ನಾಗ್ಪುರ: 'ಭಾರತ, ಹಿಂದೂಗಳು ಮತ್ತು ಸಂಘವನ್ನು ಯಾವ ರೀತಿಯಲ್ಲಿ ಧ್ವಂಸಗೊಳಿಸಬಹುದು ಎನ್ನುವ ಆಲೋಚನೆಯನ್ನು ದುಷ್ಟ ಶಕ್ತಿಗಳು ಮಾಡುತ್ತಿವೆ. ಅದಕ್ಕೆ ತಕ್ಕಂತೆ ಯೋಜನೆಯನ್ನು ಸಹ ರೂಪಿಸಿಕೊಳ್ಳುತ್ತಿವೆ.ಕೆಲವರು ತಮಗೆ ಬೇಕಾದಂತೆ ಈ ಪ್ರಯತ್ನಕ್ಕೆ ಸಹಾಯ ಮಾಡುತ್ತಿದ್ದಾರೆ. ಸ್ವಾರ್ಥ ರಾಜಕೀಯ ಹಿತಾಸಕ್ತಿಗಳು ಮತ್ತು ವಿವೇಚನೆಯ ಕೊರತೆಯಿಂದಾಗಿ, ಕೆಲವು ಮಹತ್ವಾಕಾಂಕ್ಷಿ ನಾಯಕರೂ ಸಹ ಇದರಲ್ಲಿ ಭಾಗಿಯಾಗುತ್ತಾರೆ' ಎಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಮುಖ್ಯಸ್ಥ ಮೋಹನ್ ಭಾಗವತ್ ಆರೋಪಿಸಿದರು.
ಮಹತ್ವಾಕಾಂಕ್ಷಿ ನಾಯಕರಿಂದ ಬೆಂಬಲ
ನಾಗಪುರದಲ್ಲಿ ನಡೆದ ಆರ್ಎಸ್ಎಸ್ ವಿಜಯದಶಮಿ ಉತ್ಸವದಲ್ಲಿ ಮಾತನಾಡಿದ ಅವರು ಭಾರತವನ್ನು ದುರ್ಬಲಗೊಳಿಸಲು ಜಾಗತಿಕ ಶಕ್ತಿಗಳು ಗುರಿಯಾಗಿಸಿಕೊಂಡಿವೆ. ಅಂತಹ ಪ್ರಯತ್ನಗಳು ಭಾರತದಲ್ಲಿಯೂ ನಡೆಯುತ್ತಿದ್ದು, ಅಧಿಕಾರದಾಹಿ ಮಹತ್ವಾಕಾಂಕ್ಷಿ ನಾಯಕರು ಇದಕ್ಕೆ ಬೆಂಬಲ ನೀಡುತ್ತಿದ್ದಾರೆ ಎಂದು ಅವರು ಹೇಳಿದರು.
ಕೆಟ್ಟ ಬಿರುಗಾಳಿಯೊಂದು ಪಾಶ್ಚಿಮಾತ್ಯದಿಂದ ಬೀಸಿದೆ
ಫ್ರಾನ್ಸ್, ಅಲ್ಬೇನಿಯಾ, ಬಾಂಗ್ಲಾದೇಶ ಮತ್ತು ನೇಪಾಳದಲ್ಲಿನ ಹಿಂಸಾಚಾರಾತ್ಮಕ ಪ್ರತಿಭಟನೆಗಳ ಬಗ್ಗೆ ಉಲ್ಲೇಖಿಸಿದ ಅವರು, ಆದರೆ, ಪ್ರತಿಭಟನೆಗಳು ಸಂವಿಧಾನ ಮತ್ತು ಕಾನೂನಿನ ಚೌಕಟ್ಟಿನೊಳಗೇ ನಡೆಯಬೇಕು ಎಂದು ಹೇಳಿದರು.
ಪಾಶ್ಚಿಮಾತ್ಯ ದೇಶಗಳಿಂದ ಬಿರುಗಾಳಿಯೊಂದು ವ್ಯವಸ್ಥೆ, ಸಂಸ್ಕೃತಿ ಮತ್ತು ಮಾನವೀಯ ಮೌಲ್ಯಗಳನ್ನು ವಿರೋಧಿಸುತ್ತಾ, ನಾಶಪಡಿಸಲು ಯತ್ನಿಸುತ್ತಿದೆ. ಅಭಿವೃದ್ಧಿ ಹೊಂದಿದ ರಾಷ್ಟ್ರಗಳು ಸಹ ಇದರಿಂದ ಬಾಧಿತರು. ಬಾಂಗ್ಲಾದೇಶ ಮತ್ತು ನೇಪಾಳ, ಫ್ರಾನ್ಸ್, ಅಲ್ವೇನಿಯಾದಲ್ಲಿ ಹಿಂಸಾಚಾರಾತ್ಮಕ ಪ್ರತಿಭಟನೆಗಳನ್ನು ಗಮನಿಸಿ, ನಮ್ಮ ದೇಶವು ಇನ್ನೂ ಅಭಿವೃದ್ಧಿಶೀಲ ಹಂತದಲ್ಲಿದೆ. ಹೀಗಾಗಿ ಸವಾಲುಗಳು ಸಾಮಾನ್ಯ ಎಂದು ಉಲ್ಲೇಖಿಸಿದರು
