ಶಿರಸಿಯಲ್ಲಿ ಪ್ರಥಮ ಹೊರಬೀಡು ಸಂಪನ್ನ

ಜಾತ್ರಾ ಮಹೋತ್ಸವದ ಸಾಂಪ್ರದಾಯಿಕ ಆಚರಣೆಗಳನ್ವಯ ಜಾತ್ರೆಗಿಂತ ಮೂರು ವಾರ ಮೊದಲು ಆರಂಭಗೊಂಡು ಮಂಗಳವಾರ, ಶುಕ್ರವಾರಗಳಂದು ನಡೆಸುವ ಒಟ್ಟೂ 5 ಹೊರಬೀಡುಗಳು ಮಾರಿಕಾಂಬಾ ದೇವಿಯ ಜಾತ್ರೆಯ ವಿಶೇಷ ಆಚರಣೆಗಳಾಗಿವೆ.

ಮಂಗಳವಾರ ರಾತ್ರಿ ನಡೆದ ಪೂರ್ವ ದಿಕ್ಕಿನ ಪ್ರಥಮ ಹೊರಬೀಡಿನಲ್ಲಿ ಶ್ರೀ ದೇವಿಯ ಉತ್ಸವ ಮೂರ್ತಿ ಹೊತ್ತ ಪಲ್ಲಕ್ಕಿಯು ಮರ್ಕಿದುರ್ಗಿ ದೇವಸ್ಥಾನಕ್ಕೆ ಹೋಗಿ, ನಂತರ ಜಾತ್ರಾ ಗದ್ದುಗೆಗೆ ತಲುಪಿ, ಅಲ್ಲಿಂದ ವಿಸರ್ಜನಾ ಪೀಠಕ್ಕೆ ಸಾಗಿ, ತದನಂತರ ಪೂರ್ವದಿಕ್ಕಿನಲ್ಲಿನ ಬನ್ನಿ ಕಟ್ಟೆಗೆ ಆಗಮಿಸಿತು.

ಶ್ರೀ ದೇವಿಯ ಪೂಜಾ ಕೈಂಕರ್ಯ ಹಾಗೂ ಉತ್ಸವಗಳ ಆಚರಣೆಯಲ್ಲಿ ಪ್ರಮುಖ ಸ್ಥಾನ ಹೊಂದಿರುವ ಬಾಬುದಾರ ಕುಟುಂಬಗಳು ತಂದ ಸಾಂಪ್ರದಾಯಿಕ ಪಡಲಿಗೆಯೊಡನೆ ಪೂಜಿಸಲಾಯಿತು. ಈ ಪಡಲಿಗೆಗಳು ಪರಶುರಾಮನನ್ನು ಹೊಂದಿದ್ದು, ಪಡಲಿಗೆ ಹಾಗೂ ಪರಶುರಾಮನನ್ನು ತಾಯಿ ಮಕ್ಕಳು ಎನ್ನಲಾಗುತ್ತದೆ. ಪ್ರತ್ಯೇಕ ಸೇವೆ ಸಲ್ಲಿಸುವ ಬಾಬುದಾರರ ಕುಟುಂಬಗಳು ತಮ್ಮ ಪಡಲಿಗೆ ಜತೆ ಪಾದಗಟ್ಟಿ, ದೀಪ ಇತ್ಯಾದಿಗಳೊಡನೆ ಸಾಂಪ್ರದಾಯಿಕ ಆಚರಣೆಯಂತೆ ಪೂಜೆ ಸಲ್ಲಿಸಿದರು.

ಬನ್ನಿ ಕಟ್ಟೆಯಲ್ಲಿ ಬಾಬುದಾರ ಕುಟುಂಬಗಳು ತಂದಿದ್ದ ಪಡಲಿಗೆಗಳೊಡನೆ ಜೋಗಿತಿ ಬಾಬುದಾರ ಕುಟುಂಬಗಳು ಪೂಜೆ ಸಲ್ಲಿಸಿ ಆರತಿ ಬೆಳಗಿದರು. ನಂತರ ಹಲಗೆ ಬಾಬುದಾರ ಕುಟುಂಬಗಳು ಹಾಗೂ ಪೂಜಾರ ಬಾಬುದಾರ ಕುಟುಂಬಗಳು ದೇವಿಗೆ ಪೂಜೆ ಸಲ್ಲಿಸಿ, ಪ್ರಥಮ ಹೊರಬೀಡಿನ ವಿಧಿವಿಧಾನ ನೆರವೇರಿಸಿದರು. ರೈತ ಬಾಬುದಾರರು ಹಾಗೂ ಇತರ ಬಾಬುದಾರ ಕುಟುಂಬದವರು ಉಪಸ್ಥಿತರಿದ್ದು ತಮ್ಮ ಸೇವೆ ಸಲ್ಲಿಸಿದರು. ಪೂಜಾ ವಿಧಿಗಳ ನಂತರ ಹಿಂತಿರುಗಿ ಹೊರಟ ಶ್ರೀದೇವಿಯ ಉತ್ಸವ ಮೂರ್ತಿಯು ಮರ್ಕಿದುರ್ಗಿ ದೇವಸ್ಥಾನಕ್ಕೆ ಹೋಗಿ, ರಾತ್ರಿ ದೇವಸ್ಥಾನಕ್ಕೆ ಮರಳಿತು.

ಲಕ್ಷಾಂತರ ಭಕ್ತರನ್ನು ಹೊಂದಿ ವಿಶೇಷ ಆಚರಣೆಗಳಿಂದ ಪೂಜಿಸಲ್ಪಡುವ ಶ್ರೀಮಾರಿಕಾಂಬಾ ದೇವಿಯ ಜಾತ್ರೆಯನ್ನು ವಿಜೃಂಭಣೆಯಿಂದ ಆಚರಿಸಲಾಗುತ್ತಿದ್ದು, ಎರಡು ವರ್ಷಗಳಿಗೊಮ್ಮೆ 9 ದಿನಗಳ ಕಾಲ ನಡೆಯುವ ಜಾತ್ರೆಯ ಸಾಂಪ್ರದಾಯಿಕ ಆಚರಣೆಗಳಲ್ಲೊಂದಾದ ಪೂರ್ವ ದಿಕ್ಕಿನ ಪ್ರಥಮ ಹೊರಬೀಡಿನ ಆಚರಣೆಯು ಬಾಬದಾರರ ಕುಟುಂಬದವರು, ದೇವಸ್ಥಾನದ ನೌಕರರು, ಭಕ್ತರ ಉಪಸ್ಥಿತಿಯಲ್ಲಿ ಜರುಗಿತತು.

ದೇವಾಲಯದ ಅಧ್ಯಕ್ಷ ರವಿ ನಾಯ್ಕ, ಉಪಾಧ್ಯಕ್ಷ ಸುದೇಶ ಜೋಗಳೇಕರ್, ಧರ್ಮದರ್ಶಿಗಳಾದ ಸುಧೀರ ಹಂದ್ರಾಳ, ವತ್ಸಲಾ ಹೆಗಡೆ, ಬಾಬುದಾರ ಮುಖ್ಯಸ್ಥ ಜಗದೀಶ ಗೌಡ ಇತರರಿದ್ದರು.