ಪುಸ್ತಕದಲ್ಲಿ ಪ್ರಸ್ತಾಪಿತ ವಿಷಯ ಕಲಿಕಾ ಕೇಂದ್ರಗಳಿಗೆ, ವಿಮರ್ಶಕರಿಗೆ ನೋವಾಗಿದ್ದಲ್ಲಿ ಕ್ಷಮೆಯಿರಲಿ. ಹಿರಿಯ ಚೇತನರು, ಸಾರ್ವಕಾಲಿಕ ಶ್ರೇಷ್ಠ ಕಲಾವಿದರು ಹಾಗೂ ನನ್ನ ಅತ್ಯಂತ ಗೌರವಕ್ಕೆ ಪಾತ್ರರಾಗಿದ್ದ ಕೆರೆಮನೆ ಮಹಾಬಲ ಹೆಗಡೆ, ಕೆರೆಮನೆ ಶಂಭು ಹೆಗಡೆ, ಚಿಟ್ಟಾಣಿ ರಾಮಚಂದ್ರ ಹೆಗಡೆ, ಗೋಡೆ ನಾರಾಯಣ ಹೆಗಡೆ, ಜಲವಳ್ಳಿ ವೆಂಕಟೇಶ ರಾವ್, ಸಿದ್ಧಕಟ್ಟೆ ಚೆನ್ನಪ್ಪ ಶೆಟ್ಟಿ ಕುಟುಂಬಕ್ಕೆ, ಅವರ ಅಭಿಮಾನಿಗಳಿಗೆ ನೋವಾಗಿದೆ ಎಂದು ತಿಳಿಯಿತು. ಆದರೆ, ಈ ಹಿರಿಯ ಕಲಾವಿದರೊಂದಿಗೆ ನಡೆದ ಕೆಲವು ಘಟನೆ ಹಂಚಿಕೊಂಡೆನೇ ವಿನಹ ಅವರ ವ್ಯಕ್ತಿತ್ವಕ್ಕೆ ಅಪಚಾರ ಮಾಡುವ ಉದ್ದೇಶ, ಕಲ್ಪನೆ ನನ್ನ ಮತಿಯಲ್ಲಿ ಎಂದಿಗೂ ಇಲ್ಲ. ಆದರೆ, ಅಪಾರ್ಥಕ್ಕೆ ಎಡೆಯಾಗಿದೆ. ಅಂತಹ ಹಿರಿಯರೆದುರು ಕಿರಿಯನೇ ಆಗಿರಲು ಇಚ್ಛಿಸುತ್ತೇನೆ. ಸಂಬಂಧಪಟ್ಟವರು ಬೇಸರಗೊಳ್ಳದಂತೆ, ನಿರ್ಮಲ ಮನದಿಂದ ನನ್ನನ್ನು ಕ್ಷಮಿಸಿ ಎಂದು ಕೊಂಡದಕುಳಿ ಕೇಳಿಕೊಂಡಿದ್ದಾರೆ.
