿದ್ದಾರೆ. ಮಿಸ್ ಯೂನಿವರ್ಸ್ ಇಂಡಿಯಾ ಕಿರೀಟ ಗೆದ್ದ ಮೊದಲ ಕೇರಳಿಗ ಎಂಬ ಹೆಗ್ಗಳಿಕೆ ಇದೀಗ ಅವರ ಪಾಲಾಗಿದೆ. ಹಾಲಿ ಮಿಸ್ ಯೂನಿವರ್ಸ್ ಇಂಡಿಯಾ ಮಾಣಿಕ ವಿಶ್ವಕರ್ಮ ಅವರು ಕಾಜಿಯಾ ಅವರಿಗೆ ಕಿರೀಟ ತೊಡಿಸಿದರು.

ರಾಷ್ಟ್ರಮಟ್ಟದ ಕಿರೀಟ ಗೆದ್ದಿರುವ ಕಾಜಿಯಾ ಇದೀಗ ಜಾಗತಿಕ ವೇದಿಕೆಗೆ ಕಾಲಿಡಲು ಸಜ್ಜಾಗಿದ್ದಾರೆ. ನವೆಂಬರ್‌ನಲ್ಲಿ ಪ್ಯೂರ್ಟೊ ರಿಕೊದಲ್ಲಿ ನಡೆಯಲಿರುವ 75ನೇ ಮಿಸ್ ಯೂನಿವರ್ಸ್ ಸ್ಪರ್ಧೆಯಲ್ಲಿ ಭಾರತವನ್ನು ಪ್ರತಿನಿಧಿಸಲಿದ್ದಾರೆ. ತಮ್ಮ ಗೆಲುವಿನ ಬಗ್ಗೆ ಮಾತಾಡಿರುವ ಕಾಜಿಯಾ, ಈ ಕ್ಷಣಕ್ಕಾಗಿ ಮೂರು ವರ್ಷಕ್ಕೂ ಹೆಚ್ಚು ಕಾಲ ಸತತವಾಗಿ ಪರಿಶ್ರಮಿಸಿದ್ದೇನೆ ಎಂದಿದ್ದಾರೆ. ಅದರಲ್ಲೂ ತಮ್ಮ ಕಿರೀಟವನ್ನು ಕೇರಳಕ್ಕೆ ಕೊಂಡೊಯ್ಯುತ್ತಿರುವುದು ಹಾಗೂ ತವರನ್ನು ಜಾಗತಿಕ ವೇದಿಕೆಯಲ್ಲಿ ಪರಿಚಯಿಸುವ ಅವಕಾಶ ಸಿಕ್ಕಿದ್ದು ಅತ್ಯಂತ ಸಂತಸ ತಂದಿದೆ ಎಂದು ಹೇಳಿದ್ದಾರೆ.

2007ರಲ್ಲಿ ಜನಿಸಿದ ಕಾಜಿಯಾ ಲಿಜ್ ಮೆಜೊ ಕೇರಳದ ಮಾವೇಲಿಕ್ಕರ ಮೂಲದವರು. ಆದರೆ ಅವರ ಬಾಲ್ಯದ ಬಹುಪಾಲು ಅಬುಧಾಬಿಯಲ್ಲೇ ಕಳೆದಿದೆ. ಎಮಿರೇಟ್ಸ್ ರಾಷ್ಟ್ರೀಯ ಶಾಲೆ, ಸೇಂಟ್ ಜೋಸೆಫ್ ಶಾಲೆ ಮತ್ತು ಅಬುಧಾಬಿ ಇಂಡಿಯನ್ ಸ್ಕೂಲ್​ನಲ್ಲಿ ವಿದ್ಯಾಭ್ಯಾಸ ಮಾಡಿದ ಅವರು ಬಳಿಕ ಕಾನೂನು ವ್ಯಾಸಂಗದತ್ತ ಹೆಜ್ಜೆ ಹಾಕಿದ್ದಾರೆ.

ಓದಿನ ಜೊತೆಗೆ ಮಾಡೆಲಿಂಗ್ ಮತ್ತು ಬ್ಯೂಟಿ ಪೇಜಂಟ್‌ಗಳಲ್ಲೂ ಗುರುತಿಸಿಕೊಂಡಿದ್ದಾರೆ. ಚಿಕ್ಕ ವಯಸ್ಸಿನಿಂದಲೇ ಶಾಸ್ತ್ರೀಯ ನೃತ್ಯ ಕಲಿತಿರುವ ಕಾಜಿಯಾ ಸುಮಾರು 12 ವರ್ಷಗಳ ಕಾಲ ತರಬೇತಿ ಪಡೆದಿದ್ದಾರೆ. ನೃತ್ಯದ ಜೊತೆಗೆ ಹಾಡುವುದು, ಡ್ರಮ್ಸ್ ಮತ್ತು ವೈಯಲಿನ್ ನುಡಿಸುವ ಕೌಶಲ್ಯವೂ ಅವರಿಗಿದೆ.

ಕಾಜಿಯಾ ಪೇಜಂಟ್ ಪಯಣಕ್ಕೂ ಒಂದು ಕುತೂಹಲಕಾರಿ ಹಿನ್ನೆಲೆಯಿದೆ. 2021ರಲ್ಲಿ ಹರ್ನಾಜ್ ಸಂಧು ಮಿಸ್ ಯೂನಿವರ್ಸ್ ಕಿರೀಟ ಗೆದ್ದ ಕ್ಷಣವನ್ನು ನೋಡಿದ ಬಳಿಕ ಕಾಜಿಯಾಗೂ ಈ ಕ್ಷೇತ್ರದತ್ತ ಆಸಕ್ತಿ ಮೂಡಿತಂತೆ. ಆಸಕ್ತಿ ಕ್ರಮೇಣ ಕನಸಾಗಿ, ಕನಸು ಗುರಿಯಾಯಿತು. ಮೊದಲು ಮಿಸ್ ಯೂನಿವರ್ಸ್ ಕೇರಳ 2026 ಕಿರೀಟ ಗೆದ್ದ ಅವರು, ಬಳಿಕ ರಾಷ್ಟ್ರಮಟ್ಟದ ಸ್ಪರ್ಧೆಗೆ ಆಯ್ಕೆಯಾದರು.

ಇಂದು ಸಾವಿರಾರು ಜನರ ಮುಂದೆ ಆತ್ಮವಿಶ್ವಾಸದಿಂದ ವೇದಿಕೆಯಲ್ಲಿ ನಿಲ್ಲುವ ಕಾಜಿಯಾ ಪಯಣ ಅಷ್ಟು ಸುಲಭವಾಗಿರಲಿಲ್ಲ. ಒಂದು ಹಂತದಲ್ಲಿ ತಮ್ಮ ಲುಕ್ ಮತ್ತು ವ್ಯಕ್ತಿತ್ವದ ಬಗ್ಗೆ ಅವರು ಸಾಕಷ್ಟು ಅಸುರಕ್ಷಿತ ಭಾವನೆ ಹೊಂದಿದ್ದರಂತೆ. ಫಿಲ್ಟರ್ ಇಲ್ಲದೆ ತಮ್ಮ ಫೋಟೋ ತೆಗೆದುಕೊಳ್ಳುವುದಕ್ಕೂ ಹಿಂಜರಿಯುತ್ತಿದ್ದೆ ಎಂದು ಅವರು ಈ ಹಿಂದೆ ಹೇಳಿಕೊಂಡಿದ್ದರು. ಆದರೆ ಅಲ್ಲಿಂದ ಆತ್ಮವಿಶ್ವಾಸ ಬೆಳೆಸಿಕೊಂಡು ಇಂದು ದೇಶದ ಬ್ಯೂಟಿ ಕ್ವೀನ್ ಆಗಿ ಹೊರಹೊಮ್ಮಿದ್ದಾರೆ.

ಕೇರಳದ ಮಾವೇಲಿಕ್ಕರದಿಂದ ಆರಂಭವಾದ ಕಾಜಿಯಾ ಲಿಜ್ ಮೆಜೊ ಅವರ ಪಯಣ ಇದೀಗ ಭಾರತದ ಕಿರೀಟದೊಂದಿಗೆ ಪ್ಯೂರ್ಟೊ ರಿಕೊದ ವಿಶ್ವ ವೇದಿಕೆಯತ್ತ ಸಾಗಿದೆ. 19ರ ಹರೆಯದಲ್ಲೇ ದೇಶದ ಕಿರೀಟ ಗೆದ್ದಿರುವ ಈ ಕುವರಿ, ಮುಂದಿನ ಹಂತದಲ್ಲಿ ಜಾಗತಿಕ ಕಿರೀಟ ಮುಡಿಗೇರಿಸಿಕೊಳ್ಳುತ್ತಾರಾ ಎಂಬ ಕುತೂಹಲ ಇದೀಗ ಎಲ್ಲರಲ್ಲೂ ಮೂಡಿದೆ,

(ಏಜೆನ್ಸೀಸ್​).