ಪಾಕ್‌ನಲ್ಲಿ ಆರ್ಥಿಕ ತುರ್ತು ಕ್ರಮ! ಕಾರು ಖರೀದಿಗೆ ಬ್ರೇಕ್, ರಾತ್ರಿ 9ಕ್ಕೆ ಅಂಗಡಿ ಬಂದ್; ಮದುವೆಗೂ ‘ಸಿಂಗಲ್ ಡಿಶ್’ ರೂಲ್ಸ್! Pakistan Economic Crisis

ಇಸ್ಲಾಮಾಬಾದ್​: ಮಧ್ಯಪ್ರಾಚ್ಯದಲ್ಲಿ ತಲೆದೋರಿರುವ ಯುದ್ಧದ ಕಾರ್ಮೋಡ ಹಾಗೂ ಕೆಂಪು ಸಮುದ್ರದಲ್ಲಿ ಸೃಷ್ಟಿಯಾಗಿರುವ ತಲ್ಲಣಗಳು ಇಡೀ ವಿಶ್ವದ ಆರ್ಥಿಕತೆಯ ಮೇಲೆ ದುಷ್ಪರಿಣಾಮ ಬೀರುತ್ತಿವೆ.

ಇದರ ಬಿಸಿ ಈಗ ನೆರೆ ದೇಶ ಪಾಕಿಸ್ತಾನಕ್ಕೆ ತಟ್ಟಿದ್ದು, ದೇಶದಲ್ಲಿ ಇಂಧನವನ್ನು ಉಳಿಸಲು ಮತ್ತು ಅನಗತ್ಯ ಸರ್ಕಾರಿ ಖರ್ಚುಗಳಿಗೆ ಕಠಿಣ ಕಡಿವಾಣ ಹಾಕಲು ಪಾಕಿಸ್ತಾನ ಸರ್ಕಾರ ದಿಢೀರ್ ಆರ್ಥಿಕ ತುರ್ತು (Pakistan Economic Crisis) ಕ್ರಮಗಳನ್ನು ಜಾರಿಗೆ ತಂದಿದೆ. ಸರ್ಕಾರಿ ವೆಚ್ಚವನ್ನು ಕನಿಷ್ಠ ಮಟ್ಟಕ್ಕೆ ತರಲು ಇಸ್ಲಾಮಾಬಾದ್ ಆಡಳಿತ ಹೊಸ ಆದೇಶಗಳನ್ನು ಹೊರಡಿಸಿದ್ದು, ಇವು ತಕ್ಷಣದಿಂದಲೇ ಜಾರಿಗೆ ಬರಲಿವೆ.

ಸರ್ಕಾರದ ಖರ್ಚಿನಲ್ಲಿ ಹೊಸ ವಾಹನಗಳನ್ನು ಖರೀದಿಸುವುದನ್ನು ಸಂಪೂರ್ಣವಾಗಿ ನಿಷೇಧಿಸಿ ಆದೇಶ ಹೊರಡಿಸಲಾಗಿದೆ. ಐಟಿ ಉಪಕರಣಗಳನ್ನು ಹೊರತುಪಡಿಸಿ ಇತರೆ ಬಾಳಿಕೆ ಬರುವ ವಸ್ತುಗಳ ಖರೀದಿಯ ಮೇಲೆಯೂ ನಿರ್ಬಂಧ ಹೇರಲಾಗಿದೆ.

ಸಾರ್ವಜನಿಕರ ಮೇಲೂ ಈ ಆರ್ಥಿಕ ಸಂಕಷ್ಟದ ಬಿಸಿ ತಟ್ಟಿದ್ದು, ಮದುವೆ ಹಾಗೂ ಇತರೆ ಶುಭ ಸಮಾರಂಭಗಳಲ್ಲಿ ಅತಿಥಿಗಳಿಗೆ ಕೇವಲ ಒಂದೇ ಒಂದು ಖಾದ್ಯವನ್ನು ಮಾತ್ರ ಬಡಿಸಬೇಕೆಂಬ ಕಟ್ಟುನಿಟ್ಟಿನ ನಿಯಮವನ್ನು ತರಲಾಗಿದೆ. ಇದು ಅನಗತ್ಯ ಆಹಾರ ಪೋಲು ಮತ್ತು ಖರ್ಚಿಗೆ ತಡೆ ಹಾಕುವ ಗುರಿ ಹೊಂದಿದೆ ಎಂದು ಪಾಕ್​ ಸರ್ಕಾರ ಸಮರ್ಥಿಸಿಕೊಂಡಿದೆ.

ವಿದ್ಯುತ್ ಮತ್ತು ಇಂಧನ ಉಳಿತಾಯಕ್ಕಾಗಿ ಸಾರ್ವಜನಿಕ ಮಳಿಗೆಗಳ ಸಮಯವನ್ನು ಕಡಿತಗೊಳಿಸಿ ಹೊಸ ಆದೇಶ ಹೊರಡಿಸಲಾಗಿದೆ. ಅಂಗಡಿಗಳು ಮತ್ತು ಶಾಪಿಂಗ್ ಮಾಲ್‌ಗಳು ರಾತ್ರಿ 9 ಗಂಟೆಯೊಳಗೆ ಕಡ್ಡಾಯವಾಗಿ ಬಾಗಿಲು ಹಾಕಬೇಕು.

ಮದುವೆ ಮಂಟಪಗಳು ಮತ್ತು ಪಾರ್ಟಿ ಹಾಲ್‌ಗಳು ರಾತ್ರಿ 10 ಗಂಟೆಯೊಳಗೆ ಕಾರ್ಯಕ್ರಮಗಳನ್ನು ಮುಗಿಸಬೇಕು. ರೆಸ್ಟೋರೆಂಟ್‌ಗಳು ಮತ್ತು ಕೆಫೆಗಳು ರಾತ್ರಿ 11 ಗಂಟೆಯೊಳಗೆ ಬಂದ್ ಆಗಬೇಕು ಎಂದು ನಿರ್ದೇಶನ ನೀಡಲಾಗಿದೆ. ಆಸ್ಪತ್ರೆಗಳು, ಮೆಡಿಕಲ್ ಶಾಪ್‌ಗಳು, ಜಿಮ್‌ಗಳು, ಐಟಿ ಕಂಪನಿಗಳು ಮತ್ತು ಪೆಟ್ರೋಲ್ ಬಂಕ್‌ಗಳಂತಹ ಅಗತ್ಯ ಸೇವೆಗಳಿಗೆ ಈ ಸಮಯದ ನಿರ್ಬಂಧದಿಂದ ವಿನಾಯಿತಿ ನೀಡಲಾಗಿದೆ.

ಫೆಡರಲ್ ಸರ್ಕಾರಿ ನೌಕರರು ಹಾಗೂ ಸಚಿವರ ವಿದೇಶ ಪ್ರವಾಸಗಳ ಮೇಲೆ ಮೂರು ತಿಂಗಳ ಕಾಲ ಸಂಪೂರ್ಣ ನಿಷೇಧ ಹೇರಲಾಗಿದೆ. ಒಂದು ವೇಳೆ ವಿದೇಶ ಪ್ರಯಾಣ ಅನಿವಾರ್ಯವಾದರೆ, ಸಚಿವರು ಮತ್ತು ಅಧಿಕಾರಿಗಳು ಐಷರಾಮಿ ವಿಮಾನಗಳ ಬದಲಿಗೆ ಎಕಾನಮಿ ಕ್ಲಾಸ್‌ನಲ್ಲಿ ಮಾತ್ರ ಪ್ರಯಾಣಿಸಬೇಕು ಎಂದು ಕಟ್ಟುನಿಟ್ಟಾಗಿ ಸೂಚಿಸಲಾಗಿದೆ.

ವೆಚ್ಚದಲ್ಲಿ ಶೇಕಡಾ 5ರಷ್ಟು ಕಡಿತ: ಪ್ರಸ್ತುತ ಹಣಕಾಸು ವರ್ಷದಲ್ಲಿ ನೌಕರರಿಗೆ ಸಂಬಂಧಿಸಿದ ವೆಚ್ಚಗಳಲ್ಲಿ ಮಾಸಿಕ ಶೇಕಡಾ 5ರಷ್ಟು ಕಡಿತಗೊಳಿಸಲಾಗುತ್ತದೆ.

ಸಭೆ-ಸಮಾರಂಭಗಳಿಗೆ ಬ್ರೇಕ್: ಸಚಿವ ಮಟ್ಟದ ಔತಣಕೂಟಗಳು ಹಾಗೂ ನಿಧಿಸಂಗ್ರಹಣೆ ಸೆಮಿನಾರ್‌ಗಳನ್ನು ರದ್ದುಗೊಳಿಸಲಾಗಿದೆ. ಸಾಧ್ಯವಾದಷ್ಟು ಆನ್‌ಲೈನ್ ಸಭೆಗಳನ್ನು ನಡೆಸಲು ಇಲಾಖೆಗಳಿಗೆ ಸೂಚಿಸಲಾಗಿದೆ.

ಮಧ್ಯಪ್ರಾಚ್ಯದಲ್ಲಿ ತೈಲ ಬೆಲೆ ಗಗನಕ್ಕೇರುತ್ತಿರುವ ಕಾರಣ, ಪಾಕಿಸ್ತಾನ ಸರ್ಕಾರ ಈ ಹಿಂದೆ ಮಾರ್ಚ್ ತಿಂಗಳಿನಲ್ಲೂ ಇಂತಹದೇ ಕಠಿಣ ಕ್ರಮಗಳನ್ನು ಜಾರಿಗೊಳಿಸಿತ್ತು. ಈಗ ಪರಿಸ್ಥಿತಿ ಮತ್ತಷ್ಟು ಬಿಗಡಾಯಿಸಿರುವುದರಿಂದ ಸರ್ಕಾರ ಈ ನಿರ್ಧಾರಗಳನ್ನು ಕೈಗೊಂಡಿದೆ, (ಏಜೆನ್ಸೀಸ್​).