ಮಹೋಬಾ: ಪ್ರೀತಿಸಿ ಓಡಿಹೋದರೆಂಬ ಸಿಟ್ಟಿಗೆ ಯುವತಿಯ ಮನೆಯವರೇ ಪ್ರೇಮಿಗಳಿಗೆ ಎಲೆಕ್ಟ್ರಿಕ್ ಶಾಕ್ ಕೊಟ್ಟು, ಸತ್ತರೆಂದು ತಿಳಿದು ಬಯಲಲ್ಲಿ ಎಸೆದು ಹೋಗಿರುವ ಘಟನೆ ಉತ್ತರ ಪ್ರದೇಶದ ಮಹೋಬಾದಲ್ಲಿ ನಡೆದಿದೆ.
23 ವರ್ಷದ ದೀಪಕ್ ಯುವತಿಯೊಬ್ಬಳನ್ನು ಪ್ರೀತಿಸುತ್ತಿದ್ದ. ಆದರೆ ಯುವತಿಯ ಮನೆಯವರು ಈ ಪ್ರೀತಿಯನ್ನು ಒಪ್ಪಿಕೊಂಡಿರಲಿಲ್ಲ. ಮದುವೆಗೆ ನಿರಾಕರಿಸಿದ್ದರು. ಜನವರಿ 29ರಂದು ಪ್ರೇಮಿಗಳಿಬ್ಬರು ಊರು ಬಿಟ್ಟು ಓಡಿ ಹೋಗಿದ್ದಾರೆ. ಮಗಳು ಮನೆಯಲ್ಲಿ ಕಾಣಲಿಲ್ಲವೆಂದಾಕ್ಷಣ ಯುವತಿಯ ಮನೆಯವರು ಹುಡುಕಾಟ ಆರಂಭಿಸಿದ್ದಾರೆ. ದುರಾದೃಷ್ಟವಶಾತ್ ಅವರಿಬ್ಬರು ಓಡಿಹೋದ ಮಾರನೇ ದಿನವೇ ಚಿಕಾಸಿ ಪ್ರದೇಶದ ಅತ್ರಾ ಬಾರೌಲಿ ಗ್ರಾಮದ ಬಳಿ ಯುವತಿಯ ಕುಟುಂಬಸ್ಥರ ಬಳಿ ಸಿಕ್ಕಿ ಬಿದ್ದಿದ್ದಾರೆ.
ಬಾರೌಲಿಯಿಂದ ಮಹೋಬಾಕ್ಕೆ ಇಬ್ಬರನ್ನೂ ಎಳೆದುಕೊಂಡು ಹೋಗಿರುವ ಕುಟುಂಬಸ್ಥರು ಇಬ್ಬರೂ ಎಚ್ಚರ ತಪ್ಪುವವರೆಗೂ ಎಲೆಕ್ಟ್ರಿಕ್ ಶಾಕ್ ನೀಡಿದ್ದಾರೆ. ಎಚ್ಚರ ತಪ್ಪಿದ ಅವರನ್ನು ನೋಡಿ ಸತ್ತಿದ್ದಾರೆ ಎಂದು ತಿಳಿದು ಅಲ್ಲೇ ಹತ್ತಿರದ ಬಯಲೊಂದರಲ್ಲಿ ಎಸೆದು ಅಲ್ಲಿಂದ ಕಾಲ್ಕಿತ್ತಿದ್ದಾರೆ.
ಸ್ವಲ್ಪ ಸಮಯದ ನಂತರ ಎಚ್ಚರವಾದ ಪ್ರೇಮಿಗಳು ಪೊಲೀಸರ ಬಳಿ ಬಂದು ದೂರು ದಾಖಲಿಸಿದ್ದಾರೆ. ಯುವತಿಯ ಕುಟುಂಬಸ್ಥರಾದ ಶೋಧನ್, ಧರ್ಮೇಂದ್ರ ಮತ್ತು ಲಕ್ಷ್ಮಣ್ ಹೆಸರಿನಲ್ಲಿ ದೂರು ದಾಖಲಾಗಿದೆ. ಪ್ರಕರಣದ ತನಿಖೆ ನಡೆಸುತ್ತಿರುವ ಪೊಲೀಸರು ಶೀಘ್ರವೇ ಅಪರಾಧಿಗಳನ್ನು ಸೆರೆಹಿಡಿಯುವುದಾಗಿ ತಿಳಿಸಿದ್ದಾರೆ. (ಏಜೆನ್ಸೀಸ್)