ಕ್ಯಾಲಿಫೋರ್ನಿಯಾ: ಇತ್ತ ಭಾರತದಲ್ಲಿ ಕೆಂಪುಕೋಟೆಯಿಂದ ರಾಷ್ಟ್ರಧ್ವಜವನ್ನು ಇಳಿಸಿ ಅವಮಾನ ಮಾಡಿದ್ದರೆ, ಅತ್ತ ಅಮೆರಿಕದಲ್ಲಿ ಸಾರ್ವಜನಿಕ ಪಾರ್ಕೊಂದರಲ್ಲಿದ್ದ ಅಹಿಂಸೆಯ ಪ್ರತಿಪಾದಕ ಗಾಂಧಿ ಪ್ರತಿಮೆಯನ್ನು ಹಾಳುಗೆಡವಿರುವ ಘಟನೆ ನಡೆದಿದೆ.
ಉತ್ತರ ಕ್ಯಾಲಿಫೋರ್ನಿಯಾದ ಡೇವಿಸ್ ನಗರದ ಸೆಂಟ್ರಲ್ ಪಾರ್ಕ್ನಲ್ಲಿ ಗಾಂಧೀಜಿಯ ಆರು ಅಡಿ ಎತ್ತರದ 294 ಕೆಜಿ ತೂಕದ ಬ್ರಾಂಜ್ ಪ್ರತಿಮೆಯಿತ್ತು. ಜನವರಿ 27 ರ ಬೆಳಗಿನ ಜಾವ ಪ್ರತಿಮೆಯ ಅರ್ಧ ಮುಖವನ್ನು ಮತ್ತು ಪಾದಗಳನ್ನು ಕತ್ತರಿಸಿ ತೆಗೆದಿದ್ದು, ಪ್ರತಿಮೆಯನ್ನು ನೆಲಕ್ಕುರುಳಿಸಿರುವುದು ಕಂಡುಬಂತು. ಈ ಹೇಯ ಕೃತ್ಯಕ್ಕೆ ಕಾರಣರಾದ ದುಷ್ಕರ್ಮಿಗಳನ್ನು ಹುಡುಕಲು ಡೇವಿಸ್ ನಗರ ಪೊಲೀಸರು ತನಿಖೆ ಆರಂಭಿಸಿದ್ದಾರೆ.
ನಾಲ್ಕು ವರ್ಷಗಳ ಹಿಂದೆ ಈ ಪ್ರತಿಮೆಯನ್ನು ಭಾರತ ಸರ್ಕಾರವು ಡೇವಿಸ್ ನಗರ ಆಡಳಿತಕ್ಕೆ ಉಡುಗೊರೆಯಾಗಿ ನೀಡಿತ್ತು. ಆಗ ಈ ಪ್ರತಿಮೆಯನ್ನು ಸ್ಥಾಪಿಸುವ ಬಗ್ಗೆ ಕೆಲವು ಗಾಂಧಿ ವಿರೋಧಿ ಮತ್ತು ಭಾರತ ವಿರೋಧಿ ಸಂಘಟನೆಗಳು ವಿರೋಧ ವ್ಯಕ್ತಪಡಿಸಿದ್ದವು. ಆದಾಗ್ಯೂ ಸಿಟಿ ಕೌನ್ಸಿಲ್ ಪ್ರತಿಮೆಯನ್ನು ಸ್ಥಾಪಿಸುವ ಪರವಾಗಿ ನಿರ್ಧಾರ ತೆಗೆದುಕೊಂಡಿತ್ತು ಎನ್ನಲಾಗಿದೆ.
ಭಾರತದ ಹೆಮ್ಮೆಯ ಪ್ರತೀಕಕ್ಕೆ ಧಕ್ಕೆ ತಂದಿರುವ ಈ ಕೃತ್ಯದ ಬಗ್ಗೆ ಭಾರತೀಯ ಅಮೆರಿಕನ್ನರಲ್ಲಿ ತೀವ್ರ ಅಸಮಾಧಾನ ವ್ಯಕ್ತವಾಗಿದೆ. ಫ್ರೆಂಡ್ಸ್ ಆಫ್ ಇಂಡಿಯಾ ಸೊಸೈಟಿ ಇಂಟರ್ನ್ಯಾಷನಲ್ ಮತ್ತು ಹಿಂದೂ ಅಮೇರಿಕನ್ ಫೌಡೇಶನ್ ಈ ಕೃತ್ಯವನ್ನು ಖಂಡಿಸಿದೆ.
ಇದನ್ನು ಭಾರತೀಯ ಅಮೇರಿಕನ್ನರ ವಿರುದ್ಧದ ದ್ವೇಷದ ಅಪರಾಧ ಎಂದು ಪರಿಗಣಿಸಿ, ಹೋಮ್ಲ್ಯಾಂಡ್ ಸೆಕ್ಯುರಿಟಿ ಇಲಾಖೆ ಮತ್ತು ಎಫ್ಬಿಐ ತನಿಖೆ ನಡೆಸಬೇಕಾಗಿ ಸಂಘಟನೆಯ ಸದಸ್ಯರು ಕೋರಿದ್ದಾರೆ. ಈ ಘಟನೆಗೆ ವ್ಯಾಪಕ ಖಂಡನೆ ವ್ಯಕ್ತವಾಗಿದೆ.
VIDEO: ಕರ್ತವ್ಯದ ಹೊತ್ತಲ್ಲೇ ಸಿಸಿಬಿ ಪೊಲೀಸರ ಗುಂಡು ಪಾರ್ಟಿ- ವಿಡಿಯೋ ವೈರಲ್
ಪ್ರತಿಭಟನೆ ಹೆಸರಲ್ಲಿ ನಡೆದ ಹಿಂಸಾಚಾರದ ನಂತರ ಸ್ಫೋಟಿಸಿದ್ದು ನಾವೇ ಎಂದು ಒಪ್ಪಿಕೊಂಡ ಜೈಷ್ ಸಂಘಟನೆ!