ಮನಿಲಾಂಡ್ರಿಂಗ್​ ಅರೋಪದಿಂದ ಮುಕ್ತರಾದ ಸಿಬಿಐ ವಿಶೇಷ ಮಾಜಿ ನಿರ್ದೇಶಕ ರಾಕೇಶ್​ ಅಸ್ತಾನ

ನವದೆಹಲಿ: ಮನಿ ಲಾಂಡ್ರಿಂಗ್​ ಪ್ರಕರಣದ ಆರೋಪ ಎದುರಿಸುತ್ತಿದ್ದ ಸಿಬಿಐ ವಿಶೇಷ ಮಾಜಿ ನಿರ್ದೇಶಕ ರಾಕೇಶ್​ ಅಸ್ತಾನ ಆರೋಪ ಮುಕ್ತರಾಗಿದ್ದಾರೆ.

ಪ್ರಕರಣದ ತನಿಖೆ ನಡೆಸಿದ ಸಿಬಿಐ ಅಸ್ತಾನ ಹಾಗೂ ಸಿಬಿಐ ಉಪ ಪೊಲೀಸ್​ ವರಿಷ್ಟಾಧಿಕಾರಿಯಾಗಿದ್ದ ದೇವೇಂದರ್ ಕುಮಾರ್ ಅವರನ್ನು ಆರೋಪ ಮುಕ್ತಗೊಳಿಸಿದೆ.

ಅಸ್ತಾನ ಅವರು ಸಿಬಿಐ ವಿಶೇಷ ನಿರ್ದೇಶಕರಾಗಿದ್ದ ವೇಳೆ ಸಿಬಿಐ ಮುಖ್ಯಸ್ಥರಾಗಿದ್ದ ಅಲೋಕ್​ ವರ್ಮಾ ಅವರು 2018ರಲ್ಲಿ ಮನಿಲಾಂಡ್ರಿಂಗ್​ ಕೇಸು ದಾಖಲಿಸಿ ತನಿಖೆಗೆ ಸೂಚಿಸಿದ್ದರು.

ಹೈದರಾಬಾದ್ ಮೂಲದ ಉದ್ಯಮಿ ಸತೀಶ್ ಬಾಬು ಸನಾ ಎಂಬುವವರು ನೀಡಿದ ದೂರಿನ ಮೇರೆಗೆ ಭ್ರಷ್ಟಾಚಾರ ತಡೆ ಕಾಯ್ದೆ ಅಡಿಯಲ್ಲಿ ರಾಕೇಶ್​ ಅಸ್ತಾನ ಹಾಗೂ ಉಪ ಪೊಲೀಸ್ ವರಿಷ್ಠಾಧಿಕಾರಿ ದೇವೇಂದರ್ ಕುಮಾರ್ ವಿರುದ್ಧ ಕ್ರಿಮಿನಲ್ ಪಿತೂರಿ, ಭ್ರಷ್ಟಾಚಾರ ಮತ್ತು ದುಷ್ಕೃತ್ಯದ ಆರೋಪ ಹೊರಿಸಿ ಕೇಸು ದಾಖಲಿಸಲಾಗಿತ್ತು.

ಮಾಂಸ ರಫ್ತುದಾರ ಮೊಯಿನ್ ಖುರೇಷಿಗೆ ಸಂಬಂಧಿಸಿದ ಮನಿ ಲಾಂಡ್ರಿಂಗ್​ ಪ್ರಕರಣದಲ್ಲಿ ದೂರುದಾರ ಸತೀಶ್ ಸನಾ ಬಾಬು ಅವರನ್ನು ಉಳಿಸಲು ಕೇಸು ದಾಖಲಾಗಿತ್ತು. ಅಸ್ತಾನ ಹಾಗೂ ದೇವೇಂದರ್​ ಕುಮಾರ್​ ಲಂಚ ಸ್ವೀಕರಿಸಿದ್ದರು ಎನ್ನಲಾಗಿತ್ತು. ವಿಚಾರಣೆ ವೇಳೆ ಇಬ್ಬರ ವಿರುದ್ಧ ಇದ್ದ ಆರೋಪಗಳು ಸಾಬೀತಾಗಿಲ್ಲ. ಅಲ್ಲದೆ ಇದಕ್ಕೆ ಯಾವುದೇ ಪುರಾವೆಗಳು ಇಲ್ಲದ ಹಿನ್ನೆಲೆಯಲ್ಲಿ ಇಬ್ಬರನ್ನು ಆರೋಪ ಮುಕ್ತಗೊಳಿಸಲಾಗಿದೆ ಎಂದು ಸಿಬಿಐ ಅಧಿಕಾರಿಗಳು ತಿಳಿಸಿದ್ದಾರೆ. (ಏಜೆನ್ಸೀಸ್​)