Atlee Anant Ambani: ನಿರ್ದೇಶಕ ಅಟ್ಲೀ ಇದೀಗ ತಾವು ನಿರ್ಮಿಸಿರುವ ತಮಿಳು ಚಿತ್ರದ ಸಕ್ಸಸ್ ಖುಷಿಯಲ್ಲಿದ್ದಾರೆ. ಈ ವೇಳೆ ತಮ್ಮ ವೈಯಕ್ತಿಕ ಜೀವನ, ಸಿನಿಮಾ ಜರ್ನಿ ಹಾಗೂ ತಮ್ಮ ಬಗ್ಗೆ ಬಂದ ಟ್ರೋಲ್‌ಗಳ ಬಗ್ಗೆಯೂ ಅವರು ಮನಬಿಚ್ಚಿ ಮಾತನಾಡಿದ್ದಾರೆ. ಅದರಲ್ಲೂ ತಮ್ಮ ಲುಕ್ ಬಗ್ಗೆ ಬಂದ ಟೀಕೆಗಳು ಮತ್ತು ಅನಂತ್ ಅಂಬಾನಿ ಮದುವೆಯಲ್ಲಿ ಪತ್ನಿ ಪ್ರಿಯಾ ಧರಿಸಿದ್ದ ‘ಅನಂತ್ಸ್ ಬ್ರಿಗೇಡ್’ ಚೋಲಿ ಬಗ್ಗೆ ಬಂದ ಟೀಕೆಗಳಿಗೆ ಅಟ್ಲೀ ಖಡಕ್ ಆಗಿಯೇ ಉತ್ತರಿಸಿದ್ದಾರೆ.
ಚಿತ್ರದ ಸಕ್ಸಸ್ ಮೀಟ್‌ನಲ್ಲಿ ಅಟ್ಲೀ ಅವರನ್ನು ಅವರ ಲುಕ್ ಬಗ್ಗೆ ಬರುತ್ತಿರುವ ಟ್ರೋಲ್‌ಗಳ ಬಗ್ಗೆ ಪ್ರಶ್ನಿಸಲಾಯಿತು. ಇದಕ್ಕೆ ಉತ್ತರಿಸಿದ ಅವರು, ‘ಅವರು ಏನು ಬೇಕಾದರೂ ಹೇಳಲಿ. ಹೌದು, ನನ್ನ ಮೈಬಣ್ಣ ಕಪ್ಪು. ಅವರು ನನ್ನನ್ನು ‘ಮಾಮೂಲಿ’ ಎಂದು ಕರೆಯುತ್ತಾರೆ. ಅದು ಅವರ ಅಭಿಪ್ರಾಯ’ ಎಂದಿದ್ದಾರೆ. ಸಿನಿಮಾಗಳಲ್ಲಿ ನಾಯಕನಾಗಿ ನಟಿಸಲು ನಾಲ್ಕು ಬಾರಿ ಅವಕಾಶ ಬಂದಿತ್ತು. ಆದರೆ ಆ ಅವಕಾಶಗಳನ್ನು ತಾವು ನಿರಾಕರಿಸಿದ್ದಾಗಿ ಅಟ್ಲೀ ಹೇಳಿದ್ದಾರೆ.
ಅನಂತ್ ನನ್ನ ಕಷ್ಟದ ಸಮಯದಲ್ಲಿ ಕೈ ಹಿಡಿದಿದ್ದರು
2024ರಲ್ಲಿ ಅನಂತ್ ಅಂಬಾನಿ ಹಾಗೂ ರಾಧಿಕಾ ಮರ್ಚೆಂಟ್ ಮದುವೆಯಲ್ಲಿ ಪ್ರಿಯಾ ಅಟ್ಲೀ ‘ಅನಂತ್ಸ್ ಬ್ರಿಗೇಡ್’ ಎಂದು ಬರೆದ ಚೋಲಿ ಧರಿಸಿದ್ದರು. ಈ ಬಗ್ಗೆ ಬಂದ ಟೀಕೆಗಳಿಗೆ ಪ್ರತಿಕ್ರಿಯಿಸಿದ ಅಟ್ಲೀ, “ಅನಂತ್ ನನ್ನ ಆಪ್ತ ಸ್ನೇಹಿತ. ಮುಂಬೈನಲ್ಲಿ ನಾನು ಕಷ್ಟದಲ್ಲಿದ್ದಾಗ ಅವರು ನನ್ನ ಬೆಂಬಲಕ್ಕೆ ನಿಂತಿದ್ದರು. ಹಾಗಾಗಿ ಜನರು ಏನೇ ಹೇಳಲಿ, ನನ್ನ ಸಿನಿಮಾಗಳೇ ನನ್ನ ಉತ್ತರ” ಎಂದಿದ್ದಾರೆ. ಅನಂತ್-ರಾಧಿಕಾ ಮದುವೆಯಲ್ಲಿ ಅನನ್ಯಾ ಪಾಂಡೆ, ಖುಷಿ ಕಪೂರ್ ಹಾಗೂ ಶನಾಯಾ ಕಪೂರ್ ಕೂಡ ಇದೇ ರೀತಿಯ ಚೋಲಿಗಳನ್ನು ಧರಿಸಿದ್ದರು.
