ಮುಂಬೈ: ಕಳೆದ ವರ್ಷ ಉರಿ-ದಿ ಸರ್ಜಿಕಲ್ ಸ್ಟ್ರೈಕ್ ಮೂಲಕ ವೀಕ್ಷಕರಲ್ಲಿ ವಿಸ್ಮಯ ಮೂಡಿಸಿ, ರಾಷ್ಟ್ರಪ್ರಶಸ್ತಿಯನ್ನೂ ಪಡೆದಿದ್ದ ನಟ ವಿಕ್ಕಿ ಕೌಶಾಲ್ ಈಗ ಮತ್ತೊಮ್ಮೆ ತೆರೆಯ ಮೇಲೆ ಬರಲು ಸಿದ್ಧರಾಗಿದ್ದಾರೆ. ಆದರೆ ಈ ಬಾರಿ ಅವರು ಸಿನಿ ಪ್ರಿಯರಲ್ಲಿ ಭಯ ಹುಟ್ಟಿಸಲಿದ್ದಾರೆ ಎಂಬುದು ಗೊತ್ತಾಗುತ್ತಿದೆ.
ವಿಕ್ಕಿ ಕೌಶಾಲ್ ಅವರ ಮುಂದಿನ ಸಿನಿಮಾ ಭೂತ್ ಪಾರ್ಟ್-1: ದಿ ಹಂಟೆಡ್ ಶಿಪ್ ನ ಅಧಿಕೃತ ಟ್ರೇಲರ್ ಇಂದು ಬಿಡುಗಡೆಯಾಗಿದೆ. ಇದೊಂದು ದೆವ್ವದ ಸಿನಿಮಾ ಎಂಬುದು ಇತ್ತೀಚೆಗೆ ಬಿಡುಗಡೆಯಾಗಿದ್ದ ಟೀಸರ್ ನಿಂದಲೇ ಗೊತ್ತಾಗಿತ್ತು.
ಇದೀಗ ಬಿಡುಗಡೆಯಾದ 2 ನಿಮಿಷ 52 ಸೆಕೆಂಡ್ಗಳ ಟ್ರೇಲರ್ನಲ್ಲಿ ವಿಕ್ಕಿ ಕೌಶಾಲ್ ಅವರು ಕತ್ತಲಲ್ಲಿ, ಮುಂಬೈನ ಜುಹು ಬೀಚ್ನಲ್ಲಿ ನಿಂತಿರುವ ಸೀ ಬರ್ಡ್ ಎಂಬ ಹೆಸರಿನ ಪಾಳು ಬಿದ್ದ ಹಡಗನ್ನು ಪ್ರವೇಶಿಸುವುದನ್ನು ನೋಡಬಹುದು. ಜ.30ರಂದು ಬಿಡುಗಡೆಯಾಗಿದ್ದ 58 ಸೆಕೆಂಡ್ಗಳ ಟೀಸರ್ನಲ್ಲೂ ಕೂಡ ವಿಕ್ಕಿ ಕೌಶಾಲ್ ಕತ್ತಲಲ್ಲಿ ಟಾರ್ಚ್ ಹಿಡಿದು ಓಡಾಡುತ್ತಿರುವ ದೃಶ್ಯವನ್ನು ನೋಡಬಹುದು.
ಭೂತ್ ಸಿನಿಮಾದಲ್ಲಿ ವಿಕ್ಕಿ ಅವರು ಸೀ ಬರ್ಡ್ನ ಸರ್ವೇ ಅಧಿಕಾರಿಯ ಪಾತ್ರ ನಿರ್ವಹಿಸುತ್ತಿದ್ದಾರೆ. ಅದರಲ್ಲಿ ಅವರ ಹೆಸರು ಪೃಥ್ವಿ ಎಂದು.
ವಿಕ್ಕಿ ಕೌಶಾಲ್ ಟ್ರೇಲರ್ನ್ನು ತಮ್ಮ ಇನ್ಸ್ಟಾಗ್ರಾಂನಲ್ಲೂ ಶೇರ್ ಮಾಡಿಕೊಂಡಿದ್ದಾರೆ. ಈ ಸಿನಿಮಾವನ್ನು ಭಾನು ಪ್ರತಾಪ್ ಸಿಂಗ್ ನಿರ್ದೇಶಿಸಿದ್ದು ಕರಣ್ ಜೋಹರ್, ಹೀರೂ ಜೋಹರ್, ಅಪೂರ್ವಾ ಮೆಹ್ತಾ ಹಾಗೂ ಶಶಾಂಕ್ ಖೈತಾನ್ ಜಂಟಿಯಾಗಿ ನಿರ್ಮಾಣ ಮಾಡಿದ್ದಾರೆ.
ನಾಯಕಿಯಾಗಿ ಭೂಮಿ ಫೆಡ್ನೆಕರ್ ಅಭಿನಯಿಸಿದ್ದು ಫೆ.21ರಂದು ಸಿನಿಮಾ ಬಿಡುಗಡೆಯಾಗಲಿದೆ.(ಏಜೆನ್ಸೀಸ್)