Soundarya Rajinikanth: ನಟ ರಜನಿಕಾಂತ್ ಅವರ ಪುತ್ರಿ ಹಾಗೂ ನಿರ್ಮಾಪಕಿ ಸೌಂದರ್ಯಾ ರಜನಿಕಾಂತ್ ತಮ್ಮ ವೈಯಕ್ತಿಕ ಜೀವನದ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾರೆ. ಇತ್ತೀಚಿನ ಸಂದರ್ಶನದಲ್ಲಿ ತಮ್ಮ ಮೊದಲ ಮದುವೆ, ವಿಚ್ಛೇದನ, ಎರಡನೇ ಮದುವೆ ಹಾಗೂ ಸಂಬಂಧಗಳಲ್ಲಿ ಸಮಾನತೆಯ ಬಗ್ಗೆ ಮನಬಿಚ್ಚಿ ಮಾತನಾಡಿದ್ದಾರೆ.
ಮೊದಲ ಮದುವೆ ಮುರಿದಾಗ ಅಪ್ಪ ರಜನಿಕಾಂತ್ ಹಾಗೂ ಅಮ್ಮ ಲತಾ ರಜನಿಕಾಂತ್ ತಮ್ಮ ಬೆನ್ನಿಗೆ ಗಟ್ಟಿಯಾಗಿ ನಿಂತಿದ್ದರು ಎಂದು ಸೌಂದರ್ಯಾ ಹೇಳಿದ್ದಾರೆ. ‘ನನ್ನ ಕಷ್ಟದ ಸಮಯದಲ್ಲಿ ಅಪ್ಪ-ಅಮ್ಮ ಬಂಡೆಯಂತೆ ನನ್ನ ಜತೆಗಿದ್ದರು. ಅವರ ಬೆಂಬಲ ಇಲ್ಲದೆ ಆ ಸಮಯವನ್ನು ಎದುರಿಸಲು ನನಗೆ ಸಾಧ್ಯವಾಗುತ್ತಿರಲಿಲ್ಲ’ ಎಂದು ಅವರು ಹೇಳಿದ್ದಾರೆ.
ವಿಚ್ಛೇದನದ ಬಳಿಕ ಮರುಮದುವೆ
ಮೊದಲ ಮದುವೆ ಮರಿದು ಬಿದ್ದರೂ ಅದರಿಂದ ಮದುವೆ ಮೇಲಿನ ನಂಬಿಕೆ ಹೋಗಲಿಲ್ಲ ಎಂದು ಸೌಂದರ್ಯಾ ಸ್ಪಷ್ಟಪಡಿಸಿದ್ದಾರೆ. ಅದು ಕೇವಲ ತಪ್ಪಾದ ಸಂಬಂಧವಾಗಿತ್ತು. ವಿಚ್ಛೇದನದ ಬಳಿಕ ತಾನು ಚೇತರಿಸಿಕೊಳ್ಳಲು ಸ್ವಲ್ಪ ಸಮಯ ತೆಗೆದುಕೊಂಡೆ. ನಂತರ ಮತ್ತೆ ಮದುವೆಯಾಗಲು ನಿರ್ಧರಿಸಿದೆ ಎಂದು ಹೇಳಿದ್ದಾರೆ.
ನಮ್ಮ ಮನೆಯಲ್ಲೂ ಪುರುಷ ಪ್ರಧಾನ ವ್ಯವಸ್ಥೆ ಇತ್ತು
ತಮ್ಮ ತಲೆಮಾರಿನಲ್ಲಿ ಬೆಳೆದ ಬಹುತೇಕ ಕುಟುಂಬಗಳಲ್ಲಿದ್ದಂತೆ ತಮ್ಮ ಮನೆಯಲ್ಲೂ ಪುರುಷ ಪ್ರಧಾನ ವ್ಯವಸ್ಥೆ ಇತ್ತು ಎಂದು ಸೌಂದರ್ಯಾ ಹೇಳಿದ್ದಾರೆ. ಆದರೆ ಈಗ ಕಾಲ ಬದಲಾಗುತ್ತಿದೆ, ಅದರ ಜತೆಗೆ ಸಂಬಂಧಗಳ ಬಗ್ಗೆ ಇರುವ ಆಲೋಚನೆಯೂ ಬದಲಾಗುತ್ತಿದೆ ಎಂದಿದ್ದಾರೆ.
