ಎಲ್ಲ ದೇಶಗಳ ಮೇಲಿಲ್ಲ ಈ ನಂಬಿಕೆ, ಭಾರತ ನಮಗೆ ಸ್ಪೆಷಲ್!...ರಕ್ಷಣಾ ಒಪ್ಪಂದದ ರಹಸ್ಯ ಬಿಚ್ಚಿಟ್ಟ ಅಮೆರಿಕ ರಾಯಭಾರಿ ಸರ್ಜಿಯೋ ಗೋರ್! | Sergio Gor

ಇಂಡಿಯಾ ಟುಡೇಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಮಾತನಾಡಿದ ಗೋರ್, ನಮ್ಮ ರಕ್ಷಣಾ ಸಂಬಂಧವು ಕೇವಲ ಮಾರಾಟದ ವ್ಯವಹಾರವಲ್ಲ. ಇದು ನಂಬಿಕೆಯ ವಿಷಯವೂ ಹೌದು ಎಂದಿದ್ದಾರೆ.

ಅಮೆರಿಕಾ ಜಗತ್ತಿನ ಪ್ರತಿಯೊಂದು ದೇಶಕ್ಕೂ ತನ್ನ ಮಿಲಿಟರಿ ಉಪಕರಣಗಳನ್ನು ಮಾರಾಟ ಮಾಡುವುದಿಲ್ಲ ಎಂದಿರುವ ಗೋರ್, ವಾಷಿಂಗ್ಟನ್ ನಂಬುವ ದೇಶಗಳಲ್ಲಿ ಭಾರತವೂ ಒಂದಾಗಿದೆ. ಅಮೆರಿಕ ತನ್ನ ಬಳಿ ಅತ್ಯುತ್ತಮ ಉಪಕರಣಗಳು ಮತ್ತು ಅತ್ಯಂತ ಸುಧಾರಿತ ತಂತ್ರಜ್ಞಾನ ಇದೆ ಎಂದು ನಂಬುತ್ತದೆ ಮತ್ತು ಭಾರತದಂತಹ ನಂಬಿಕಸ್ಥ ಪಾಲುದಾರರೊಂದಿಗೆ ಕೆಲಸ ಮಾಡುವುದನ್ನು ಒಂದು ಅದ್ಭುತ ಅವಕಾಶ ಎಂದು ನೋಡುತ್ತದೆ ಎಂದು ಅವರು ಪುನರುಚ್ಚರಿಸಿದ್ದಾರೆ.

ಉಭಯ ದೇಶಗಳ ನಡುವಿನ ರಕ್ಷಣಾ ಸಹಕಾರಕ್ಕೆ ಉದಾಹರಣೆಯಾಗಿ ಜಾವೆಲಿನ್ ಟ್ಯಾಂಕ್ ನಿರೋಧಕ ಕ್ಷಿಪಣಿ ವ್ಯವಸ್ಥೆ ಮತ್ತು ಅಪಾಚೆ ಹೆಲಿಕಾಪ್ಟರ್‌ಗಳನ್ನು ಗೋರ್ ಉಲ್ಲೇಖಿಸಿದ್ದಾರೆ. ಅದು ಜಾವೆಲಿನ್ ಇರಲಿ ಅಥವಾ ಈ ವರ್ಷದ ಆರಂಭದಲ್ಲಿ ಪೂರೈಸಲಾದ ಅಪಾಚೆ ಹೆಲಿಕಾಪ್ಟರ್‌ಗಳಾಗಿರಲಿ, ಅಥವಾ ಕಾರ್ಯಗತಗೊಳ್ಳುತ್ತಿರುವ ಇತರ ಹಲವಾರು ಉಪಕರಣಗಳಾಗಿರಲಿ, ರಕ್ಷಣಾ ಮಾರಾಟ ಕ್ಷೇತ್ರದಲ್ಲಿ ಇನ್ನೂ ಹೆಚ್ಚಿನ ವಿಚಾರಗಳು ನಡೆಯುತ್ತಿವೆ ಎಂದು ಅವರು ತಿಳಿಸಿದ್ದಾರೆ.

ರಕ್ಷಣಾ ತಂತ್ರಜ್ಞಾನ ವರ್ಗಾವಣೆಗೆ ಪ್ರಮುಖ ಉದಾಹರಣೆಯೆಂದರೆ, ಭಾರತೀಯ ಸೇನೆಯು ಸುಧಾರಿತ ಭುಜದ ಮೇಲಿಂದ ಹಾರಿಸುವ ಟ್ಯಾಂಕ್ ನಿರೋಧಕ ಕ್ಷಿಪಣಿ ವ್ಯವಸ್ಥೆಯಾದ ಜಾವೆಲಿನ್ ಅನ್ನು ಸ್ವಾಧೀನಪಡಿಸಿಕೊಳ್ಳಲು ಮಾಡಿಕೊಂಡ ಒಪ್ಪಂದವಾಗಿದೆ ಎಂದು ಗೋರ್ ಒತ್ತಿ ಹೇಳಿದ್ದಾರೆ.

ಜಾವೆಲಿನ್ ಸಿಸ್ಟಮ್‌ಗಾಗಿ ಲೆಟರ್ ಆಫ್ ಆಫರ್ ಅಂಡ್ ಎಕ್ಸೆಪ್ಟೆನ್ಸ್ (LOA) ಗೆ ಸಹಿ ಹಾಕಿದ ನಂತರ, ಟಾಟಾ ಅಡ್ವಾನ್ಸ್ಡ್ ಸಿಸ್ಟಮ್ಸ್ ಲಿಮಿಟೆಡ್ (TASL), ರೇಥಿಯಾನ್ ಮತ್ತು ಲಾಕ್ಹೀಡ್ ಮಾರ್ಟಿನ್ ನಡುವಿನ ಪಾಲುದಾರಿಕೆಯಾದ ಜಾವೆಲಿನ್ ಜಂಟಿ ಸಾಹಸಮೋದ್ಯಮದೊಂದಿಗೆ ಭಾರತದಲ್ಲೇ ಸಂಪೂರ್ಣವಾಗಿ ಜೋಡಿಸಲಾದ ಜಾವೆಲಿನ್ ಆಲ್ ಅಪ್ ರೌಂಡ್ ಕ್ಷಿಪಣಿಯ ಸಹ-ಉತ್ಪಾದನೆಯನ್ನು ಅನ್ವೇಷಿಸಲು ತಿಳುವಳಿಕಾ ಒಪ್ಪಂದಕ್ಕೆ ಸಹಿ ಹಾಕಿದೆ.

ಈ ತಿಳುವಳಿಕಾ ಒಪ್ಪಂದದ ಅಡಿಯಲ್ಲಿ, ಕಂಪನಿಗಳು ಭಾರತದಲ್ಲೇ ಜಾವೆಲಿನ್ ಆಲ್ ಅಪ್ ರೌಂಡ್​​ನ ಅಂತಿಮ ಜೋಡಣೆ ಮತ್ತು ಸಂಯೋಜನೆಗಾಗಿ ಸೌಲಭ್ಯವನ್ನು ಸ್ಥಾಪಿಸುವುದರ ಜೊತೆಗೆ ಬಿಡಿಭಾಗಗಳ ಉತ್ಪಾದನಾ ಸಾಮರ್ಥ್ಯವನ್ನು ಅನ್ವೇಷಿಸಲಿವೆ. ಈ ಉಪಕ್ರಮವು ಭಾರತದ ರಕ್ಷಣಾ ಕೈಗಾರಿಕಾ ವ್ಯವಸ್ಥೆಗೆ ನಿರ್ಣಾಯಕ ಜೋಡಣೆ ಪರಿಣತಿ ಮತ್ತು ಜ್ಞಾನದ ವರ್ಗಾವಣೆಯನ್ನು ತರುತ್ತದೆ ಹಾಗೂ ರಕ್ಷಣಾ ಉತ್ಪಾದನೆಯಲ್ಲಿ ದೇಶದ ಸ್ವಾವಲಂಬನೆಯನ್ನು ಬಲಪಡಿಸುತ್ತದೆ ಎಂದು ನಿರೀಕ್ಷಿಸಲಾಗಿದೆ.

ಆದರೆ ರಕ್ಷಣಾ ಸಂಬಂಧಗಳನ್ನು ಕೇವಲ ವ್ಯವಹಾರಿಕವಾಗಿ ನೋಡಲಾಗುವುದಿಲ್ಲ ಎಂದು ಗೋರ್ ಸ್ಪಷ್ಟಪಡಿಸಿದ್ದಾರೆ. ಈ ಸಂಬಂಧವು ಮಿಲಿಟರಿ ಕವಾಯತುಗಳು ಮತ್ತು ಎರಡೂ ದೇಶಗಳ ನಡುವಿನ ನಿರಂತರ ತೊಡಗಿಸಿಕೊಳ್ಳುವಿಕೆಯ ಮೂಲಕ ಬೆಳೆದ ನಂಬಿಕೆಯಲ್ಲಿ ಬೇರೂರಿದೆ ಎಂದು ಅವರು ಹೇಳಿದ್ದಾರೆ. ಭಾರತವು ಯಾವುದೇ ದೇಶಕ್ಕಿಂತ ಹೆಚ್ಚಾಗಿ ಅಮೆರಿಕದೊಂದಿಗೆ ಅತಿ ಹೆಚ್ಚು ಮಿಲಿಟರಿ ಕವಾಯತುಗಳನ್ನು ನಡೆಸುತ್ತದೆ ಎಂದು ಗೋರ್ ತಿಳಿಸಿದ್ದಾರೆ. ರಾಜಸ್ಥಾನದಲ್ಲಿ ನಡೆಯಲಿರುವ ದ್ವಿಪಕ್ಷೀಯ ಉಡಾವಾಸ್ ಸಮರಾಭ್ಯಾಸವನ್ನು ಯುಎಸ್-ಭಾರತ ಮಿಲಿಟರಿ ಸಹಕಾರಕ್ಕೆ ಮತ್ತೊಂದು ಉದಾಹರಣೆಯಾಗಿ ಅವರು ಉಲ್ಲೇಖಿಸಿದ್ದಾರೆ.

ಭಾರತವು ಬೇರೆಲ್ಲಾ ದೇಶಗಳಿಗಿಂತ ಅಮೆರಿಕದೊಂದಿಗೆ ಹೆಚ್ಚಿನ ಮಿಲಿಟರಿ ಅಭ್ಯಾಸಗಳನ್ನು ನಡೆಸುತ್ತದೆ ಮತ್ತು ನಾವು ಭಾರತವನ್ನು ನಂಬುತ್ತೇವೆ ಎಂದು ಹೇಳಿದ ಗೋರ್, ರಕ್ಷಣಾ ಸಹಕಾರವು ವಾಷಿಂಗ್ಟನ್ ಮುಂದುವರಿಸಿಕೊಂಡು ಹೋಗುವ ಮತ್ತು ವಿಸ್ತರಿಸುವ ಪ್ರಮುಖ ಕ್ಷೇತ್ರವಾಗಿದೆ ಎಂದಿದ್ದಾರೆ.

ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಪ್ರಧಾನಿ ನರೇಂದ್ರ ಮೋದಿ ನಡುವಿನ ವೈಯಕ್ತಿಕ ಬಾಂಧವ್ಯಕ್ಕೂ ಈ ಬಲವಾದ ಸಂಬಂಧವನ್ನು ಯುಎಸ್ ರಾಯಭಾರಿ ಜೋಡಿಸಿದ್ದು, ಉಭಯ ನಾಯಕರ ನಡುವೆ ನಿಜವಾದ ಸ್ನೇಹವಿದೆ ಎಂದು ಬಣ್ಣಿಸಿದ ಗೋರ್, ಈ ಸ್ನೇಹವು ವ್ಯಾಪಕ ಸಂಬಂಧಕ್ಕೆ ಬೆಂಬಲವಾಗಿರುವ ಮತ್ತೊಂದು ಪ್ರಮುಖ ಅಂಶವಾಗಿದೆ ಎಂದಿದ್ದಾರೆ(ಏಜೆನ್ಸೀಸ್​).