ಬ್ರಾಸಿಲಿಯಾ: ಮಹಾಮಾರಿ ಕರೊನಾ ವೈರಸ್ ಆರೋಗ್ಯಯುತ ಕೋಶಗಳಿಗೆ ದಾಳಿ ಮಾಡುವ ಸರಣಿ ಚಿತ್ರವನ್ನು ಮೊದಲ ಬಾರಿಗೆ ಶಕ್ತಿಶಾಲಿ ಎಲೆಕ್ಟ್ರಾನ್ ಸೂಕ್ಷ್ಮದರ್ಶಕ(ಮೈಕ್ರೋಸ್ಕೋಪ್) ಸಹಾಯದಿಂದ ಬ್ರೆಜಿಲ್ನ ಒಸ್ವಾಲ್ಡೋ ಕ್ರುಜ್ ಫೌಂಡೇಶನ್ ಪರಿಣಿತರು ಸೆರೆಹಿಡಿದಿದ್ದಾರೆ.
ಕರೊನಾ ವೈರಸ್ ಪ್ರತಿಕೃತಿಗಳು ಹಾಗೂ ಹರಡುವ ಬಗೆಯನ್ನು ಅಧ್ಯಯನ ಮಾಡುವಾಗ ಆಶ್ಚರ್ಯಚಕಿತ ಚಿತ್ರಗಳನ್ನು ಸೆರೆಹಿಡಿಯಲಾಗಿದೆ. ಡೆಡ್ಲಿ ವೈರಸ್ನ ಅನೇಕ ಕಣಗಳು ಸಾಮಾನ್ಯವಾಗಿ ಕೋಶಗಳನ್ನು ಪ್ರವೇಶಿಸಲು ಯತ್ನಿಸುವುದರಿಂದ ಕೋಶದೊಳಗೆ ಹೋಗುತ್ತಿರುವುದನ್ನು ಸರಣಿ ಚಿತ್ರದಲ್ಲಿ ಕಾಣಬಹುದಾಗಿದೆ.
ಸಂಶೋಧಕರು ಸಾಧನವೊಂದನ್ನು ಬಳಸಿದ್ದು, ಅದು ವೈರಸ್ಗಳನ್ನು ಅವುಗಳ ಸಾಮಾನ್ಯ ಗಾತ್ರಕ್ಕಿಂತ ಎರಡು ದಶಲಕ್ಷ ಪಟ್ಟು ಹೆಚ್ಚು ವರ್ಧಿಸಲು ಅನುವು ಮಾಡಿಕೊಡುತ್ತದೆ. ಬಳಿಕ ಕೋಶದೊಳಗೆ ವೈರಸ್ಗಳು ಪ್ರವೇಶಿಸಲು ಅನುವು ಮಾಡಿಕೊಟ್ಟು ವೈರಸ್ ಚಿತ್ರವನ್ನು ಸೆರೆಹಿಡಿಯಲಾಗಿದೆ.
ಅಧ್ಯಯನಕ್ಕೆ ಮಾನವನ ಕೋಶಗಳನ್ನು ಬಳಸಿಕೊಳ್ಳದೇ ಆಫ್ರಿಕನ್ ಹಸಿರು ಕೋತಿಯ ಕೋಶಗಳನ್ನು ಬಳಸಿಕೊಳ್ಳಲಾಗಿದೆ ಎಂದು ಸಂಶೋಧಕರು ತಿಳಿಸಿದ್ದಾರೆ. ಸಸ್ತನಿ ವರ್ಗದ ಹಸಿರು ಕೋತಿಯು ಆಫ್ರಿಕಾದ ಸುಡಾನ್ ಮತ್ತು ಇಥೋಪಿಯಾದಲ್ಲಿ ಕಂಡುಬರುತ್ತವೆ. ಇವುಗಳ ಕೋಶ ರಚನೆಯನ್ನು ಆಗಾಗ ಪ್ರಯೋಗಶಾಲೆಗಳಲ್ಲಿ ಪರೀಕ್ಷಿಸಲು ಬಳಸಲಾಗುತ್ತದೆ ಎಂದು ಕ್ರುಜ್ ಫೌಂಡೇಶನ್ ಪರಿಣಿತರು ವಿವರಿಸಿದ್ದಾರೆ.
ಅಧ್ಯಯನ ಹಂತದದಲ್ಲಿ ಪ್ರಮುಖ ಮೂರು ಫೋಟೋಗಳನ್ನು ಸೆರೆಹಿಡಿಯಲಾಗಿದೆ. ಇವುಗಳಲ್ಲಿ ಕರೊನಾ ವೈರಸ್ ಕೋಶಗಳನ್ನು ಪ್ರವೇಶಿಸಲು ತನ್ನಷ್ಟಕ್ಕೆ ತಾನೇ ಅಣಿಯಾಗುವುದನ್ನು ಕಾಣಬಹುದಾಗಿದೆ.
ಚಿತ್ರವೊಂದರಲ್ಲಿ ಕರೊನಾ ವೈರಸ್ನ ಅನೇಕ ಕಣಗಳು ಕೋಶಗಳ ಸೈಟೋಪ್ಲಾಸಂಗೆ ಸೋಂಕು ತಗುಲಿಸುವ ಪ್ರಯತ್ನ ಮಾಡುತ್ತಿದೆ. ಈ ಹಂತದಲ್ಲಿ ವೈರಸ್ ತನ್ನ ಅನುವಂಶೀಯ ವಸ್ತುವನ್ನು ಕೋಶದಲ್ಲಿ ಸ್ಥಾಪಿಸುತ್ತದೆ. ಮತ್ತೊಂದು ಚಿತ್ರದಲ್ಲಿ ವೈರಲ್ ಕಣಗಳು ಕೋಶಗಳಿಗೆ ಸೋಂಕು ತಗುಲಿಸುತ್ತದೆ. ಈ ಹಂತದಲ್ಲಿ ಮಾನವನಿಗೆ ವೈರಸ್ ತಗುಲಿದೆ ಎಂದು ಹೇಳಬಹುದು.
ಸೋಂಕಿತ ರೋಗಿಯ ಮೂಗು ಮತ್ತು ಗಂಟಲಿನಿಂದ ಸಂಗ್ರಹಿಸಿದ ಮಾದರಿಯಲ್ಲಿ ವೈರಸ್ ಅನ್ನು ಪ್ರತ್ಯೇಕಿಸಿ, ಬಳಿಕ ಪ್ರಯೋಗಾಲಯಕ್ಕೆ ತೆಗೆದುಕೊಂಡು ಹೋಗಿ ಹಸಿರು ಕೋತಿಯ ಕೋಶಗಳ ಮೇಲೆ ಪ್ರಯೋಗಿಸಲಾಗಿದೆ. ಬಳಿಕ ಅದನ್ನು ಎಲೆಕ್ಟ್ರಾನ್ ಮೈಕ್ರೋಸ್ಕೋಪ್ ಸಹಾಯಾದಿಂದ ಚಿತ್ರವನ್ನು ಸೆರೆಹಿಡಿಯಲಾಗಿದೆ.
ಚಿತ್ರದಲ್ಲಿರುವ ಕಪ್ಪು ಕಲೆಗಳೇ ಕರೊನಾ ವೈರಸ್ ಎಂದು ಸಂಶೋಧಕರು ತಿಳಿಸಿದ್ದಾರೆ. ಅದನ್ನು ತಡೆಯುವ ಬಗೆ ಹೇಗೆ ಎಂಬುದನ್ನು ಈವರೆಗೆ ಪತ್ತೆಹಚ್ಚಲು ಸಾಧ್ಯವಾಗಿಲ್ಲ. ಈ ನಿಟ್ಟಿನಲ್ಲಿ ಸಾಕಷ್ಟು ಅಧ್ಯಯನಗಳು ನಡೆಯುತ್ತಲೇ ಇವೆ.
ಕರೊನಾಗೆ ಈವರೆಗೂ ಔಷಧಿಯನ್ನು ಕಂಡುಹಿಡಿದಿಲ್ಲ. ಚೀನಾದ ವುಹಾನ್ ನಗರದ ಪ್ರಾಣಿ ಮಾರುಕಟ್ಟೆಯಲ್ಲಿ ವೈರಸ್ ಹುಟ್ಟಿಕೊಂಡಿತು ಎನ್ನಲಾಗಿದೆ. ವೈರಸ್ ಬಾವಲಿಯಿಂದ ಮಾನವನಿಗೆ ಹರಡಿದೆ ಎಂದು ಅನೇಕ ಅಧ್ಯಯನಗಳು ಹೇಳಿವೆ. ಇದು ಸಂಪೂರ್ಣ ಹೊಸ ವೈರಸ್ ಆಗಿರುವುದರಿಂದ ಈ ಬಗ್ಗೆ ಸಮಗ್ರವಾಗಿ ತಿಳಿದುಕೊಳ್ಳಲು ಇನ್ನಷ್ಟು ಅಧ್ಯಯನದ ಅವಶ್ಯಕತೆ ಇದೆ.
ಕರೊನಾ ವೈರಸ್ ಸೋಂಕಿನ ಕ್ಷಣಗಳ ಚಿತ್ರವನ್ನು ಫಿಯೊಕ್ರುಜ್(Fiocruz) ವೆಬ್ಸೈಟ್ನಲ್ಲಿ ಸಮಗ್ರವಾಗಿ ನೋಡಬಹುದಾಗಿದೆ. (ಏಜೆನ್ಸೀಸ್)
ಬಡವರ ಸೋಗಿನಲ್ಲಿ ಊಟ ಕಸಿಯುತ್ತಿರುವ ಸಿರಿವಂತ ಸೋಮಾರಿಗಳು: ರಾಜಸ್ಥಾನದಲ್ಲಿ 22 ಕೂಲಿ ಕಾರ್ಮಿಕರ ಸಾವು
ಮಹಾರಾಷ್ಟ್ರದಲ್ಲಿ ಕೋವಿಡ್ 19 ರಾಜಕೀಯ, ಅಧಿಕಾರಿಗಳೊಂದಿಗಿನ ರಾಜ್ಯಪಾಲರ ಸಭೆ ಖಂಡಿಸಿದ ಶಿವಸೇನೆ